Henry Every (gebore 20 Augustus 1659 - 1699) was ’n Engelse seerower wat in die middel 1690's op die Atlantiese en Indiese Oseaan bedrywig was. Hy het waarskynlik verskeie skuilname soos Benjamin Bridgeman gebruik en was onder sy bemanning en bondgenoete bekend as Lang Ben.
![Thumb](http://upload.wikimedia.org/wikipedia/commons/thumb/0/09/Jack_Avery%2C_Capturing_Ship_of_the_Great_Mogul%2C_from_the_Pirates_of_the_Spanish_Main_series_%28N19%29_for_Allen_%26_Ginter_Cigarettes_MET_DP835024.jpg/640px-Jack_Avery%2C_Capturing_Ship_of_the_Great_Mogul%2C_from_the_Pirates_of_the_Spanish_Main_series_%28N19%29_for_Allen_%26_Ginter_Cigarettes_MET_DP835024.jpg)
Henry Every | ||
’n Houtsneewerk uit A General History of the Pyrates (1725). | ||
Soort | Seerower | |
Gebore | 20 Augustus 1659 Newton Ferrers, Devon, Engeland | |
Oorlede | Iewers in 1699 (op 40) Dalk Devon | |
Bynaam | Lang Ben Die Koning van Seerowers | |
Loopbaan | ||
Jare aktief | 1694-1696 | |
Rang | Kaptein | |
Gebied | Atlantiese Oseaan Seerowersroete Indiese Oseaan | |
Skepe | Fancy, voorheen Charles II |
Hy was ook bekend onder talle verkeerde spellings soos Henry Avery, Jack Avery of John Avery, soos dit in regeringsdokumente voorgekom het.[1][2][3][4] Die naam "John Avery" verskyn in die pamflet The Life and Adventures of Capt. John Avery uit 1709, maar dit is ’n fiktiewe werk. Daniel Defoe het dit later gebruik in sy boek uit 1720 The King of Pirates, en dit is daarna algemeen gebruik.[5]
Hy is deur sy tydgenote "Die Aartsseerower" en "Die Kaptein van Seerowers" gedoop en was berug daarvoor dat hy een van die min groot seerowerskapteins was wat met sy buit ontsnap het sonder dat hy gevang of doodgemaak is. Hy was ook bekend vir wat genoem is die winsgewendste seerowersdaad in die geskiedenis.[6] Hoewel sy loopbaan as seerower net twee jaar geduur het, het sy dade die publiek se verbeelding aangegryp, ander geïnspireer om ook seerowers te word en letterkundige werke tot gevolg gehad.
Every het sy seerowersloopbaan begin toe hy eerste stuurman aan boord van die oorlogskip Charles II was. Terwyl die skip in die Spaanse hawe Corunna voor anker gelê het, het die bemanning ontevrede geraak omdat Spanje nie met die kapersbrief vorendag gekom en die skip se eienaars hulle nie wou betaal nie. Hulle het toe gemuit, die skip "Fancy" herdoop en Every as nuwe kaptein gekies.
![Thumb](http://upload.wikimedia.org/wikipedia/commons/thumb/0/04/Pg_003_-_Engraving_%28bw%29.jpg/640px-Pg_003_-_Engraving_%28bw%29.jpg)
Every se bekendste rooftog was op ’n konvooi van 25 skepe van die Mogolryk op pad na die jaarlikse pelgrimstog na Mekka, insluitende die dhows Ganj-i-sawai en Fateh Muhammed. Every het met ander seerowerskepe saamgespan en die klein seerowersvloot, met hom in bevel, het tot £600 000 se edelmetale en juweliersware gebuit wat in 2020 sowat £92 miljoen (R2 miljard) werd sou wees. Dit het hom die rykste seerower in die wêreld gemaak.
Dit het aansienlike skade veroorsaak aan die brose betrekkinge tussen Engeland en die Mogolryk, en ’n gesamentlike losprys van £1 000 – destyds ’n enorme bedrag – is uitgeloof vir sy gevangeneming. Dit het gelei tot die eerste wêreldwye mensejagtog in die aangetekende geskiedenis.[7]
Tussen 1689 en 1740 was die gemiddelde loon vir ’n eerlike seeman op ’n handelsboot 25 tot 55 sjielings per maand, of sowat £15 tot £33 per jaar.[8] Sommige het maar sowat £2 per maand verdien.[9] £1 000 was meer as die loon vir ’n leeftyd se werk,[8] en iemand wat Every gevang het, sou vir altyd kon aftree.
Hoewel verskeie van Every se bemanningslede gevang is, het hy op vrye voete gebly en in 1696 uit alle rekords verdwyn; dit is onbekend wat hy daarna gedoen het of waar hy was. Daar is gegis dat hy óf in Briitanje óf op ’n tropiese eiland afgetree en sy geld verkwis het.[10] Daar word geglo dat hy iewers tussen 1699 en 1714 dood is. Sy skat is nooit ontdek nie.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.