Beverly Hills, Kalifornië

Beverly Hills is ’n onafhanklike welvarende voorstad van Los Angeles, Kalifornië, waar baie beroemde rolprentsterre woon.^[1] Volgens algemene reg is dit 'n stad en munisipaliteit^[2] in die distrik Los Angeles County van die Amerikaanse deelstaat Kalifornië. Sy stadsgebied word volledig omsluit deur die buurstede Los Angeles en West Hollywood (wat self ook byna volledig deur Los Angeles omsluit word).

Beverly Hills
Ligging in Kalifornië	Seël
	Vlag
Land	Verenigde State
Deelstaat	Kalifornië
County	Los Angeles County
Koördinate	34°4′23″N 118°23′58″W
Stigting	1914
Geïnkorporeer op	28 Januarie 1914
Oppervlakte:
- Totaal	14,79 vk km
Hoogte bo seevlak	79 m
Bevolking:
- Totaal (skatting 2015)	34 870
- Bevolkingsdigtheid	2357,7/vk km
Tydsone	PST (UTC -8) Somertyd: PDT (UTC -7)
Klimaat
- Tipe	Mediterreense klimaat
- Gemiddelde jaarlikse temperatuur	17,7 °C
- Gem. temp. Januarie/Augustus	14 / 22,4 °C
- Gemiddelde jaarlikse neerslae	374 mm
Burgemeester	Julian A. Gold
Amptelike Webwerf	Beverly Hills

Die gebied het oorspronklik deel uitgemaak van 'n Spaanse plaas en is vir die verbouing van limabone aangewend. In 1914 is Beverly Hills deur 'n groep beleggers geïnkorporeer wat op soek na 'n oliebron was, maar in plaas daarvan op water afgekom en besluit het om die plek as 'n nedersetting te ontwikkel.

Europees geïnspireerde kommersiële boukuns in die voetgangerslaan van Rodeo Drive

Beverly Hills se raadsaal in die Spaanse Koloniale Herlewingstyl (Spanish Colonial Revival) dateer van 1932

Styl en status op vier wiele - Italiaanse luukse motors in Beverly Hills

In 2015 het Beverly Hills, waarna ook dikwels as "90210" verwys word (na aanleiding van een van sy hoofsaaklike poskodes), 'n bevolking van 34 870 gehad. Die stad, wat as een van die welvarendstes in die Verenigde State beskou word, staan onder meer bekend vir sy Rodeo Drive-winkeldistrik en die Beverly Hills-olieveld, een van min wat temidde van 'n stadsgebied geleë is en steeds ontgin word.

Beverly Hills se ekonomiese basis vergelyk gunstig met dié van groter nedersettings met enkele honderdduisend inwoners. Saam met pendelaars, wat bedags na die stad stroom, het Beverly Hills tydens dagure 'n bevolking van tussen 150 000 en 200 000. As 'n sogenaamde voldiens-gemeenskap verskaf die munisipaliteit aan sy burgers alle dienste soos polisie, brandweer, watervoorsiening en -suiwering, afvalverwydering en bouinspeksie. Beverly Hills het daarnaas sy eie skooldistrik met sommige van die beste skole in die hele Verenigde State.^[3]

Verwysings

1. HAT Taal-en-feitegids, Pearson, Desember 2013, ISBN 978-1-77578-243-8
2. Nota: Vir nedersettings in Kalifornië word die terme stad (city) en dorp (town) as sinonieme gebruik. Die munisipale bevoegdhede van nedersettings volgens algemene reg word deur die deelstaat se Government Code (ook California Codes genoem) bepaal.
3. www.beverlyhills.org: About Beverly Hills. Besoek op 10 Maart 2016

Eksterne skakels

• Wikimedia Commons het meer media in die kategorie Beverly Hills, Kalifornië.