𨋢

𨋢（圖：，係形聲字，粵拼：lip1，借自英文 lift /lɪft/），又嗌做升降機，係打棟上落嘅機械，方便過行樓梯，分咗兩種，載人上落同載貨。啲舊式𨋢，道門設計仲未有自動開閂嘅功能，需要自己用手開閂外門同內門，新款嘅道門多數都識自動開同閂。𨋢入邊通常有掣畀你撳，去到你想去嘅嗰層樓。有啲𨋢開門有𡁯（dyut1）一聲，有啲一邊門，有啲兩邊門，有啲有窗口。

喺倫敦地鐵底層嘅𨋢。

𨋢掣

「𨋢」字起源

以前啲講廣東話嘅人用慣英文個「lift」字，未有唐字。之後，首先喺澳門興起咗呢個「𨋢」字，佢出現咗喺1991年12月6號澳門華僑報嘅一篇報導標題度：《怪客𨋢內擲出汽油瓶》^[1][2]。睇返呢個「𨋢」字，車字邊加個「立」字，因爲佢好似架車載住個人，個「立」字有兩個原因，因爲個「𨋢」字發音有啲啲似個「粒」（粵拼：lap1），可以做形聲字嘅聲旁，又因爲有人企喺入邊，又可以會意。後嚟呢隻字先傳到去香港，跟住又傳埋去廣州，卒之講粵語嘅地方都開始用呢個「𨋢」字。

講國語嘅嗰啲地區就嗌呢樣嘢做「電梯」^[3]，但噉叫冇咁易明，因爲會撈亂咗兩種唔同嘅機械。𨋢同扶手電梯係兩種唔同嘅類型、概念同原理唔同嘅運輸架生。扶手電梯係用運輸帶原理，有梯級，斜嘅，唔可以垂直打棟，仲冇門𠻹。𨋢就啱啱好掉返轉，用纜索原理，唔平得，唔斜得，一定要垂直，有門。

睇埋

• 電梯

參攷

1. 王惠、秦秀白. 粵語中的英語譯詞探微[J]. 華南理工大學學報, Vol.7 No.3 2005: 58-61.
2. 鄧景濱 《港澳新詞語研究》[M]. 廣州:暨南大學, 1996.
3. 〈存档副本〉。原著喺2023年8月18號歸檔。喺2023年8月18號搵到。