香港嘅公立大學 From Wikipedia, the free encyclopedia
香港科技大學（粵拼：hoeng1 gong2 fo1 gei6 daai6 hok6；英文：The Hong Kong University of Science and Technology，縮寫HKUST），簡稱科大，係香港第三間大學。響1991年10月招收第一批學生。大學校園響清水灣半島，依山面海，飽覽牛尾海景色。
科技大學而家有四個學院，分別係商學院、理學院、工學院同人文社會科學學院。截至2021年，大學有學生16848人，教學人員738人。科大仲有喺廣東省開設咗好多研究機構，而位於廣州市嘅香港科技大學（廣州）新校舍亦都會喺2022年開始啟用。
雖然科大淨係建校三十年，但係已經成為咗亞洲甚至係全球領先各研究大學之一[2]，被認為係世界上發展最快嘅大學之一。喺2021年，科大喺QS世界大學排名第34位[3]同埋泰晤士高等教育世界年輕大學排名第3位[4]。
香港科技大學係因為1980年代經濟結構轉變而起。因為香港已經進入經濟轉接期，香港政府預期香港會轉向高科技同商業，工商業要求有更多大學生配合。所以當時香港政府就決定起第三間大學，配合呢個需要。咁啱呢個時候中英已經簽咗聯合聲明，英國會響1997年交香港畀中華人民共和國，英軍就一批批撤走。響1986年，響大埔仔嘅高希馬兵房清走用來起香港科技大學，喺之前香港童軍總會重響個地方搞咗個大露營。
1988年，大學重未起好。吳家瑋就做咗呢間未來大學嘅校長。起緊呢段時間，香港嘅通貨膨脹好犀利，所以好快就超支。到佢起好第一期，超支呢一項就備受各方指責。因為大學設備先進，所以俾社會抨擊係勞斯萊斯大學，俾人話奢侈。另一方面，間大學無用比賽第一名個設計，亦都俾議員質疑。呢啲批評響大學初頭幾年一直無停過。更加弊嘅係，香港賽馬會同政府畀嘅錢係唔夠起第三期，所以吳校長一直周圍搵人捐錢去起埋其餘部份。不過，經過大學多年努力，亦證明到當年投資係物有所值，近來亦唔見有人提起呢啲批評。
1991年間學校未起好嗰陣，第一批學生已經響尖沙嘴上堂。
到咗今時今日，香港科技大學已經成為全球其中一間最頂尖嘅大學，科大喺唔同嘅院校排名亦都名列前茅。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
