霍格華茲科目
From Wikipedia, the free encyclopedia
霍格華兹科目係英國作家J·K·羅琳嘅兒童奇幻小說《哈利波特》系列同埋佢嘅衍生作品入面,作為虛構學校霍格華茲魔法與巫術學院所出現嘅學科。
霍格華茲嘅部分學科同麻瓜學校嘅好相似(例如天文學同魔法史),而其他學科(例如黑魔法防禦術)就係魔法世界特別先至有。霍格華茲嘅老師(學生會叫佢哋做教授)各自會去教一門專業學科。
一至五年級嘅必修學科包括:黑魔法防禦術、變形術、符咒學、魔藥學、草藥學、天文學同埋魔法史,一年級另外仲有飛行學。二年級學期尾果陣,學生都一定要為佢哋三年級嘅課程入面加兩科以上嘅選修科。選修科有五個選擇,包括:奇獸飼育學、算命學、占卜學、麻瓜研究,同埋古代神秘文字研究[1]。如果學生有需求嘅話,高年級嘅最後兩年有時仲會開設煉金術等等呢啲專門學科[1]。