From Wikipedia, the free encyclopedia
陳樹英(英文:Josephine Chan Shu-ying,1958年11月18號—),廣東潮州人,民主黨前成員,屯門區議會前任主席同埋兆康選區前任區議員(1994-2015同埋2020-2021年),亦做過區域市政局議員(1995-1999年)。
陳樹英1982年喺香港大學畢業,主修中文,先後考獲文學士同埋教育文憑。佢曾經喺屯門大興邨佛教沈香林紀念中學教咗八年書,重喺校內識咗現任老公李永達,之後兩人喺1984年拉埋天窗,曾經喺1990年離婚,後尾响2001年復合。
佢喺1994年當選屯門兆康選區議員,之後四屆(1999、2003、2007、2011)亦都喺同一選區成功冧莊,直到2015年先至輸畀民建聯巫成鋒。另外,佢喺1995年當選區域市政局(屯門北)議員。
佢曾經代表民主黨出戰1998、2000、2004、2012年香港立法會選舉,當中頭兩次(1998、2000)係喺新界西選區,佢先後幫過李永達、何俊仁兩位黨友抬轎,2004年參選飲食界功能界別,但佢只係攞到849票,輸畀張宇人。2012年,佢擔大旗排頭位參選新界西選區,名單後面重有黃偉賢、李洪波、黃麗嫦同埋何杏梅四位黨友,但佢同老公李永達三人名單齊齊落選。
2019年第6屆香港區議會選舉,佢翻兜參選兆康選區,贏咗時任區議員民建聯巫成鋒,成功敗部復活,重返區議會,重做埋屯門區議會主席;2021年7月頭宣布劈炮,唔撈區議員一職,重喺同年9月移居英國,而佢留低嘅屯門區議會主席一職,就由工聯會陳有海繼承。
![]() |