From Wikipedia, the free encyclopedia
事件涉及嘅鹹相，相中人都係香港藝人、歌手或者模特兒[1]。事件引起香港警察調查同介入，曾經要求國際刑警協助調查[2]。呢單嘢除咗令涉及嘅藝人名譽受損之外，香港警察嘅執法程序亦引起市民非議，而鹹相涉及嘅藝人都係中港台當紅明星，結果引起中港台三地網民瘋狂追相熱潮，又做咗連續成個禮拜香港報紙頭條。
2008年1月27號星期日8點左右，喺一個網上論壇香港討論區成人貼圖區度，有人登咗一張男女喺床上親密嘅相，而相入面嘅一男一女同香港當紅藝人鍾欣桐同陳冠希極似，相入面個女仔擘開對大脾，露出私處，於是呢張相就喺網上好多熱門論壇、新聞組之間相傳，網民都熱烈討論相中人係咪就係鍾欣桐同陳冠希，由於張相越傳越多人講，鍾欣桐所屬間唱片公司英皇娛樂集團發表公開聲明話張相只係移花接木嘅惡作劇，話張相係假嘢，又話已經報咗警[3][4]。
喺之後1月28號下晝，又有一張鹹相流傳，相入面係一個女仔同男仔準備口交嘅情形，而呢張相入面嘅男女，仲好清楚睇到同藝人陳冠希同一個息影女藝人陳文媛個樣好似，同日凌晨又再傳出一張香港女藝人張柏芝作狀自慰嘅相。呢批相大膽程度，喺網絡上造成好多討論，亦令好多網民都好好奇而周圍搵呢幾張相，批相就好快咁喺網絡散佈[5]。
喺第二日1月29號下晝，又有一批連橫圖式嘅床上親密嘅相喺網上流傳，呢張相同第一次流出張鍾欣桐同陳冠希親密嘅相好似，而且係連橫圖式，內容係個男仔喺度撫摸女仔陰部同埋口交。
由於鹹相涉及嘅藝人都係中港台當紅明星，而放相嘅人唔係一次過出，而係一日一啲咁出，結果引起中港台三地網民瘋狂追相熱潮。之後再陸續有其他好多唔同女藝人嘅鹹相喺網上面流傳，不過之後呢批相涉及嘅藝人都唔算好紅，佢哋都係一啲模特兒或者過氣歌星。
又由於放相人身份神秘，而手法同日本漫畫《死亡筆記》主角行事手法好似，於是網民就用《死亡筆記》主角嘅綽號「奇拿」嚟稱呼神秘放相人。
鹹相事件發生之後，喺網上造成狂熱，英皇娛樂集團報警之後，香港警察高調介入事件，喺2月4號警察拉咗第一個涉嫌事件嘅人鍾亦天[6]，仲由俗稱一哥，香港警察之中最大嘅警務署長鄧竟成親自交代案情[7][8][9] ，後來又拉咗個懷疑係鹹相發放源頭嘅人[10]，又係好高調咁搵警務處助理署長（刑事）黃福全出嚟宣佈鹹相源頭已經搵到[11]。
香港警方喺處理呢單案嘅手法引嚟好多人嘅非議，好多人認為警察只係拉替死鬼交差，2008年2月3號社會民主連線因為咁，於是同埋一啲網民，一齊去咗灣仔警察總部門口請願，抗議警方亂拉人，製造網上白色恐怖[12][13]。
亦有網民發起大遊行，抗議警察濫權同選擇性執法，結果喺2008年2月10號有大約五百幾人參加「二‧一○」網民大遊行。 [14][15]
有人認為，呢單嘢之所以搞到咁，係因為警方執法受爭議，先由最初只係小事而變到咁大鑊[16]。
好多份香港報紙都罕有咁連續十幾日以呢單嘢做頭條新聞[17][18]，反而報道新年市況同中國雪災得幾份。
2月3號各份香港報紙頭條：
而其中幾份主要報紙都連續成個禮拜用呢單嘢做頭條，好似《蘋果日報》連續21日（1月29號到2月18號）頭版大篇幅報道，隔咗兩日22號又用返呢單頭條。《東方日報》連續19日（1月29號到2月16號），隔咗一日18號又用返呢單頭條[20]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
