銀仔

銀仔（粵拼：ngan2 zai2）又叫辰砂、硬幣、大餅、散銀，係種金屬造嘅錢銀，用來通貨。銀仔係扁身，多數係官府發嘅。舊時係差唔多係最主要嘅通貨，因為通貨膨脹，貨幣貶值，家下好多大面額嘅銀紙替咗佢哋個位。

喺經濟學上，銀仔定義係指「細小、平、又偏圓形嘅金屬或者塑膠，用途係愛來做錢」。歷史早期嘅銀仔多數都係用金同銀等嘅貴金屬整，目的係要令到用嚟做錢嘅貴金屬重量有個易數嘅單位。到咗今日，世界各大經濟體都有用銅等非貴金屬整銀仔，而各經濟體都會用各種方式（自己掘或者進口）取得金屬，並且用呢啲金屬整一啲重量一致嘅銀仔。

銀仔可以偽造，但喺人類史初期幫手創造一個錢嘅單位，令價值量度做起上嚟更容易，間接令銀行成為可能。打後阿基米德原理嘅發現令測試銀仔嘅重量同金屬純度更加容易，又令整假銀仔更難，促進咗銀仔嘅使用^[1]。

喺會用銀仔嘅經濟體當中，個銀仔用乜金屬造往往同佢面額有關：金最值錢，所以有金嘅銀仔最大面額，其次係銀，再落係銅。金幣往往俾人用嚟做大面額嘅交易，例如係政府消費等等；銀幣通常俾人用嚟做中等大細嘅交易，會俾人用嚟數稅、合同、同債嘅價值；而銅幣就係俾人攞嚟做日常生活嘅交易。呢個系統喺遠古印度經已存在，而中世紀嘅歐洲一路都用^[1]^[2]。