金陵 (搞清楚)

金陵（粵音：gam¹ ling⁴；南京話：jin¹ lin²）好多時係指中國江蘇嘅省城南京，同時亦可能係以下呢啲事物：

• 紫金山，古名叫金陵。
• 金陵城，南京嘅古城池。
• 金陵十二釵，紅樓夢之中有名嘅人物譜。
• 金陵鎮，好多處。
• 金陵寺鎮，中國陝西商洛商州嘅鎮。
• 金陵鄉，中國江蘇徐州豐縣嘅鄉。

作爲南京雅稱嘅「金陵」

南京嗌過好多個名，其中最有名就叫做金陵，亦都畀人認為係南京最雅緻嘅名。呢個名第一次出現係楚威王滅越之後喺石頭山（有講話係今日嘅清涼山）起石頭城，設金陵邑，喺前333年到前210年間用；之後就改名，直到唐代，又以金陵郡浮頭，不過好快就改叫昇州，最後一次做正式名係楊吳時，叫金陵府。不過金陵呢個名一直流傳落來，喺文學上就有「金陵十二釵」。

而家學術上一般認為「金陵」開始時係紫金山嘅名，後來因為石頭城起喺紫金山脈度，於是日後嘅城邑接咗「金陵」呢個名。比如唐代嘅《建康實錄》就講楚威王係「因山立號、置金陵邑」。當年長江重係流過清涼山西側，金陵邑嘅位置叫做「臨江控淮」，位置險要，所以楚威王要喺度置邑。而石頭城之前，南京地方就有越城，不過唔同在於石頭城係南京第一次成為治所、南京建政開始，所以「石頭城」「金陵」就成為南京好響嘅名，反而越城就賴低咗。

來源

有三種講法：因山立號、金壇得名、帝王埋金。

因山立號

呢個講法認為，「金陵」最初係紫金山嘅名，因為石頭城修喺紫金山脈，所以以山名做城名。

解隻字出來就係話：

• 「陵」係古文有兩個意思，一係《說文解字》嘅「大阜」，即係高山；二係借用爲皇帝墓，古人將高山比作係最高統治，比如皇帝駕崩叫做「山陵崩」，同時因為皇陵通常係皇帝在生時起嘅，爲咗老禮，就嗌皇帝墓做「陵」、「山陵」。
• 「金」唔係作「金山」或者「金色」解，而係「銅色」，比如家下都有將「銅」嗌做「赤金」，而「純銅」嗌做「紫銅」。

而紫金山嘅山岩就係泛紫（所以嗌做紫金山，紫金本身有紫銅色嘅含義），所以「金陵」嘅意思係「紫銅色嘅山」。後人唔習慣將山嗌做「陵」而嗌「山」，於是就有「金陵山」嘅講法，比如《輿地誌》就話「蔣山古曰金陵山，縣之名因此山立。」，查實「陵」就經已係「山」意思。

此外，南京地方400米打上嘅山唔算多，紫金山係最高，而古人有高山崇拜，佢哋會將當地最高嘅山嗌做「祖山」，地位神聖，而楚國嘅地名多用「陵」字來尊敬啲祖山，所以楚威王用祖山嘅名幫石頭城安名幾符合習慣。

金壇得名

呢個講法同樣出自《建康實錄》「楚之金陵，今石頭城是也，或云地接華陽金壇之陵，故號金陵。」

帝王埋金

呢種講法喺民間流傳好廣，喺呢個講法度，「陵」解作「陵墓」。

相傳秦始皇巡過南京地方，見到紫金山紫氣東昇，啲方士就話呢個地方會出皇帝，秦皇希望自己子孫二三四世噉落去，驚有人爭佢位，於是係金陵崗埋金來鎮王氣。而金陵崗傳說係今日幕府山西面，《景定建康誌》話「父老言秦厭東南王氣，鑄金人埋於此」。重有種傳說秦皇喺金陵崗立碑，話「不在山前、不在山後、不在山南、不在山北，有人獲得、富了一國」，查實無埋金，呃啲人掘金，掘崩咗山就散佢啲王氣。

又有遞個版本，換成係楚威王埋金，又係話南京有王氣，於是去今日南京獅子山北嘅江邊（龍灣）埋金，同樣出自《景定建康誌》「周顯王三十六年，楚子熊商敗越，盡除故吳地。以此地有王氣，因埋金以鎮之，號曰金陵。」

一啲學者質疑，「陵」解做皇陵，係葬皇帝嘅地方先噉叫，埋金嘅地方又點會噉叫？同時金陵邑個名喺先秦就嗌，秦始皇嗰處唔成立，而且秦皇年間金陵邑改名爲「秣陵」，可能係將秣陵嘅事噏咗去金陵度。學界嘅理解係古史書有個特點係史實同傳說成日撈埋，由於傳說精彩啲，重可以穿鑿啲神話，就喺民間傳開來。

攷

• 金陵_互動百科
• 金陵_南京旅遊網
• 南京名稱金陵的由來