茅山

  呢篇文講山。想搵法術嘅話，請睇茅山術。

茅山（粵拼：maau4 saan1；吳語通用拼音：mau sae）係位置喺中華人民共和國江蘇省嘅山，喺鎮江句容同常州金壇交界位，主峰大茅峰，標高372.5米。古名句曲山（句讀勾，ngau1 kuk1 saan1）、地肺山（dei6 fai3 saan1）、三茅山（saam1 maau4 saan1）

茅山
海拔	372.5米
位置	中國江蘇（鎮江句容、常州金壇）
座標	31°48′14.7″N 119°18′58.4″E
睇 傾 改

茅山係中國道教名山，喺道教洞天福地中，排十大洞天嘅第八洞天、七十二福地嘅第一福地^[1]。佢係道教上清派嘅發源地，佢嘅道教史好長。呢度誕生咗有名嘅茅山道術，係道教茅山宗嘅活動基地。相傳西漢景帝時已經有道士來呢度修煉隱居，所以有長達兩千年嘅道教史。據《茅山志》，茅山曾有三宮、九觀、七十茅庵，殿宇房屋三千間，道士上千人，直到明清呢度嘅道教先開始衰弱。茅山得名自三茅真君，相傳漢景帝時有茅氏三兄弟（茅盈、茅固、茅衷）來呢度修道成仙，爲咗紀念佢哋，座山嗌做三茅山，簡稱茅山^[1]。

1949年後，茅山三宮五觀合併成茅山道院，文革時受到好大破壞，1979年後宗教活動先恢復正常。1983年茅山道院列入全國21處重點開放宮觀，1986年江蘇省定茅山景區做省甲級風景名勝區，2014年國家旅遊局升佢做國家5A級景區。

史

西晉開始，茅山成爲道教聖地，西晉時有女道士魏華存來呢處修道，後人尊佢做茅山宗開山太師；東晉許謐、楊羲喺茅山合著《上清經》。齊梁年間，陶弘景創立茅山上清道團，同啲弟子開咗一批道館。隋唐五代，係茅山道教嘅鼎盛期，大批道士來呢度修道，茅山宗一直有宗師傳承。呢陣時唐太宗敕建太平觀、崇元觀、紫陽觀。宋元年間，呢度繼續高道輩出，茅山宗師從第二十代到第四十五代都受朝廷禮遇。後世嘅三宮五觀就喺呢陣時建成。三宮即係九霄萬福宮、元符萬寧宮、崇禧萬壽宮，五觀即係德佑觀、仁佑觀、玉晨觀、白雲觀、乾元觀。明清時代雖然開始衰落，但香火仲係隆盛。太平天國時，茅山宮觀受兵禍燒冧。1938年9月日本仔侵華，燒毀90%以上嘅宮觀房屋。文革時又受破壞，直到改革開放後啲嘢先修復返^[1]。

宗教場所

茅山度登記入冊嘅宗教場所有兩宮一觀：九霄萬福宮、元符萬寧宮、乾元觀。兩個宮都係茅山道院嘅，喺山嘅句容部分，既係全國重點宮觀，亦係觀光地，年均接待50萬人次遊客信衆。乾元觀喺山嘅金壇部分，係坤道道觀，同茅山道院無關。

九霄萬福宮喺茅山主峯大茅峰頂，所以統稱「頂宮」。萬福宮有四進，依山逐級上。第一進係靈官殿，第二進係藏經樓，第三進係主體建築太元寶殿，入面有三茅真君像，第四進係升表台、二聖殿。宮內有茅山鎮山四寶，玉印、玉圭、玉符、哈硯，都係宋代文物^[1]。

元符萬寧宮喺積金峰麓，原先茅山道教收埋教印嘅地方，所以稱爲「印宮」。唐朝始建，宋代興盛，傳說宋哲宗嘅母后唔小心吞咗銀針，御醫都冇佢符，茅山宗師入京，攞張符畀佢吞，太后吞咗後嘔返支針，哲宗龍顏大悅，落令重建宗師住嘅地方，賜名元符宮，又賜佢鎮山四寶^[1]。而家元符宮係江蘇省道協、鎮江市道協、茅山道協嘅駐地。

乾元觀喺茅山東麓青龍山南。茅山三宮五觀中，三宮奉嘅係正一道，五觀奉嘅係全真道，乾元觀就係全真宗祠、五觀之首^[2]。

攷

1. 〈茅山〉。《蓬瀛仙館道教文化中心資料庫》。原著喺2020年3月28號歸檔。喺2017年6月16號搵到。
2. 〈適應與發展 — 淺談茅山道教適應與發展歷程以及廿一世紀的發展趨向〉。《道教學術資訊網站》。原著喺2020年2月19號歸檔。喺2017年6月16號搵到。