逾越節晚餐(希伯來文:סדר,羅馬拼音:seder,意思係 「次序」;英文:Passover seder),又譯逾越節家宴[1],係猶太教儀式,標誌住逾越節嘅開始。
逾越節晚餐喺社區或者屋企舉行,除咗屋企人之外,亦都可以有朋友參與。晚餐唔係淨食,而係一種儀式,要用哈加達做指引,跟次序做,除咗食餐之外,重要嘅部分包括朗讀出埃及記入面記載以色列人由古埃及釋放出來,脫離埃及人嘅奴役,重獲自由嘅事蹟,亦都會唸讚美詩篇同 「大讚美詩篇」,同唱逾越節歌曲,儀式中嘅祝頌禱文有啲係逾越節晚餐先有[2][3]。