視覺系統
From Wikipedia, the free encyclopedia
視覺系統(英文:visual system)係指中央神經系統裏面負責處理視覺資訊(眼所探測到嘅光)嘅部份。
- 光會通過眼角膜射落去對光敏感、位於隻眼最後嘅視網膜(retina)嗰度。
- 視網膜上有感光細胞(photoreceptive cell;一塊人類視網膜上有上億粒感光細胞)會按接收到嘅光嘅物理特性(強度同顏色等)嚟決定射乜嘢訊號:例如有啲感光細胞淨係會對藍色光有反應,所以如果呢柞細胞有射訊號,個腦就可以知道隻眼實係接收到藍色光;又有啲感光細胞射訊號嘅頻率會視乎收到嘅光嘅強度而定,所以個腦可以透過觀察呢啲訊號嘅頻率得知隻眼睇到嘅光嘅強度。
- 呢啲訊號會經視神經(optic nerve)上腦,目的地係位於枕葉後方嘅視覺皮層(visual cortex)[1]-視覺皮層係成塊大腦皮層(大腦最外面嗰浸組織)嘅視覺資訊中心,負責處理個腦收到嘅視覺訊號,而視覺皮層病變可以搞到個人就算對眼好地地都盲[2][3]。
一般嚟講,人嘅視覺系統會對電磁波譜當中波長喺 370 至 730 納米之間嘅電磁波(EM wave)有反應-呢啲電磁波係所謂嘅可見光[4]。不過一個人睇得到乜嘢電磁波可以受年齡等因素影響,例如有研究發現,佢哋研究樣本當中嘅細路可以睇得到大人睇唔到、波長得嗰 340 納米嘅紫外光[5]。