表字
From Wikipedia, the free encyclopedia
表字,又叫做字,係漢字文化圈歷史上同傳統上嘅一種正式代稱。古時成年男人女人都會有自己嘅字,有啲人重有多於一個表字。
叫人哋嗰陣,出於禮貌嘅考量,平輩通常都會用字而唔係用名。名通常只係由長輩叫嘅,區分長幼尊卑。極端啲重有別字、譜名、詩號、武號、齋號、法號、道號、封號、徽號、尊號等要考慮。[lower-alpha 1]如果自己無機心無心邪,初次見面亦可以先用「臺甫」之類嘅語言,問咗人哋個名號先,而對方鍾意咩稱呼,想畀人叫乜嘢,自然一目了然。
另外喺古文嗰度,如果名同字一齊講嗰時,習慣會先稱字後稱名。《史記》裏面孔子老竇就畀司馬遷叫做叔梁紇,其中「叔梁」就係佢個字,「紇」係佢個名。
亦有人自己嘅表字同名有關係。例如杜甫個表字就叫子美,其中「甫」係古代男人嘅美稱,對應「子」同「美」,其中「子」亦係古代男人嘅尊稱。其他表字同名有關係嘅人物,就如岳飛字鵬舉,飛同鵬相關;關羽字雲長,羽同雲相關。