薄扶林(粵拼:bok6*3 fu4*6 lam4 [1];英文:Pokfulam或Pok Fu Lam,早年有Pokefulum),《香港雜記》叫百步林,係香港一地,亦係一村,喺香港島爐峯峽向西南打落嘅谷口處。薄扶林西面係大口灣(讀環),今爲數碼港。薄扶林有薄扶林水塘,係香港首個水塘。
薄扶林,喺大口灣西岸山腰一平地。薄扶林到爐峯峽,係一谷。薄扶林係谷口平地,谷有涌,由諸峯集水。峯有北便扯旗山,東嘅奇力山同歌賦山。英人在谷中起咗薄扶林水塘。涌過薄扶林,向南流入瀑布灣,係舊日船隻汲水之處。而佢東面奇力山而南,係鷄籠灣(讀環),又叫奇力灣。
薄扶林平地有村,叫薄扶林,又叫薄扶林村。舊時涌兩邊有好多田地,家下附近仍有人務農。英人一八四一年宣佈統治時,薄扶林村經已有人住。無耐英人開路由裙帶路到香港仔,當中由西營盤到鷄龍灣,後尾畀名叫薄扶林道,而鷄龍灣到石排灣,叫石排灣道。條路今日仍留有零散嘅里程碑。
無耐,香港政府見香港人多,水唔够用,就喺薄扶林起水塘,叫薄扶林水塘。佢係香港首個水塘。之不過無耐,香港政府分期喺大潭𡰪起大潭水塘,水量遠超薄扶林水塘。薄扶林水塘只係備用。
之後牛奶公司睇中薄扶林,喺度養乳牛,賣牛奶,供香港之用。
薄扶林村有好多寮仔。薄扶林村向薄扶林水塘行,有零散屋宇,好似牛奶公司宿舍、薄扶林公眾騎術學校、香港傷健協會薄扶林傷健營、香港大學舍堂之一嘅大學堂等。村東過薄扶林道,有伯大尼,家下係香港演藝學院一樓、有牛奶公司牛欄,家下係惠康劇院,重有薄扶林技能訓練中心、中華廚藝學院。
薄扶林一帶嘅屋宇,都沿薄扶林道起。
薄扶林村以南,有置富花園同薄扶林花園,都係私人屋邨。南已入鷄籠灣境,有薄扶林消防局、薄扶林救護站。再南面有華富邨等。
薄扶林村以北,就有零散屋宇,散佈薄扶林道兩邊。當中有香港大學嘅宿舍、心光盲人學校。瑪麗醫院係薄扶林頭,不過查實喺沙灣對上,可謂沙灣之境。下面有香港大學醫學院,更近沙灣。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.