荃灣老圍

老圍村喺1669年落成，係香港新界荃灣最古老嘅村落，最初叫「淺灣圍」，喺老圍路以南，距離荃灣市中心大約5至10分鐘車程。村莊後面倚住顯達鄉村俱樂部同城門水塘植林區，可以望到石圍角邨同綠楊新邨一帶。村裏面嘅居民有2000幾人，全部係平房排列，多數係古樸嘅瓦頂磚屋，亦都有現代化嘅三層式村屋，散發住平靜簡樸嘅人民氣息。老圍村嘅一大特色係廟宇林立，有幾十間佛、道、儒家寺廟，例如有出名嘅西方寺、圓玄學院、東普陀講寺同龍母佛堂（龍母廟）等，重有全港唯一嘅藏傳佛教寺廟，所以喺村裏面周圍都見到僧人^[1]。

航拍荃灣老圍

荃灣老圍村

史

老圍村係清朝初年復界之後最早喺荃灣一帶起好嘅村落，當地人叫做「舊村」，喺康熙八年（1669年）由曾、張、黃、許、鄧五姓人起成，其中以姓張一族最多人。老圍村起嗰時曾經有圍牆防禦海盜，村裏面嘅房屋以行列嘅形式起成，同一個姓嘅村民建立喺同一列嘅房屋，稱為「排屋」。

老圍張氏家祠

老圍起好初期，五姓村民分別起咗5間祠堂，但係年久失修下先後倒冧，而家只剩低張氏家祠。大約喺100年以前起，係3進式嘅建築，喺1990年重修時，只剩低2進，前進係門廳，後進係正廳，後進比前進高啲，用咗「四扇門」嘅建築形式。張氏家祠曾經設立私塾，叫做「翠屏書室」，重請咗八鄉秀才鄧元杰任教^[2]。

老圍村牌坊

老圍村初期，各家生活都以耕田賣柴，以村路連接到荃灣墟市，僅以「老圍村」做路名。圓玄學院見到咁，就捐咗一座鐵架牌樓嚟做路標。由於經過多年嘅風雨，喺2007年圓玄學院再撥資重起新牌坊^[3]。

老圍公立學校

村口嘅「老圍公立學校」曾經係電視劇《京華春夢》嘅拍攝場地，而家已停辦。佢傍邊係「同和社」、老圍村公所同香港聖公會麥理浩夫人中心鄰舍層面社區發展部。

• 
  老圍村牌坊
• 
  老圍公立學校
• 
  老圍村公所
• 
  聖公會麥理浩夫人中心

參考

1. 〈存档副本〉。原著喺2018年10月24號歸檔。喺2018年8月3號搵到。
2. 荃灣區文物徑簡介 互聯網檔案館嘅歸檔，歸檔日期2008-12-10.
3. 老圍村牌坊碑記

出面網頁

• 「老圍─借藝術發掘歷史」天堂與地獄：香港藝術的城市觀察之一，梁寶著，香港獨立媒體專欄，2007年3月3號