習近平個人崇拜係指習近平自從2012年11月做咗中共中央總書記，成為最高領導人之後，圍繞著佢嘅個人崇拜現像同政治宣傳。[1][2][3][4][5]
發展
習近平喺2012年11月召開嘅中共十八屆一中全會上當選中共中央總書記同中央軍委主席。自此，中國越來越多書籍、漫畫、流行曲、甚至舞台劇宣傳要效忠“習核心”。[6]
2017年10月召開嘅中共十九大，通過將用習近平命名嘅《習近平新時代中國特色社會主義思想》寫入《黨章》。[7]喺2018年3月召開嘅十三屆全國人大第一次會議上面通過嘅《憲法修正案》，再將《習近平新時代中國特色社會主義思想》寫入《憲法》。[8]根據中國中央電視台嘅報道，有全國人大代表為習近平再次當選領導人喜極而泣。[9]中共中央政治局會議稱呼習近平做“領袖”，喺中華人民共和國歷史上得毛澤東同華國鋒曾經被官方叫做領袖。[10][11][12]喺2018年7月，中共中央政治局常委、全國人大常委會委員長栗戰書公開發表習近平係“全黨核心”，要全黨維護核心嘅權威。[13]
喺2017年，有報告話江西省人民政府通知基督徒要佢哋將懸掛嘅耶穌相片換做習近平嘅肖像。[14]自從2017年10月，越嚟越多中國高校將《習近平新時代中國特色社會主義思想》納入大學課程嘅核心部分，係《毛澤東思想》之後有另一個領導人嘅指導思想可以達到咁高嘅重視程度。[15]有曾經被關入新疆再教育營嘅維吾爾族人士透露，佢哋喺營入面被強迫要感謝中國共產黨嘅恩惠，同祝願習近平“萬歲”。[16]
2018年10月，湖南衛視開始播放名為“新時代學習大會”嘅節目，宣傳習近平嘅個人形像同佢嘅指導思想。[17]2019年1月，阿里巴巴集團開發咗一個叫“學習強國”嘅移動應用程序，方便智能手機用家學習關於習近平嘅言論同睇關於習近平嘅新聞。呢個應用發布咗2個月之後，已經有超過7300萬嘅下載量。[18]而喺官方媒體工作嘅中國記者，都必須通過學習強國平台手機用戶端嘅培訓考試，通過之後先可以申領新版記者證。考試內容包括習近平新時代中國特色社會主義思想、“習近平總書記關於宣傳思想工作的重要講話”、馬克思主義新聞觀、新聞倫理與政策法規同埋新聞采編業務。考試采取閉卷方式；考試唔合格嘅，只可以補考一次[19]。2019年8月25號，《人民日報》頭版刊登文章《人民領袖愛人民》，再次用「領袖」一詞稱呼習近平，記述佢嘅甘肅之行。文章入面提到有人見到習近平之後激動落淚[20]，期間民眾更高呼「總書記萬歲」[21]。
睇埋
參考
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
