From Wikipedia, the free encyclopedia
知更雀,又叫羅賓雀、羅賓鳥、知更鳥、歐洲知更鳥(英文名:European robin;學名:Erithacus rubecula),喺英國同愛爾蘭,一般會簡稱佢哋做知更雀(robin)或者紅胸知更雀(robin redbreast)。知更雀係一種小型既食蟲雀形目鳥類(small insectivorous passerine bird),屬於舊世界鶲科(Old World flycatcher)[1]既 chats 亞科(subfamily)[2]。註:舊世界既意思係喺發現新大陸之前,歐洲所認識既世界,即係歐亞大陸同非洲。
知更雀遍布喺歐洲各地,東至西西伯利亞(Western Siberia),南至北非(North Africa);除咗極北既地區之外,佢喺大部分範圍內都可以定居鳥(sedentary bird;非候鳥)。長度大約係12.5–14.0公分(4.9–5.5英吋);雄性同雌性的顏色相似,上半身係灰色或者棕色,臉部到胸部係橙色,腹部既毛比其他地方既毛白啲。
1960年代,《泰晤士報》舉行咗一次投票,結果係知更雀俾讀者選咗做英國既非官方國鳥[3];2015年,組織「城市觀鳥者」(urban birder)一項英國「國鳥」公投,結果知更雀得票34%(穀倉貓頭鷹得票12%,排名第二;烏鶇得票11%,排名第三),正式被選做英國國鳥[4][5]。
歐洲知更雀獨特既橙色胸部,令到佢哋最初俾人叫做「紅胸」(redbreast),註:喺英文既世界,橙色作為一種顏色既叫法,去到16世紀先至有,原因係喺16世紀,一種叫橙既水果引入咗英國。荷蘭文 roodborstje、法文 rouge-gorge、瑞典文 rödhake、德文 Rotkehlchen、意大利文 pettirosso、西班牙文 petirrojo 同埋葡萄牙文 pisco-de-peito-ruivo 指既都係歐洲知更雀前面獨特既顏色[6]。
喺15世紀,當啲人開始流行用人類既名嚟命名熟悉既物種既時候,呢種雀,俾人叫做紅胸知更雀(robin redbreast),最終簡稱做知更雀(robin )[7]。
作為一個名,羅賓(Robin)最初係羅拔(Robert)呢個名既小名(Diminutive)。知更雀(robin)呢一詞亦都適用喺有紅色或者橙色胸部既其他科既雀仔。其中包括學名叫做Turdus migratorius 既美洲知更雀(American robin)同埋鴝鶲科(學名:Petroicidae)既澳洲知更雀(Australasian robin),呢幾種雀仔之間既關係依家仲唔係太清楚。
呢種雀仔既其他比較古老既英文名包括 ruddock 同 robinet。喺19世紀尾既美國文學嗰度,呢種知更雀通常俾作者叫佢哋做英國知更雀(English robin)[8]。
至於點解係中文既世界,「羅賓雀」之所以俾人叫做「知更雀」係因為呢種雀既生活習性。其他雀會喺黃昏既時候飛返去雀巢,過程中會叫得好大聲,然後就唔出聲。不過知更雀既習性就好唔同,佢有啲似貓頭鷹同埋杜鵑,會夜啼。同貓頭鷹既叫聲(唔同貓頭鷹叫聲差異好大,不過都係唔太好聽,夜晚聽到會覺得恐怖)好唔同,更知雀既叫聲好好聽,因為夜晚知更雀既叫聲好似更夫咁,到咗第二日,日出既時候,知更雀亦都會好似雞啼咁,一早就叫,好似同人講「五更」到啦,就好似宋朝張耒既《福昌官舍》講既「五更春鳥滿山啼」咁樣,所以佢哋就有更知雀呢個中文譯名。不過有研究發現,夜晚既人工照明會影響歐洲雀仔每朝早同埋黃昏歌唱既時間[9]。
喺1758 年,Carl Linnaeus 喺佢既《自然系統》(Systema Naturae)第10版嗰度用「二名法」(binomial)名稱 Motacilla rubecula 嚟描述歐洲知更雀[10]。 佢既種本名(specific epithet)叫做 rubecula,係源自拉丁文 ruber 既一個小名(diminutive),意思係「紅色」[11][12]。 Erithacus 屬係由法國生物學家 Georges Cuvier 喺1800年第一次用,佢俾咗歐洲知更雀依家呢個「二名法」(binomial)名稱 E. rubecula[13][14]。 Erithacus 屬個名嚟自古希臘文[15],指既係一種唔知道叫乜名既雀仔,依家呢種雀仔通常叫做知更雀[16]。
知更雀屬,以前包括日本知更雀同埋琉球知更雀。不過,DNA分析研究發現,呢兩種東亞品種,更似其他亞洲品種,而唔係歐洲知更雀[17][18]。 喺屬既重組既時候,日本知更鳥同琉球知更鳥被歸類做 Larvivora 屬,令到歐洲知更鳥成為 Erithacus 屬既唯一成員[19]。 親緣關係學分析結果,將 Erithacus 放喺 Erithacinae 亞科嗰度,之前呢個亞科只有非洲品種,但係佢哋相對於其他屬既確切位置依家仲未確實知道[18]。
Erithacus 屬以前係歸類做 Turdidae 科(Family),但係依家認為佢哋係屬於舊世界鶲科(Muscicapidae),特別係 chats (Saxicolinae 亞科),呢個亞科仲包括咗普通夜鶯(common nightingale)[20]。
喺廣闊既歐亞大陸範圍裡面,知更雀都有啲啲唔同,但係呢啲唔同,唔足以形成可以睇成新亞種既離散族群(discrete populations)[21][22]。知更雀既亞種,主要特徵係喺島嶼同山區,形成常住族群(resident populations)。喺不列顛群島同西歐大部分地區發現既知更雀係 Erithacus rubecula melophilus,喺鄰近地區以流浪遊民既形式出現。 嚟自非洲西北部、歌斯嘉(歌斯嘉文:Corsica;法文:Corse)島,同埋薩丁島(意大利文:Sardegna)既 E. r. witherbyi 同 melophilus 好似,但喺呢啲雀仔既翼短啲[23]。 最東北部既雀,體型比較大,顏色比較暗淡,叫做 E. r. tataricus。 喺佢哋活動範圍既東南部,烏克蘭克里米亞半島(英文:Crimean Peninsula)既 E. r. valens、高加索地區(英文:Caucasus)同外高加索(英文:Transcaucasia)既 E. r. caucasicus、向東南入到伊朗既 E. r. hyrcanus,呢啲通常都被認為係顯著唔同既亞種[23]。
喺馬德拉島(葡文:Madeira)同亞速爾群島(Azores),俾人認為係 E. r. microrhynchos 既當地雀仔,雖然形態上分別唔太明顯,但係佢哋同其他知更雀既隔絕,似乎表明咗佢哋係亞種既講法係成立既[24]。
最獨特既雀仔係大加那利島既 E. r. marionae,同聽那臘飛島(西班牙文:Tenerife)既 E. r. superbus,佢哋可以睇成兩個唔同既物種或者至少兩個唔同既亞種。 佢哋好容易通過白色既眼環(eye-ring)、顏色鮮豔既胸部、將橙紅色同棕色分開既灰線,同埋完全白色既腹部嚟區分佢哋[25][26]。
從細胞色素(Cytochrome)b 序列既數據同佢哋既聲紋表明[27],大加那利島(西班牙文:Gran Canaria)/聽那臘飛島既知更雀確實好獨特,可能源自於大約200萬年前大陸鳥類既殖民[28]。
Christian Dietzen、Hans-Hinrich Witt 同 Michael Wink 喺2003年既《鳥類科學》(Avian Science)期刊嗰度發表咗佢哋既研究報告,題目係「透過粒線體DNA序列數據同形態計量學揭示了加那利群島(Canary Islands)上既歐洲知更雀 Erithacus rubecula 既親緣地理學區別:大加那利島新知更鳥分類群既證據」[29]。佢哋既報告得出既結論係,大加那利島既知更雀喺基因上同其歐洲近親既分化早喺230萬年前已經發生咗,而聽那臘飛島既知更雀又花咗50萬年(即係180萬年前)先至實現咗呢一個變化。最可能既原因係呢種雀對加那利群島既唔同殖民,佢哋首先到達最古老既島嶼(大加那利島),然後到達鄰近既島嶼(聽那臘飛島)[30]。
對 marionae(大加那利島既雀仔)同 superbus(聽那臘飛島既雀仔)之間既徹底比較仲未確認,前者實際上係唔同既亞種。初步結果表明,大加那利島既雀仔翅膀比聽那臘飛島既雀仔短咗大約 10%[29] 。加那利群島西部既群體較為年輕(中更新世),喺基因上先至開始出現分化。嚟自加那利群島西部既知更雀:El Hierro、La Palma 同 La Gomera(E. r. microrhynchus)同埋歐洲型亞種(E. r. rubecula)相似[23]。
最後,喺富埃特文圖拉島(西班牙文:Fuerteventura)發現既知更雀係歐洲知更雀,呢點唔奇怪,因為嗰啲物種唔喺島上或者附近既蘭薩羅特島(西班牙文:Lanzarote)繁殖;佢哋係越冬既雀仔,或者只係喺非洲同歐洲之間漫長既遷徙過程中經過呢度[30]。
體型比較大既美洲知更雀(Turdus migratorius)係一種體型比歐洲知更雀大好多既雀仔,因為佢哋既顏色同歐洲知更雀相似所以亦都叫做知更雀,但係呢兩種雀仔既親緣關係並唔密切,美洲知更鳥同普通黑鶇(學名:Turdus merula;英文:Common blackbird)屬於同一屬,呢個物種既分佈範圍同歐洲知更雀大致相同。 歐洲知更鳥同美洲知更鳥既相似既地方,主要係喺兩個物種身上都有橘色既胸部。喺電影《歡樂滿人間》(Mary Poppins),瑪麗唱「一匙糖」(Spoonful of Sugar)既片段「……唱隻知更雀喺好忙咁築巢既時候,都一路做嘢,一路唱首快樂既歌……」(… A robin feathering his nest …)既時候用錯咗雀仔,落喺瑪麗手指上既知更鳥,用既係美洲知更雀(Turdus migratorius),而唔係英國知更雀(Erithacus rubecula)[31] ;呢種美國物種喺英國好罕見[32]。
一啲南美洲同中美洲鶇屬(學名:Turdus)亦都俾人叫做知更雀,例如中美鶇/紅領鶇(rufous-collared thrush)。澳洲「紅胸知更鳥」,更準確既名係猩紅色知更鳥(英文:scarlet robin;學名:Petroica multicolor),佢同烏鴉、松鴉(jays)既關係比同歐洲知更雀既關係更加密切。 佢屬於 Petroicidae 科,通常俾人叫做「澳大利亞知更雀」。 紅嘴相思(Leiothrix utea)有時俾啲養雀既人叫做「北京知更雀」(Pekin robin)。另一群舊世界鶲科,呢次講既係嚟自非洲同亞洲,係鵲鴝(Copsychus)屬,佢既成員俾人叫做喜鵲知更雀(magpie-robins),其中既東方喜鵲知更雀(C. saularis)係孟加拉既國鳥[33]。
成年既歐洲知更雀,大約長12.5~14.0公分(4.9~5.5英吋),重16~22克(0.56~0.78安士),翼展20~22公分(8–8.5 英吋)。 雄性同雌性既歐洲知更雀都有相似既羽毛:橙色既胸部同臉部(相似既英國亞種 E. r. melophilus,顏色較濃),頸部同胸部兩側有藍灰色既線。 英國知更雀既上半身呈棕色,或者橄欖色,有白色腹部、棕色腳。咀同眼睛都係黑色既。年幼既知更雀有棕色同白色斑點,隨住佢長大,會逐漸出現橙色斑點[34]。
知更雀分佈喺歐亞大陸,東至西西伯利亞(Western Siberia),南至阿爾及利亞(葡文:Açores;英文:Algeria),西至亞速爾群島(Azores )同馬德拉群島(葡文:Madeira)既大西洋島嶼。 佢哋係冰島既遊民(vagrant)。喺東南方向,佢哋可以到達伊朗既高加索山脈(Caucasus )[35] 。愛爾蘭同英國既知更雀主要係本地常駐既留鳥,但係亦都有一小部分(通常係雌性)會喺冬季既時候,遷移到南歐,少數甚至會橫渡英倫海峽,最遠甚至可以去到西班牙。斯堪的納維亞(英文:Scandinavian;瑞典文:Skandinavien)同俄羅斯既知更雀遷移到英國同西歐去躲避嚴寒既冬天。呢啲候鳥可以透過佢身體上臉既灰色色調同暗橙色既胸部嚟識別。冬天遷徙既歐洲大陸知更雀比較鍾意北歐既雲杉樹林,呢點同英國知更雀鍾意公園同花園形成鮮明既對比[36]。
喺伊比利(Iberia,又叫做西班牙半島)南部,常駐知更雀同遷徙知更雀出現咗棲地分隔(habitat segregation,又翻譯做棲距、住離、棲地分離、棲地隔離[37],或者棲息地隔離),常駐知更雀仍然留喺佢哋繁殖既同一片林地嗰度[38]。
十九世紀下半葉,將歐洲知更雀引入去澳洲同紐西蘭既嘗試並唔成功。當地既各個馴化協會(acclimatisation societies)喺墨爾本、奧克蘭、基督城、威靈頓同但尼丁既周圍放生咗啲知更雀,但係無一個地方既雀仔成功繁殖落去。北美既嘗試都得到類似既結果,1852年喺紐約長島、1889-1892年間喺俄勒岡州、1908-1910年間喺BC省既 Saanich 半島都試過引入知更雀,不過都唔成功[39]。
知更雀係日頭活動既雀仔,但係有報道話佢哋會喺月夜或者喺夜晚去有人造光源既地方活躍咁捕食昆蟲[40]。英國同愛爾蘭園丁都知道,知更雀相對唔怕人,而且鍾意喺人類喺花園或者農地掘泥既時候,喺嗰度揾蚯蚓同埋其他新鮮食物。知更雀被認為係園丁既朋友, 出於紅胸知更雀同基督之血(blood of Christ)之間既傳統聯繫[41],啲人唔會傷害知更雀。 另一方面,喺歐洲大陸,知更雀同大多數其他細雀一樣,會俾其他生物獵殺,所以警覺性比英國同愛爾蘭既知更雀高[42]。 知更雀亦會接近大型既野生動物,例如野豬,原因係呢啲野生動物會掘地,所以知更雀就喺度等佢哋掘出地面既食物,睇吓有無啱食既。
喺秋季同冬季,知更雀喺食陸生無脊椎動物(terrestrial invertebrates),例如蜘蛛、蟲仔同昆蟲既同時,亦會食啲漿果同水果嚟補充下[36]。佢哋亦會啲人放喺雀仔餵食器上面既混合種子(seed mixtures)同板油(suet)[34][43]。
雄性知更雀出名會用攻擊性既行為去保護自己既地盤,佢哋會好猛烈咁去攻擊其他雄性同誤入地盤既競爭者。亦有人觀察到知更雀會係對方無明顯挑釁既情況之下攻擊其他細雀,亦都有人觀察到知更雀有時會攻擊自己既影[44]。 知更雀爭地盤有時會導致死亡,喺有啲地方,因為爭地盤打交死既數目,佔成年知更雀死亡既數目,高達10%[45]。
由於知更雀出世既第一年,死亡率好高,知更雀既平均壽命只有1.1年;但係,一旦過咗第一年,預期壽命就會增加好多,有記錄最長壽既知更雀係年滿19歲[46]。 但係,冬天一段時間既極低氣溫可能會導致更高既死亡率[47]。 黑水雞蚤(英文:moorhen flea,學名:Dasypsyllus gallinulae)同埋 acanthocephalan Apororhynchus silesiacus(一種個口有鈎刺頭既小型寄生蟲)會寄生喺知更雀既身上同埋肚裏面[48]。
知更雀會選擇各種各樣既地方嚟築巢。事實上,佢哋唔揀擇,任何可以提供庇護既嘢,例如窿窿罅罅,佢哋都會考慮。除咗常見既窿窿罅罅或者係有遮蔽既岸邊之外,其他嘢,包括廢棄既車胎、機械部件、燒烤架、掃帚刷頭上面、鞋盒、水壺、水盤、水桶、花盆、帽。知更雀亦都會喺人造既雀巢箱裏面築巢,佢哋鍾意前面開放既設計,放置喺離地大約2公尺(6 英尺半)左右,有遮蔽既位置[49]。知更雀一般會用苔蘚、樹葉同草整佢哋既竇,裡面會用細草、毛髮同羽毛[50]。
喺英國同愛爾蘭,整個繁殖季節係由三月開始,一般會生兩、三竇蛋,每竇五到六隻蛋,每隻蛋既長度大約2厘米多啲。知更雀蛋係奶油色、淺黃色或者白色,帶有紅棕色斑點,通常喺比較大既嗰邊顏色會比較深[51] 。當幼鳥喺雀巢裏面飛出嚟既時候,佢哋全身既顏色係有斑紋既棕色。離開雀巢既兩到三個月之後,幼雀既下巴下面會長出一啲橙色既羽毛,然後呢塊橙色羽毛會逐漸延伸,一直到好似成年雀仔咁既完全橙紅色心口[50]。
知更雀喺繁殖季節會發出一陣陣鳴叫既 叫聲 (幫手·有關)。 公同乸既知更雀喺冬天都會唱歌,當佢哋霸咗唔同既地盤既時候,啲歌聲聽起嚟比夏天既時候哀傷一啲[34]。知更雀乸喺夏季築巢既地方,搬一段小距離,到附近比較適合冬天揾嘢食既地方。知更雀公,全年保持喺同一個地盤。喺繁殖季節,知更雀公通常會喺黎明日出前一個鐘頭開始唱歌;通常喺日落之後半個鐘頭左右停唱[52] 。夜晚唱歌亦可能會發生,特別係喺有夜間人工照明既城市地區。一啲城市知更鳥會選擇喺夜晚唱歌,避免日頭啲歌聲俾人為噪音冚咗[53]。
生物學家對知更雀既鳥類磁羅盤(avian magnetic compass)已經有相當廣泛既研究,亦都用過基於視覺既磁感(vision-based magnetoreception),當中發現知更雀感知地球磁場用嚟做導航既能力會受到進入雀仔眼睛既光線影響。知更雀磁感既物理機制涉及鳥仔眼睛既隱花色素(cryptochrome)裏面既電子自旋(electron spins)既量子糾纏(quantum entanglement)[54][55]。
人類一直對雀仔可以喺天空飛翔,而能夠精準咁判斷到方向既機制感到興趣。而候鳥更加需要精準咁飛到佢哋想要遷徙去既地方。呢個問題一直吸引咗科學家去研究,但係無一個古典物理學既模型可以解釋到候鳥既導航行為。隨住近年量子力學既快速發展,科學家開始嘗試用量子力學嚟到解釋一啲古典物理無辦法解釋既現象,當中既一個領域就係量子生物學(英文:quantum biology)。候鳥既導航行為喺量子力學模型之下,有一個比較成功既研究結果,亦都令到呢個領域成為量子生物學既一個重要既研究課題。而呢個課題既一個比較廣泛俾人接受同埋使用既模型,就係「自由基對模型」(radical pair model)。係呢個模型嗰度,「量子糾纏」(quantum entanglement)係一個重要既物理量,係探討兩個物體之間既量子關聯性(喺呢個模型裏頭,係兩粒電子之間既量子關聯性)[54][55][56]。
歐洲知更雀分佈範圍好廣泛,估計數量達到幾億隻,所以歐洲知更雀呢個物種未達到族群趨勢標準(population trend criterion)既脆弱閾值(vulnerable thresholds),即係十年或者三代之內下降超過30%[57];而且數量似乎喺度增加緊。國際自然保護聯盟(International Union for Conservation of Nature )將歐洲知更雀評估做唔需要關注既問題(least concern)[35]。
知更雀喺英國同法國西北部既民間傳說之中,佔有重要既地位,但係喺歐洲其他地區就唔係咁多關於知更雀既民間傳說[58]。知更雀俾人認為係一種暴風雲鳥(storm-cloud bird),係北歐神話裏面雷神(Thor)既聖物[59]。喺《林中寶貝》(Babes in the Wood),呢個最早喺1595年發表既英國傳統兒童故事嗰度,知更雀係主角,個古仔講兩個俾人遺棄喺樹林既細路仔,佢哋死咗之後,知更雀用樹葉冚住佢哋既屍體[60]。
知更雀同聖誕節亦都有著密切既聯繫,自從19世紀中葉以嚟,佢係好多聖誕賀卡上面都扮演著一定既主角[60]。知更雀出現喺好多聖誕郵票上面[61]。英國同知更雀有關既民間傳說特別多,呢啲古老既英國民間故事都嘗試去解釋點解知更雀既心口有獨特既橙紅色[62]: 按照古老既基督教傳統,耶穌出生之後無幾耐,知更雀就嚟到馬厩,當約瑟夫喺度收集木材既時候,佢哋唔想啲火熄咗,所以用翼幫手撥風,令啲火保持燃燒。聖母瑪利亞賜膩佢哋火熱既心口,作為獎勵[62];英國亦有傳說話,當耶穌俾人釘喺十字架上面既時候,有隻棕色既知更雀飛到佢身邊,喺佢既耳仔邊唱歌,去安慰耶穌,降低佢既痛苦。佢傷口上面既血,染紅咗知更雀既心口,從此以後,所有知更雀身上都帶有基督血既印記[59][63]。
喺古老既英國宗教嗰度,夏天既橡樹之王(Oak King of summer),即係鷦鷯(wren),喺冬至(winter solstice)嗰日俾冬季既冬青之王(Holly King of winter),即係知更雀,殺死咗;夏至(summer solstice)嗰日,冬青王報仇,呢場戰鬥象徵住最長既夜晚同最長既日頭[62]。冬青王同鷦鷯雀,亦都象徵住舊既一年,同埋太陽日照既時間越嚟越短;而橡樹王同知更雀,就象徵住新既一年,同埋太陽日照既時間越嚟越長[64]。
另一個傳說係,佢既胸部喺煉獄(Purgatory)嗰度,幫靈魂攞水既時候,俾火燒焦既[60] 。知更雀同聖誕節既聯繫更可能係源自於維多利亞時代英國既郵差會著住紅色薄褸(red jackets),所以佢哋既暱稱係「羅賓斯」(Robins);聖誕卡上面既知更雀係郵差遞送賀卡既象徵[65]。
1960年代,喺《泰晤士報》公佈既一次投票之中,知更雀被採納做英國既非官方國鳥[66]。 到咗2015年,喺觀鳥者 David Lindo 組織既一個民意調查之中,知更鳥再一次俾人選做英國既國鳥,最終得票率係34%[67]。
一啲英格蘭同威爾斯既體育組織會俾人暱稱做「羅賓斯」。呢個暱稱通常用喺主場顏色主要用紅色既球隊。其中包括布里斯托城足球會(Bristol City)、克魯亞歷山德拉足球會(Crewe Alexandra)、史雲頓足球會(Swindon Town)、車頓咸足球會(Cheltenham Town)呢啲職業足球會。而布里斯托城足球會、史雲頓足球會、車頓咸足球會亦都喺佢哋既徽章設計嗰度融入咗知更鳥圖像[68]。 車頓咸足球會叫佢哋14歲以下既小球迷做「小知更雀」(Young Robins),仲提供特別優惠既季票俾佢哋[69]。傳統上,域斯咸足球會(Wrexham Football Club)同埋英國橄欖球聯盟球隊 Hull Kingston Rovers(佢哋既主場顏色係白色,帶有紅色條紋)[70] 。細雀仔係一個唔尋常既選擇,雖然佢哋俾人認為係象徵著啲球員能夠喺球場上面敏捷咁「飛翔」[71]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.