理民府
From Wikipedia, the free encyclopedia
理民府(District Office)係英國接收香港新界之後,管理新界嘅部門。理民府阿頭係理民府官,向新界政務司負責。理民府官1974年10月之前叫理民府長官,二次大戰前叫大人。
理民府職責範圍好廣泛,基本可以講係乜都包。土地註冊及買賣登記、收地賠償、排解糾紛、審裁小額錢債案件、處理地政事宜、委任諮議員、向上級反映新界人利益訴求以及代表鄉民向上級爭取利益、解釋香港政府施政計劃並爭取支持、統籌各政府部門響新界工作、蒐集政治情報、控制僭建房屋、鼓勵及協助地方發展(包括各種建設地方工程)、協助發展教育、組織各因緊急事故而來嘅救災工作、處理社會福利事宜、主持同駐港英軍嘅聯絡工作。
另外,戰後重光前,理民府亦附設有郵政局,幾乎新界嘅大小事務都喺佢管轄範圍。
理民府最後嘅分界,成為日後區議會分界藍本。