海洋生物

海洋生物（粵拼：hoi2 joeng4 sang1 mat6）泛指主要住喺海入面或者海邊嘅生物。到咗廿一世紀初，海都仲係有好多人類未探索過嘅地方，所以原則上有好多海洋生物物種都係人類未發現嘅。不過就算係噉，齋睇已知嘅物種嘅話，已經睇得出有好多門同綱嘅生物都物種係住喺海裏面嘅。例如淨係睇脊椎動物，無論係魚、哺乳類（例如鯨魚）、雀鳥（例如企鵝）、爬蟲類（例如海龜）都有成員係住喺海入面或者海邊嘅^{[註 1][1][2]}。

魚

内文：鹹水魚

魚當中有大約 60% 嘅物種係住喺鹹水入面嘅（鹹水魚），而直至 2016 年為止，已知有成超過 20,000 個物種嘅魚係住喺海裏面嘅，第啲脊椎動物嘅綱（爬蟲類等）加埋都冇魚咁多屬海洋生物嘅成員^[3]。海魚好多變：包括咗好似三文魚同吞拿魚等組成糧食重要部份嘅魚；亦都有好似小丑魚等因為外形俾人覺得好睇而常見於水族館嘅魚，當中小丑魚仲受歡迎到做埋電影嘅主角^[4]。

海魚仲包括埋好似鯊魚等大型嘅魚。有好多物種嘅鯊魚都係大條又兇猛嘅獵食者；例如大白鯊噉，一條成年嘅大白鯊閒閒哋去到 4.5 米長，大條嘅乸仲可以去到成 6 米咁長，去親乜嘢環境都會成為嗰度嘅頂級獵食者（apex predator；喺食物鏈最高級位置嘅物種）。而喺廿一世紀初，鯨鯊係世上最大條嘅魚（好似鯨魚噉嘅鯊魚）－根據紀錄，已知最大條嘅鯨鯊有成 18.8 米咁長，佢哋嘅巨型身體令到獵食者難以獵殺佢哋，亦令到鯨鯊呢個物種冇天敵^[5]。

2017 年菲律賓一地新鮮捉到嘅吞拿魚 2017 年菲律賓一地新鮮捉到嘅吞拿魚  2019 年响葡萄牙影到嘅一條魔鬼魚 2019 年响葡萄牙影到嘅一條魔鬼魚  2007 年一間水族館入面嘅一條鯨鯊 2007 年一間水族館入面嘅一條鯨鯊

2014 年影到嘅一條大白鯊 2014 年影到嘅一條大白鯊  廿一世紀初有潛水員喺印尼影到嘅一條魔鬼魚 廿一世紀初有潛水員喺印尼影到嘅一條魔鬼魚  一位潛水員同一條鯨鯊一齊游水嘅片，2011 年； 鯨鯊食浮游生物，而且出名溫馴，對人類無害。 一位潛水員同一條鯨鯊一齊游水嘅片，2011 年； 鯨鯊食浮游生物，而且出名溫馴，對人類無害。

爬蟲類

内文：海洋爬蟲類

有好多爬蟲類都係住喺海入面或者海邊，又或者係最少會花好多時間喺海入面活動，當中比較出名嘅有海龜、灣鱷同海蛇呀噉。值得留意嘅係，海洋爬蟲類雖然游水冇問題，但多數都需要返上陸地嗰度生蛋，所以通常都會住喺比較近陸地同淺水嘅海域，好少可會出到去遠洋帶嗰度；例如係海龜噉，海龜就出嗮名啲乸喺交配過後會爬上沙灘嗰度喺沙入面掘窿生蛋，而啲海龜仔出咗世之後就會成大羣噉一路嘗試避開想獵食佢哋嘅海鳥一路爬返入去海度，形成一個吸引好多人睇嘅奇觀^[6]。

2019 年一地影到嘅沙灘上面嘅一隻海龜仔 2019 年一地影到嘅沙灘上面嘅一隻海龜仔  2007 年澳洲一個沙灘上面嘅一條灣鱷。 2007 年澳洲一個沙灘上面嘅一條灣鱷。  2008 年一地沙灘嗰度影到嘅一條海蛇 2008 年一地沙灘嗰度影到嘅一條海蛇

2020 年影到嘅一隻喺度搵嘢食嘅海龜 2020 年影到嘅一隻喺度搵嘢食嘅海龜  2012 年影到一條灣鱷由水面跳出嚟 2012 年影到一條灣鱷由水面跳出嚟

雀鳥

内文：海鳥

海鳥泛指住喺海入面或者海邊嘅雀鳥，比較出名嘅例子有海鷗、信天翁同企鵝呀噉。海鳥好多時都係靠食魚嚟維生，例如企鵝就出嗮名游水叻，雖然佢哋喺陸地上唔係咁快，但喺水入面就能夠做到以每個鐘 36 km 咁快嘅速度嚟游，用呢種速度嚟捉魚食或者避開獵食者，而且仲能夠喺冇任何嘢幫助嘅情況下潛水潛到去成 170 至 200 米咁深嘅水嗰度^[7]。原則上，海鳥淨係包括一啲會大部份時間喺海入面或者海邊活動嘅雀鳥，但有啲俾人當係海鳥嘅雀鳥有陣都時會飛去內陸啲嘅地方，可以去到離海邊幾千哩咁遠，例如海鷗就係噉。

2010 年影到嘅一隻海鷗 2010 年影到嘅一隻海鷗  2003 年影到、喺海面上面飛嚟飛去搵魚捉嘅信天翁 2003 年影到、喺海面上面飛嚟飛去搵魚捉嘅信天翁  2013 喺南極影到嘅一羣帝王企鵝 2013 喺南極影到嘅一羣帝王企鵝

2008 年影到、一隻啱啱出世冇耐嘅信天翁 2008 年影到、一隻啱啱出世冇耐嘅信天翁  2012 年喺南極影到嘅一隻企鵝 2012 年喺南極影到嘅一隻企鵝

哺乳類

内文：海洋哺乳類

海洋入面嘅哺乳類動物包括咗鯨魚^{[註 2]}、海牛、鰭足目（包括海獅、海豹、海象）、海獺同埋北極熊呀噉。呢啲動物當中有啲係完全靠個海生活咁滯嘅，例如鯨魚就係噉，一上咗陸地會死得好快；有啲海洋哺乳類就係多數時間住喺水入面，但會上岸做某啲重要嘅生命活動，例如海獅身體結構明顯啱游水多過喺陸地上面行，但佢哋會上陸地嗰度交配；另一方面，海獺同北極熊嘅身體結構明顯適合喺陸地上面活動（有發達嘅髀），會花相當多嘅時間喺陸地上面活動，但喺有必要（例如要獵食喺水入面嘅獵物）嗰陣會落水^[8]。

值得留意嘅係，海洋哺乳類進化到好識汆水：哺乳類動物實係用肺嚟唞氣嘅，唔似得魚噉可以用鰓直接由水嗰度攞氧，呢點就連海洋哺乳類都唔例外，所以就算係好似鯨魚呢啲靠水生存嘅海洋哺乳類都好，都梗要每隔一段時間就返上去水面嗰度唞吓氣；不過呢啲動物物種當中有啲就進化到極之擅長閉氣同潛水，例如抹香鯨喺呢點上就好出名－抹香鯨喺水面唞咗一吓氣之後，就能夠連續噉喺水底嗰度活動一路閉氣閉成兩個鐘頭咁耐^[9]。

2013 年影到嘅一條抹香鯨乸同佢隻仔 2013 年影到嘅一條抹香鯨乸同佢隻仔  2008 年影到嘅一隻海牛 2008 年影到嘅一隻海牛  2004 年影到嘅一隻海象公 2004 年影到嘅一隻海象公

2016 年影到嘅一隻海獺 2016 年影到嘅一隻海獺  一隻潛緊水嘅北極熊 一隻潛緊水嘅北極熊

無脊椎動物

睇埋：刺胞動物、軟體動物、甲殼動物同海綿動物

除咗脊椎動物之外，有好多個門同綱嘅無脊椎動物都有成員係住喺海入面或者海邊嘅，甚至乎係成個門或者綱嘅物種都係以海洋生物為主嘅。出名嘅海洋無脊椎動物有櫛水母、白蚱同海葵等嘅刺胞動物、軟體動物（包括魷魚同八爪魚等嘅頭足綱動物）、節肢動物（包括蟹同龍蝦等嘅甲殼動物）同埋海綿動物呀噉；當中海綿動物就出名在歷史久遠得好交關－對化石做嘅研究顯示，海綿動物早喺 5 億 4,100 萬年（寒武紀）甚至更早之前嘅時代經已存在^[10]。

海洋無脊椎動物相當多樣化：有啲海洋無脊椎動物極之簡單，「原始」到連腦都冇，例如白蚱噉就冇腦，而且全身得嗰 5,600 粒神經細胞左右（相比之下，人腦有成 8.6 × 10¹⁰ 粒神經細胞咁多）^[11]；另一方面，八爪魚都係無脊椎動物，但全身就有成 5 億粒神經細胞，出咗名喺動物之中智能高，曉用架生，而且仲試過有水族館養嘅八爪魚能夠呃到水族館嘅工作人員並且逃離水族館^[12]。

白蚱係種簡單嘅動物，連腦都冇。 白蚱係種簡單嘅動物，連腦都冇。  蜆係一種軟體動物。 蜆係一種軟體動物。  2014 年影到嘅一隻藍環八爪魚 2014 年影到嘅一隻藍環八爪魚

2009 年影到嘅一隻龍蝦 2009 年影到嘅一隻龍蝦  2002 年喺加州對開、超過 2,500 米深嘅海 嗰度影到嘅一嚿海綿 2002 年喺加州對開、超過 2,500 米深嘅海 嗰度影到嘅一嚿海綿

註釋

1. 兩棲類係個少有嘅例外：佢哋啲皮膚有高滲透性，容易俾水或者鹽通過；佢哋一浸入鹹水，身體就會勁俾鹽入侵；跟住就會造成體內鹽嘅濃度高得滯，搞到佢哋體內嘅化學過程失衡引致死亡；所以絕大多數嘅兩棲類都頂唔順鹹水。
2. 順帶一提，喺生物分類上，海豚係鯨魚嘅一種。

引述

1. Hopkins Gareth R.; Brodie Edmund D. Jr (2015). "Occurrence of Amphibians in Saline Habitats: A Review and Evolutionary Perspective". Herpetological Monographs. 29 (1): 1-27.
2. Can Amphibians Live In Salt Water?.
3. https://oceana.org/marine-life/ocean-fishes
4. Moyle, P. B.; Leidy, R. A. (1992). Fiedler, P. L.; Jain, S. A. Jain (ed.). Loss of biodiversity in aquatic ecosystems: Evidence from fish faunas. Conservation Biology: the theory and practice of nature conservation, preservation, and management. Chapman and Hall. pp. 128-169.
5. McClain C.R., Balk M.A., Benfield M.C., Branch T.A., Chen C., Cosgrove J., Dove A.D.M., Gaskins L.C., Helm R.R., Hochberg F.G., Lee F.B., Marshall A., McMurray S.E., Schanche C., Stone S.N., Thaler A.D. (2015). "Sizing ocean giants: patterns of intraspecific size variation in marine megafauna". PeerJ 3:e715
6. Rasmussen, Arne Redsted; Murphy, John C.; Ompi, Medy; Gibbons, J. Whitfield; Uetz, Peter (2011-11-08). "Marine Reptiles". PLOS ONE. 6 (11): e27373.
7. Gentoo penguin. Encyclopedia Britannica.
8. Kaschner, K.; Tittensor, D. P.; Ready, J.; Gerrodette, T.; Worm, B. (2011). "Current and Future Patterns of Global Marine Mammal Biodiversity". PLOS ONE. 6 (5): e19653.
9. Dunham, Will (26 March 2014). "How low can you go? This whale is the champion of deep diving". Reuters - via www.reuters.com.
10. Sperling E.A., Robinson J.M., Pisani D., Peterson K.J. (January 2010). "Where's the glass? Biomarkers, molecular clocks, and microRNAs suggest a 200-Myr missing Precambrian fossil record of siliceous sponge spicules". Geobiology. 8 (1): 24–36.
11. Bode, H.; Berking, S.; David, C. N.; Gierer, A.; Schaller, H.; Trenkner, E. (1973). "Quantitative analysis of cell types during growth and morphogenesis in Hydra". Wilhelm Roux Archiv für Entwicklungsmechanik der Organismen. 171 (4): 269–285.
12. Chudler, Eric H. "Brain Facts and Figures". Neuroscience for Kids.