由沙士病毒2型引發嘅傳染病 From Wikipedia, the free encyclopedia
武漢肺炎(粵拼:mou5 hon3 fai3 jim4,英文:Wuhan Pneumonia)(世界衞生組織奉為標準嘅名係2019冠狀病毒病[英文:COVID-19]),係由沙士病毒2型(俗稱武漢冠狀病毒)引發嘅傳染病,係非典型肺炎嘅一種。2019年,隻病首次爆發嘅地點係中國湖北武漢——事件叫做武漢肺炎大爆發。[1]
維基百科嘅醫學類文章只係提供參考,並唔係醫療意見。 閣下如果有任何關於健康嘅問題,請諮詢專業醫護人員。 |
呢篇文記述緊一項時人時事。 內容會隨住件事發展而變動或者更新。 |
武漢肺炎 | |
---|---|
分類同外部資源 |
「武漢肺炎」(亦簡稱武肺)曾經係呢一隻病喺粵語圈嘅通用稱呼,喺世界衛生組織定出標準名之前,英文傳媒就興用Wuhan Coronavirus(中文:武漢冠狀病毒)同Wuhan Virus(中文:武漢病毒)等詞[2][3][4][5];而喺出標準名之前嘅台灣,唔單止民間,就連政府部分部門,都依然沿用「武漢肺炎」呢個名[6],香港官方將呢隻病叫嚴重新型傳染性病原體呼吸系統病[7],亦有用內地新型冠狀病毒感染肺炎[8];而香港坊間有啲人會叫武漢急性呼吸綜合症[9](英文:Wuhan Acute Respiratory Syndrome,簡稱WARS[10])。中國香港媒體早期叫不明原因肺炎[11]。中國大陸官方早期叫新型冠狀病毒感染肺炎(簡稱新型肺炎),之後改叫新型冠狀病毒肺炎(英文:Novel Coronavirus Pneumonia,簡稱新冠肺炎,英文簡稱NCP[未記出處或冇根據]);臺灣官方就叫嚴重特殊傳染性肺炎[12]亦用「武漢肺炎」[13]。
1月30號,世衞組織提議一個學術名2019-nCoV急性呼吸疾病(英文:2019-nCoV acute respiratory disease)[14],2月11號正式定名 2019冠狀病毒病(英文:Coronavirus Disease 2019,簡稱COVID-19)[15]。
3月17號,由於有為數唔少嘅中國網民散播武漢肺炎嘅源頭「由美軍傳播去中國」呢個謠言,美國總統當勞侵(Donald Trump)響社交網站Twitter出貼文將武漢肺炎病毒稱為「英文:Chinese Virus」(中文:中國病毒),並響記者會將呢個名再三提及。侵話講呢個名係因為呢個病毒來自中國,唔關種族歧視事。
據社交網路3月25號左右發覺,中國大陸當局開始咗大規模嘅刪啲寫往「武漢肺炎」嘅新聞嚟保障返自己,目的係話俾啲人聽咁樣係一種污名化,有冒犯性同極度唔負責任嘅行為。跟往環球時報英文網、新華網(英文)等就陸續將舊嘅報導入邊嘅「武漢肺炎」改成第二個名,或者直接鏟走咗個「武漢肺炎」[16][17]。與此同時,港澳政府都做類似嘅嘢;雖然依然有民主派傳媒唔聽政府枝笛而繼續用「武漢肺炎」,但係多數已經喺2021年由於政治打壓同失去民望(病毒命名並非主因)而執咗笠,不過有部份人都依然鐘意叫佢做「武漢肺炎」。
武漢肺炎嘅病原體係一隻新發現嘅冠狀病毒,由於係喺2019年發現,世界衞生組織暫時叫佢做「2019-nCoV」,意思係「2019新型冠狀病毒」。2020年2月11號,國際病毒分類委員會正式定名做「沙士病毒2型」(SARS-CoV-2)。
武漢肺炎病徵主要係發燒、無力、乾咳,病情嚴重嘅會呼吸困難,甚至死亡。可能感染呢個病嘅特有症状,就有喪失嗅覺,味覺減退[20]。
武漢肺炎主要係透過呼吸道飛沫傳播,亦可以通過接觸傳播[21],潛伏期介乎兩到十四日,最多去到26日。
暫時無藥專門醫治武漢肺炎,主要靠一啲抗病毒藥同埋支援性治療去紓緩病情。
除咗打武漢肺炎疫苗同保持社交距離之外,亦要靠保持個人衛生同埋避免近距離接觸病人。由於研究發現嗅覺喪失,都會係受感染嘅特徵之一,英國鼻科學會(British Rhinological Society)主席嘉莉兒霍普金斯(Claire Hopkins)教授,同耳鼻喉英國(ENT UK)主席尼瑪律·庫馬爾(Nirmal Kumar),就發表咗聯合聲明,敦促醫護治理失去嗅覺嘅病患時都要著防護裝備,仲建議唔好同任何人做不必要嘅鼻竇內窺鏡診療,因為病毒可以喺鼻腔同喉入邊複製,做檢查搞到病患咳或打乞嗤就弊傢伙[20]。
社交距離措施,包括檢疫、旅遊限制、停工停課等,旨在減低人同人之間嘅密切接觸,從而減低病毒傳播嘅風險。
呢隻病被全球普遍認為喺中國湖北武漢江漢區嘅華南海鮮批發市場首先爆發。
不過由一班大陸醫療專家聯名嘅論文,早喺1月24號就喺國際著名醫學雜誌《刺針》發表,披露咗由2019年12月16號至2020年1月2號喺武漢金銀潭醫院收治嘅首批41例確診病例分析同研究,顯示當中27例有去過華南海鮮市場,另外14例就冇。
由此研究認為新型冠狀病毒嘅起源地唔係海鮮市場,而且病毒出現嘅時間應早過2019年11月左右[22][23]。
亦有包括前白宮貿易顧問納瓦羅在內嘅人提出源頭可能源於中國武漢P4實驗室[24]。
泰國衛生部2020年2月2號有話搵到咗治愈方法,係喺曼谷一間醫院收治嘅70歲中國籍女病患度,混合咗抗愛滋病毒藥利托那韋同洛匹那韋、抗流感藥奧司他韋(oseltamivir)、達菲等幾種藥來到醫,藥後48個鐘入邊個病毒話係消失咗[25][26][27]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.