月餅
From Wikipedia, the free encyclopedia
月餅(粵拼:jyut6 beng2)係中秋節嘅重要嘢食,意謂團圓。
![Thumb image](http://upload.wikimedia.org/wikipedia/commons/thumb/1/19/Mooncake1.jpg/320px-Mooncake1.jpg)
![Thumb image](http://upload.wikimedia.org/wikipedia/commons/thumb/2/2b/Mooncake_with_double_yolk_and_lotus_seed_paste.jpg/640px-Mooncake_with_double_yolk_and_lotus_seed_paste.jpg)
![Thumb image](http://upload.wikimedia.org/wikipedia/commons/thumb/7/70/Mooncake_with_five_smashed_nuts.jpg/640px-Mooncake_with_five_smashed_nuts.jpg)
月餅起源,民間有唔同講法。一個講法係唐太宗八月十五出征突厥,凱旋而歸,得一圓餅。太宗大喜,指住個月笑住講:「應將胡餅邀蟾蜍」。之後就同文武百官一齊食,從此,就有中秋節食月餅嘅習俗。另一講法係唐明皇遊月宮時,食咗嫦娥款待嘅仙餅後,回宮命人製成。
據《洛中見聞》記載,唐僖宗曾經響中秋節叫御膳房用紅綾將餅賞賜新科進士,呢種紅綾將餅應該就係最先嘅月餅。
另外有傳說,元末人民反抗統治,月餅裏面夾紙條傳遞通風報信。
有文獻記載,月餅最早出現響南宋時候,之不過當時月餅同中秋節一啲關係都冇,只不過係一種蒸餅拎來賣咁。月餅真正同中秋節拉上關係喺明代。當時北京城內出現咗一種以果做餡嘅月餅。之後人人響中秋節呢一日自己整月餅,用來自用同送畀親朋戚友,以表達團圓祝賀之意。嗰陣時月餅大小同形狀個個都好唔同,差別好大,製作名堂多兼得意,好似有專供男人食嘅月牙月餅,只限女人食嘅葫蘆月餅,重有特別為細路仔準備嘅「孫悟空」、「兔兒爺」之類嘅月餅等,名目繁多,不一而足。到咗近代,月餅有人手亦用機器幫手整,品種亦日益豐富。