月食

月食（粵拼：jyut6 sik6；英文：lunar eclipse），用漢字寫又可以寫做月蝕，係一種天文現象。當地球（附圖入面嘅藍色波）咁啱行到太陽同月球嘅直綫上面，地球就會遮住射落月球嘅太陽光，即係地球個影（附圖入面嗰笪灰黑色區域）喺正月球上面，令月球睇起來好似畀個影「食」咗噉。

地球遮住咗太陽嘅直射光綫，導致月蝕出現。喺本影區，直射陽光全部俾地球遮晒，射唔到落月球，出現月全蝕；喺半影區，就只有部分陽光被遮擋，出現月偏蝕或半影月蝕。

類型

月球進入地球嘅本影區同埋半影區會產生唔同類型嘅月蝕

月食分三種，半影月食嗰時，個月亮睇起來會好似冇乜變化；月偏食嗰時，個月亮睇起來會好似食咗一忽咁；而月全食嗰時，成個月亮會暗咗，兼且望落紅紅哋。

由於地球嘅本影比月球大得多，咁就意味住喺月全食發生嗰時，月球會入晒地球嘅本影區內，所以絕對唔會出現「月環食」呢種現象。

月食過程

月全蝕（當地時間2003年11月8號喺美國密歇根州大急流市拍攝）

月全蝕過程動畫（當地時間2007年3月3號喺瑞士比拉赫拍攝）

1. 半影食始：月球啱啱同半影區接觸，呢個時候月球表面光度略為減少，但肉眼較難觀察。
2. 初虧（淨係月偏食同埋月全食）：月球由東緣進入地影嘅一刻，月球同地球本影第一次外切。
3. 食既（淨係月全食）：月球完全進入地球本影嘅一刻，並同本影第一次內切。
4. 食甚：月圓面中心同地球本影中心最接近嘅瞬間，呢個時候月球表面呈紅銅色或暗紅色（適用於月全蝕）。^[1]
5. 生光（淨係月全食）：月球開始離開地球本影嘅一刻，並同地球本影第二次內切。
6. 復圓（淨係月偏食同埋月全食）：月球完全離開地球本影，同地球本影第二次外切。
7. 半影食終：月球離開半影，成個月食過程正式完結。

• 月偏食冇食既、生光過程，蝕甚亦只係表示最接近地球陰影嘅時刻。
• 半影月食冇初虧、食既、生光、復圓，食甚亦只係表示最接近地球陰影嘅時刻。

時間

2007年3月3號，喺英格蘭嘅列斯望到嘅月全蝕過程。

相比起日食，月食發生嘅時間（月球由進入至走出地影）係好長，平均需要幾個鐘，各年月食嘅時刻喺大部分日曆上都有說明。月全食時間最長可長達1個鐘45分，日全食最長只得7分31秒。2011年6月16號嘅月全食階段達到1個鐘41分鐘。但係2003年11月8號嘅月全食整個階段只有25分鐘。

月食同科學研究

最早的月食記錄係前2283年美索不達米亞嘅記錄。殷商喺卜辭載「六日甲午夕，月有食」，「旬壬申系，月有食」，《詩經‧小雅》載有：「彼月而食，則維其常」，《小雅·十月之交》篇「彼月而微，此日而微」，微係指月食^[2]。《荀子‧天論》：「夫日月之有食，風雨之不時。」古代中國同非洲民間認為月食係「天狗吞月」，要敲鑼打鼓先可以趕走天狗。喺漢朝，張衡就已經發現月食嘅部份原理，佢認為係地球走到月亮嘅前面，將太陽光擋住，「當日之冲，光常不合者，蔽於地也，是謂暗虛，在星則星微，遇月則月食。」^[3]。前4世紀古希臘嘅亞里士多德根據月食望到嘅地球影子嘅圓形而推斷出地球係圓嘅。前3世紀古希臘嘅天文學家阿里斯塔克、前2世紀嘅希帕求斯都提出過用月食來測定太陽、地球、月亮嘅大細。

近代有人搞錯以為古代民間既然將日食叫做「天狗食日」，咁樣月食就順理成章，叫做「天狗食月」。其實中國古代「天狗」係月中凶神嘅名。古籍《協紀辨方》卷四引用《樞要曆》：「天狗者，月中凶神也。其日忌禱祀鬼神，祈求福願。」，同書又引用《曆例》：「天狗者，常居月建前二辰。」，因為「天狗」係「月神」，天狗一定唔會自己食自己。因此中國古代唔可能有「天狗食月」嘅講法，只有「天狗食日」，即係「月中凶神食日」。

相

• 
  2003年11月嘅月食（英文：November 2003 lunar eclipse）嘅開始
• 
  2010年12月21號月食（中文：2010年12月21日月食）
• 
  由月球上睇月食，由呂西安·魯達（英文：Lucien Rudaux）所畫
• 
  2014年4月15號月食（中文：2014年4月15日月食），喺美國加利福尼亞州洛米塔（英文：Lomita, Clifornia）拍攝。

參考

1. 大陽光經過地球大氣層會發生散射，好似黃、綠、藍、靛、紫等色嘅光線波長比較短，喺大氣中受到嘅散射影響比較大，紅色嘅光線波長比較長，受到散射嘅影響唔大，可以通過大氣層穿透出去，折射到匿喺地球影子後面嘅月亮上而；此外，由於大氣層嘅灰塵同埋雲嘅含量同位置唔同，光線偏折程度會有唔同，因此月全食嘅月球係暗紅、紅銅、或者橙色。同樣道理，由於大氣層嘅散射，朝陽同夕陽唔係白色，而根據高度因為大氣散射程度不同，呈現橙色或紅色。
2. 王政：〈《詩經．十月之交》與日月食神話巫術〉，《江淮論壇》，第二期，2001年。
3. 《靈憲》

睇埋

• 月食一覽
• 21世紀月食一覽
• 月相
• 超級月亮
• 日蝕
• 食分
• 夜空

出面網頁

• （英文）Mr.Eclipse月蝕入門
• （英文）NASA日月蝕信息
• （英文）NASA月蝕計算器