時態
From Wikipedia, the free encyclopedia
時態(英文:tense,近似粵拼:ten1 si2),學術上又有叫語言時制[1]:2.3,係有關文法嘅一個概念,指一隻語言有文法範疇方式表示一句語句講緊嘅事件發生喺乜嘢時間,喺過去、現在抑或係未來?當中文法範疇方式意思係話(簡單講)隻語言表達呢啲資訊嗰陣,並唔係齋靠「加多幾隻字詞落語句度」嘅。舉個具體啲嘅例子,英文就有時態呢家嘢,啲動詞要視乎「動詞指緊嘅事發生喺過去定現在」而變樣,例句[2][3]:
I drink the tea . 代名詞 動詞(現在式) 指定冠詞 名詞 我 飲(而家發生) 嗰杯 / 嗰啲 茶 I drank the tea . 代名詞 動詞(過去式) 指定冠詞 名詞 我 飲(過去發生) 嗰杯 / 嗰啲 茶
——留意 drink(動詞飲噉解)變咗樣,做過去式嘅 drank(意思一樣,不過飲嘅動作係喺過去發生嘅)。同英文等嘅歐洲語言比起嚟,好似粵語噉嘅漢語就傾向冇咩時態可言。用粵語做例,粵語表達「件事係幾時發生嘅」呢一項資訊嗰時,字詞唔會變樣,但係可以喺語句入便加多啲字詞,例句:
- 「我去飲茶。」呢句嘢可以變成
- 「我尋日去飲茶。」
- 「我之前去飲茶。」
等等。當中去飲茶(粵拼:heoi3 jam2 caa4)無論發生喺過去定現在,隻字詞都唔會變樣[註 1]。
喺廿一世紀初嘅世界,時態呢家嘢好常見,多個唔同語系嘅語言都會有時態呢種文法範疇——由印歐語言(成員包括英文、德文、法文、波斯話以及係印地話等)至日文都有時態。除此之外,某啲漢語亦都被指係有時態,或者係有一啲類似時態嘅嘢。