孔子（粵拼：hung2 zi2，前551年9月28號—前479年4月11號），子姓孔氏[1]
生平
孔子祖籍喺今日山東境。祖先爲殷商當地貴族，同殷商都係子姓。周國滅殷商，分封魯國，由姬姓所領。孔氏世代爲大夫，但到咗佢嗰代，家族式微。孔子阿爸係叔梁紇，好老先至生咗孔子。三歲嗰陣叔梁紇過咗身，孔子就一直跟住阿媽生活。
孔子後生嗰陣曾經做過官，主要係管理倉庫，生活鬼咁艱難。佢就喺呢個時候發憤讀書，三十歲左右就開始收徒。相傳佢有弟子三千個。
卅五歲嗰陣，孔子走到齊國，本來齊王睇起佢，但冇封佢做宰相。孔子就返番魯國講學。其後孔子又俾魯國起用，曾經同齊國齊景公會於夾谷，成功攞番魯國嘅汶陽。之但係孔子同魯國國君不時有意見，於是周遊列國十四年，之但係都冇受到重用。
到咗七十歲孔子俾魯國請返去，但一樣冇受到重用。孔子就喺呢段時間整理典籍。五年後孔子逝世。
思想
孔子生於東周春秋時代，當時周國王權，都唔係咁控制到諸候，周公所立嘅封建，都漸爲崚夷，各國開始擴張，增城廓，互有攻伐，此原爲封建所不容。之不過，雖有戰事，但戰事仍然守周禮，出師要有名，出於道德，未壞到無所不用其極，謹止貴族間嘅車戰，無後尾戰國咁慘烈，波及平民。然而，大夫亦唔受禮約束。故此，孔子仍有希望，可以勸國君人臣，回復到舊時守各字名份，按禮做事。
孔子言論，由弟子記入《論語》，編集成書。裏面全係零散對答。而當中以講仁最多。論語有六十六處講仁，但無一處解釋一樣。儒學目的係修行到聖人一樣。而對人性本善定本惡，都各有主張。如孟子主張性本善，而荀子主張性本惡。孔子並無特提及人性本善定本惡，但明示要時時警惕自己，以防不仁，隱含性本惡之意。孔子極重禮，主張無論點唔願，都要守禮。
名句
- 學而時習之
語出《論語·學而》：「子曰：『學而時習之，不亦說（悅）乎？』」王肅注：「誦習以時，學無廢業，所以為悅。」王釋「學」與「習」為一義，似專指誦讀。但孔子教人學「六藝」，包括禮、樂、射、御、書、數，「誦習」只係「一端」（見劉寶楠《論語正義》）。皇侃疏「時習」講：「凡學有三時。」一指年歲，二指季節，三指晨夕。近人蔣伯潛認為「學是知新，習是溫故」（《十三經概論》）。
- 敏於事而慎於言
語出《論語·學而》：「子曰：『君子食無求飽，居無求安，敏於事而慎於言。』」又《論語·裏仁》：「君子欲訥於言而敏於行」。義相同。意為做事勤奮敏捷，說話卻謹慎。朱熹注：「敏於事者，勉其所不足。慎於言者，不敢盡其所有餘也。」（《論語集注》）又釋：「事難行，故要敏；言易出，故要謹。」（《朱子語類》卷第二十二）另外喺《荀子·子道》、《韓詩外傳》、《說苑·雜言》等篇都有孔子語子路「慎言不嘩」嘅記載。
- 學而不思則罔，思而不學則殆
語出《論語·為政》：「子曰：『學而不思則罔，思而不學則殆。』」「罔」，迷惘。鄭玄注：罔，猶罔罔無知貌。「殆」有兩義：一為危殆，疑不能定。一為疲殆，精神疲怠無所得。當從前解。呢句可以同「溫故而知新」章合參。近人楊樹達注：「溫故而不能知新者，學而不思也，不溫故而欲知新者，思而不學也。」（《論語疏證》）孔子佢首先提倡學思並重，畀孔門弟子好深嘅影響。如子夏話博學近思，《中庸》話博學慎思，都認為學思唔可以偏廢。
- 人而無信不知其可也
語出《論語·為政》：「子曰：『人而無信，不知其可也。』」鄭玄注：「不知可者，言不可行也」。孔安國注：「言人而不信，其餘終無可」。朱熹話：「人面無真實誠心，則所言皆妄。」（《朱子語類》卷二四）近人蔣伯潛區分信有二義：「說話必須真實；說了話必須能踐言。」（《語譯廣解》）孔子及後儒極重信，「言忠信，行篤敬」（《論語·衛靈公》）係孔門嘅處世原則。
- 訥於言而敏於行
語出《論語·裏仁》：「子曰：『君子欲訥於言而敏於行』」。包鹹注：「訥，遲鈍也。言欲遲而行欲疾。」朱熹引謝良佐注曰：「放言易，故欲訥；力行難，故欲敏。」《論語》中重有許多同義之句：「慎言其餘，則寡悔」（《為政》）、「古者言之不出，恥躬之不逮也」（《裏仁》）、「君子恥其言而過其行」（《憲問》）等，都可以反映孔子一以貫之嘅重行慎言諗法。睇上面「敏於事而慎於言」。
紀念
教師節
孔子出世嘅日子係9月28號，中華民國政府搬去台灣之後，喺1952年將至聖先師誕辰同埋教師節由農曆8月27號改做9月28號，呢日又叫做「孔子誕辰紀念日」，每年台灣各地嘅孔廟都會舉行釋奠典禮。另外，喺馬來西亞華文獨立中學都列為教師節。
祭孔
歷朝帝王祭祀孔子嘅，由漢高祖開始。《漢書·高帝紀》寫道：「過魯，以太牢祭祀孔子。」而學校祭祀孔子，由漢明帝開始。《後漢書·禮儀志》話：「永平二年，……喺辟雍養三老五更；郡、縣、道喺學校行鄉飲酒禮，全部都祭祀聖師周公同埋孔子。」《文獻通考》：「貞觀二年，停止祭祀周公，將孔子升做先聖。」自漢朝以嚟，雖然已經全國都崇奉孔子嘅教導，但係起廟祭祀，近乎宗教性質嘅嘢，係由人心慢慢演變同深化，因為跟住前人嘅做法而增添光彩嘅緣故，最初唔係孔子想創立一個宗教，都唔係得一兩個帝王或者學者，假借孔子嘅教導去蒙騙百姓。[2]
後人為咗紀念孔子，喺世界好多地方都有起孔廟進行祭孔嘅活動。由1952年開始，喺台灣，孔子嘅生日就定做教師節。喺大陸，改革開放之後，跟住中華文化嘅復興，祭孔活動都興起返。
孔府、孔廟、孔林
中國山東曲阜嘅孔廟、孔府、孔林合稱「三孔」係中國歷代紀念孔子，推崇儒學嘅表徵。孔廟喺公元前478年開始起，經過2400幾年都冇放棄過祭祀，係中國用得最耐嘅廟宇，亦都係中國仲存在緊最出名嘅古建築群之一；孔林係孔丘死咗之後嘅墓地，連續用咗2400幾年，唔單止係中國，亦都係世界上用得最耐嘅氏族墓地；孔子嘅嫡孫保有世襲罔替嘅爵號，維持咗2100幾年，係中國最古老嘅貴族世家，佢哋嘅府第孔府係中國現存規模最大、保存得最好、最有代表性嘅官衙同住宅合一嘅建築群。「三孔」已經畀聯合國教育、科學及文化組織列入《世界遺產名錄》[3]。
歷代追封追謚
孔子死咗之後，歷代帝王為咗彰顯對孔子嘅尊崇，不斷追封追謚。
| 朝代 | 年代 | 封賜來源 | 封號同謚號 | 封謚原因同意義來源 |
|---|---|---|---|---|
| 東周 | 周敬王四十一年（前479年） | 魯哀公 | 尼父 | 亦稱「尼甫」，孔子字仲尼，父係敬稱[4] |
| 西漢 | 元始元年（公元元年） | 漢平帝 | 褒成宣尼公 | 漢元帝曾經封孔氏二支長孫孔霸做褒成君，[5]之後用褒成君食邑八百戶祭祀孔子 |
| 東漢 | 永元四年（92年） | 漢和帝 | 褒尊侯 | |
| 北魏 | 太和十六年（492年） | 北魏孝文帝 | 文聖尼父 | 文聖係謚號 |
| 北周 | 大象二年（580年） | 北周靜帝 | 鄒國公 | |
| 隋 | 開皇元年（581年） | 隋文帝 | 先師尼父 | 先師出自《禮記·文王世子》，「凡學，春官釋奠於其先師，秋冬亦如之。凡始立學者，必釋奠於先聖先師。」 |
| 大唐 | 武德七年（624年） | 唐高祖 | 先師 | |
| 大唐 | 貞觀二年（628年） | 唐太宗 | 先聖 | 隋至初唐釋奠禮以周公為先聖，孔子為先師，唐太宗廢周公，以孔子為先聖，顏淵配享 |
| 大唐 | 貞觀十一年（637年） | 唐太宗 | 宣父 | |
| 大唐 | 乾封元年（666年） | 唐高宗 | 太師 | |
| 武周 | 天授元年（690年） | 武則天 | 隆道公 | |
| 大唐 | 開元二十七年（739年） | 唐玄宗 | 文宣王 | |
| 大宋 | 大中祥符元年（1008年） | 宋真宗 | 玄聖文宣王 | 玄聖出自《莊子·外篇·天道第十三》，「玄聖素王之道也」 |
| 大宋 | 大中祥符五年（1012年） | 宋真宗 | 至聖文宣王 | 因為避宋聖祖趙玄朗諱而改至聖，至聖出自《中庸》，「唯天下至聖，為能聰、明、睿知、足以有臨也。」[6] |
| 西夏 | 人慶三年（1146年） | 西夏仁宗 | 文宣帝 | |
| 大元 | 大德十一年（1307年） | 元成宗 | 大成至聖文宣王 | 大成出自《孟子·萬章下》，「孔子之謂集大成，集大成也者，金聲而玉振之也。」「大成」本係古代秦樂嘅用語。古樂一變為一成，九變而樂終，到九成完畢，稱為大成，之後引申稱集中前人嘅主張、學說等形成嘅完整體系。 |
| 大明 | 嘉靖九年（1530年） | 明世宗 | 至聖先師 | 張璁認為孔子稱王名不正言不順，明世宗依佢意見，去咗王號同大成文宣嘅稱呼。[7] |
| 大清 | 順治二年（1645年） | 清世祖 | 大成至聖文宣先師 | 李若琳提請更改孔子神牌做「大成至聖文宣先師」，獲准。[8] |
| 大清 | 順治十四年（1657年） | 清世祖 | 至聖先師 | 張文光提請恢復明朝舊稱「至聖先師」，獲准。[9][10] |
| 中華民國 | 民國二十四年（1935年） | 中華民國教育部 | 大成至聖先師 | |
現代文藝作品
小說
- 1989年《孔子》日本作家井上靖之作。
電影
- 1940年版《孔夫子》由唐槐秋飾演孔子。
- 1985年版《孔子》由曹見得飾演孔子。
- 2010年版《孔子》（又譯：孔子：決戰春秋）由周潤發飾演孔子。
電視劇
- 1990年版《孔子》由王繪春飾演孔子。
- 1996年版《東周列國春秋篇》由王繪春飾演孔子。
- 2010年版《孔子春秋》由朱剛日堯飾演孔子。
- 2011年版《孔子》由趙文瑄飾演孔子。
- 2012年版《智勝鮮師》由曾國城飾演孔子。
話劇
- 2021年《典籍裡的中國》由王繪春飾演孔子。
動畫片
郵票
- 1989年9月28號中華人民共和國發行咗《J162M孔子誕生2540周年（小型張）》，紀念孔子誕辰。
批評
墨子
黑格爾
以貌取人
孔子曾經有一個弟子叫澹臺滅明，係魯國武城（今日嘅山東費縣西南）人，最初孔子對佢唔係咁睇好。澹臺係複姓，名滅明，字子羽。《史記·仲尼弟子列傳》講，子羽「少孔子三十九歲。」（有一個說法係細四十九歲《孔子家語·七十二弟子解》）。子羽嘅老豆同吳國大夫王犯關係好熟。喺魯哀公八年（公元前487年），吳國起兵討伐魯國，當時吳國大軍逼近魯國，魯國嘅人擔心子羽嘅老豆會同吳國人暗中勾結，內外夾攻滅咗魯國。當時有一位大夫子服景伯講：「吳師來，斯（指子羽老豆）與之戰，何患焉？且召之而至，又何求焉？」意思係吳國軍隊嚟咗，就同佢哋打，有咩好驚？召佢嚟，就嚟，仲有咩可求？魯國面臨危難嘅時候，子羽嘅老豆識大體，對魯國忠心，受到大夫嘅信任。
孔子嘅弟子之中，子游係唯一嘅南方人。佢做武城宰嘅時候，子羽喺佢手下做過一個細官。子游覺得子羽做人正派，做事規規矩矩，好守本分，唔玩手段，唔投機取巧。所以下次孔子問子游：「你喺嗰度做官，有冇搵到咩人才呀？」子游就向孔子推薦咗子羽。當子游推薦子羽嘅時候，講過一句話：「行不由徑。」呢句「徑」指細路，子游欣賞子羽做人做事坦蕩，連平時行路都淨係行大道，從來唔會抄捷徑。子羽做人一樣係咁，坦率正直，唔耍小聰明，唔貪人便宜。子羽雖然喺子游手下做事，但如果唔係因為公務，佢絕對唔會擅自入子游嘅房間，也唔會仗住上司嘅權勢去欺負人。子羽有佢老豆嘅美德，忠於自己嘅職責，「做人公正無私」。
子羽頭先入孔門嘅時候，孔子見佢相貌醜陋，以為佢資質平庸，冇乜才能，所以對佢好失望。不過子羽拜孔子為師，跟住孔子學習，後來佢到南方嘅吳楚等地教授禮樂，當時跟隨佢嘅學生有三百幾人，受到各諸侯國嘅尊重，而子羽本人行事公正無私，喺魯國擔任大夫。[12]因此，孔子喺晚年聽到子羽嘅消息時，感慨話：「以貌取人，失之子羽。」出自《韓非子·顯學》。
參考
出面網頁
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
