From Wikipedia, the free encyclopedia
吳(粵拼:ng4)係商朝到周朝(春秋時期)喺今日蘇州一帶嘅古國。個國君源出自周朝王室,姓姬。呢個國家曾經好強,出咗春秋五霸之一嘅闔閭王,到闔閭嘅仔夫差時,吳國達全盛期,但旋即畀隔離嘅越國所滅。而家有人攷據認為吳國完全係個百越國,就懷疑吳王室唔係出自周天子血統。
吳國初期嘅歷史具體係點係唔知嘅。不過,司馬遷嘅《史記·吳太伯世家》有紀錄。周朝嘅古公亶父(即係周太王,係周王室始祖)有三粒仔。大仔吳太伯(吳國祖先,創立時國號叫句吳),二仔虞仲,因為繼位嘅係佢哋嘅細佬季歷(即係周公季,係周文王嘅老豆),佢哋唔想爭王位,於是出走到吳地來讓位,史稱太伯奔吳,據文獻話,佢先出走到衡山(係指古南嶽安徽天柱山,唔係而家湖南衡山),再去到太湖一帶。因為當地人撐佢哋,於是佢哋就做咗當地諸侯。後來季歷想嗌返兩位兄弟返中原,吳太伯同虞仲不單之唔制,重斷髮紋身。嗰時紋身係異族風習,佢哋紋曬全身意思就係再都唔返中原。太伯同虞仲自己喺吳地立國,國號「句吳」,之後太伯過咗,無仔,就由虞仲繼位。
第19任君主壽夢即位後就改國號,將「句吳」嘅「句」字去咗,叫「吳」,並且自己稱王,叫吳王。到第24任君主(自稱王起係第6任吳王)闔閭時係吳國最強勢嘅時候。佢起用兩位名臣孫武、伍子胥,令吳國強到差啲打到當時嘅超級大國楚國滅亡。之後佢進攻新興嘅越國,闔閭喺戰場上負重傷而死,臨死前要個仔夫差發誓爲父報仇,最後闔閭葬喺虎丘。
夫差喺伍子胥嘅輔佐下恢復吳國元氣,最後打到越國爭啲滅國。越王勾踐作為手下敗將,令越國淪為屬國,要向吳國謝罪、進貢,其中包括當時最靚嘅靚女西施。
伍子胥好積極噉主張滅除後患,不過夫差呢個時候警戒心鬆弛咗,無視忠言,重搞到伍子胥自殺。
最後,吳國畀越國謀臣范蠡裝咗入愣(音:leng1),前473年越滅吳,夫差自殺。
吳越之爭留低咗好多故仔。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.