大長今

  呢篇文講歷史人物。想搵南韓劇集嘅話，請睇大長今 (劇集)。

長今（粵拼：coeng4 gam1；韓文：장금／長今 ^Janggeum；？—？）係朝鮮中宗嗰代嘅醫女，生歿年未知，但佢係喺《朝鮮王朝實錄》留低記錄嘅醫女之一。佢出名在於佢係朝鮮王朝唯一喺內醫府做御醫嘅女人。佢喺《朝鮮王朝實錄》提及咗十次，就算係噉，關於佢嘅信息依然模糊粗疏。中宗對長今嘅醫學見識滿意，交付責任佢，照顧王族成員嘅健康。之後，長今喺朝廷任職三品官，畀佢喺自己名前面加個詞「大」。

長今
原文名	장금
羅馬拼音	Janggeum
屋企	朝鮮漢陽
國籍	朝鮮
別名	大長今
職業	御醫
出名原因	朝鮮史上唯一女御醫

到今日，南韓學者仲係有個疑問，話大長今究竟係個事實上嘅人，定係只係歷史上一啲人嘅代號名。要注意嘅係，除咗大長今，朝鮮未曾有任何王家內醫嘅大女官或者女醫官，成個時期都係。

概要

除咗作爲醫女嘅動作以外，其他嘢都係不明，雖然作爲電視劇角色好受關注，但劇集嘅內容大半係作嘅。

《朝鮮王朝實錄》中嘅《中宗實錄》記嘅稱呼名係「大長今」。

另外，觸及中宗嘅主治醫師係女性呢件事嘅史料有中宗三十九年（1544年）10月嘅「予證女醫知之」呢一行話。

提及

王家史記

提及到大長今，係以御醫女嘅資格。最初嘅記錄喺中宗十年（1515年）登場^[1]。

「	臺諫又提起前事。憲府亦話：「前日戶曹話，禪、教兩宗革罷咗好耐，佢嘅位田要推刷，來充當國用，而下教唔推刷。而今唔許可度僧，將佢嘅根永久剷除，噉兩宗嘅位田宜當推刷屬公，革罷寺剎嘅位田，一齊推刷。」王上傳話：「大抵人嘅死生，同醫藥有咩關係呢？不過喺大王前上藥，失手者，按原來前例係要畀書吏論劾。唔知對於王后，有無呢個例呢？呢個要參攷前例。而且醫女長今護產有功，當然要畀佢大賞，最後因爲有大故，所以無受賞。就算唔可以行賞，都唔可以打刑仗，所以命令贖返個仗刑，呢個係參酌兩端來定罪嘅意思。其餘嘅都唔允許。」	」
——[註 1]

第二份記錄係中宗十年（1515年）^[2]。

「	臺諫又講起前事：「醫女長今嘅罪甚於河宗海。產後衣襨改御時，若果啓請中止，又點會有大故？刑曹照律時，唔適用正律，又命令贖罷杖刑，噉樣好唔啱。」王上全部唔允許。	」
——[註 2]

呢兩份記錄講嘅係1515年4月時，朝鮮中宗嘅第二位愛妃（章敬王后）過世，死於生仔時嘅併發症。朝中官吏想說服國王嚴懲所有醫治愛妃嘅御醫女（包括長今），但國王拒絕咗。

第三份記錄係中宗十七年（1522年）^[3]。

「	大妃殿嘅病症好轉，王上有各種差等嘅賞賜畀藥房。【提調金詮、張順孫，承旨趙舜賜馬鞍一部、弓一丁、箭一部，醫員河宗海賜馬一匹、米、豆各10石，金順蒙賜馬一匹，醫女信非、長今各賜米、豆10石，內官、飯監、別監亦有得下賜。】王上傳話：「近日好耐冇理事，冇接觸群臣，令我心未安。但係慈殿未完全好返，等多幾日，我會來經筵。」	」
——[註 3]

第四份記錄係中宗十九年（1524年）。從呢陣時候開始，佢獲得大長今嘅名稱，估計喺中宗十七年到十九年間長今攞到「大」嘅稱號^[4]。

「	王上傳話：「百工嘅技藝都唔可以不足，而勸課節目亦唔可以唔詳細。但係各司官員冇落力勸課，所以最後冇成效。當中醫術尤其係大事，又唔各別勸課，而今技術知少少嘅人，多數成咗宗朝所教養者。噉而今啲勸課嘅事又點算呢？呢個要問醫司先得。而且醫女嘅料食，有全遞兒，有半遞兒。而家全遞兒有空缺，冇受呢件事嘅人，從下面搞起肯定好難。但係醫女大長今嘅醫術叻過同僚，所以可以出入大內來睇病。呢個全遞兒就畀長今啦。」	」
——[註 4]

第五份記錄係中宗二十八年（1533年）^[5]。

「	王上傳話：「我病咗幾個月，而家幾乎回復健康。藥房提調同班醫員唔可以唔賞。左議政張順孫賜熟馬一匹，禮曹判書金安老、前都承旨丁玉亨、常山都正李末孫一齊加資，【常山都正喺腫期之初就開始獻藥，令個病快啲好返，所以佢亦都有賞。】醫員河宗海喺准職上加資，同知朴世舉、洪沈加資，一齊各賜米、豆六石，金尚坤加資，再賜兒馬一匹，金守良、盧漢明同掌務官員各賜兒馬一匹，醫女大長今、戒今各自賜米、豆15石，官木綿同正布各賜10匹，湯藥使令等都有各種差等嘅賞賜。」	」
——[註 5]

第六份記錄係中宗三十九年（1544年）^[6]。

「	王上傳話畀政院：「我而家感冒，得咗咳嗽症，好耐無視察，開經筵時，嗰日好凍，之前嘅症狀復發。醫員朴世舉、洪沈、內醫女大長今、銀非等議論啲藥，呢個下諭咗㗎喇，個意思話咗畀內醫院提調聽。另外中和【二月初一】嘅晝物【特別奉上嘅御膳】亦停咗佢。」	」
——[註 6]

第七份記錄係中宗三十九年（1544年）^[7]。因爲國王風寒病好返，有得獎賞。

「	王上傳話：「內醫院提調尹殷輔、鄭順朋各下賜熟馬一匹，都承旨李瀣、醫員朴世舉、洪沈一齊加資，柳之蕃、韓順敬各賜兒馬一匹，醫女大長今合賜米、豆五石，銀非下賜米豆三石，湯藥使令畀官庫木綿兩匹。」	」
——[註 7]

第八份記錄係中宗三十九年（1544年）^[8]。呢陣時王上嘅健康急劇惡化。

「	議政府、中樞府、六曹、漢城府嘅堂上以及大司憲鄭順朋等問安，傳話知道。當日醫女長今出來話：「尋晚王上喺三更瞓，到咗五更又暫時瞓着。而且小便暫時通咗，大便唔通，已經有三日。」朴世舉、洪沈入去診脈，左手嘅肝腎脈浮又緊，右手嘅脈慢而細。再議論藥劑，喺五苓散添加麻黃、防己、遠志、檳榔、茴香，分五次食。	」
——[註 8]

第九份記錄係中宗三十九年（1544年）。呢陣時唔係叫醫女，而係叫女醫。推測喺呢個時期佢直接診察國王，而將結果同班大臣講^[9]。

「	王上患病。政院問安，繼續話：「雖然尋日命令王子、駙馬、內宗親以外人唔準問安，但臣等喺近密位置，所以敢來問安。」傳話：「知道。我嘅症勢大體望落好咗，但大便仲未通，所以至今仲議論啲藥。」內醫院提調來問安【洪彥弼私底下問內官朴漢宗：「王上玉體尋晚點樣？」朴漢宗答話：「內官因爲冇得直接服侍，所以詳細嘅嘢唔知。大體同尋日一樣。但聽聞王上到天光先得瞓，噉樣睇，就應該唔係好好。」】傳話：「我嘅症勢，女醫會知。」【女醫長今話：「尋晚煲咗五苓散入去，服用咗兩次，到三更先瞓。而且小便逐漸通，大便同之前噉唔通，今朝先啱用蜜釘。」】政府問安，繼續話：「尋日命令咪問安，所以退走，但個心唔安，所以膽敢來問安。」答覆同畀政院嘅一樣。	」
——[註 9]

第十份記錄係中宗三十九年（1544年）^[10]。

「	王上患病。政院來問安，傳話知道。【承旨等問內官朴杞：「尋晚王上玉體點？」答：「仔細嘅唔知，好似下氣開始通。」】內醫院提調問安，傳話知道，政府問安，傳話知道，六曹、中樞府、漢城府嘅堂上來問安，傳話咪來問安。朝早時醫女長今從內殿出來，話：「下氣開始通，非常之舒服。」然後傳話畀藥房：「而今我下氣同平素噉，但條氣好弱。而家提調同醫員、醫女都喺度往來，而醫員咪入直，提調亦各自解散返去。」提調回啟話：「下氣同平素一樣噉，臣等聽到真係開心到唔知講咩好。萬一來咗渴症，要煲生地黃（韓文：지황）來飲，唔可以似平素噉飲冷水。而且要各別調理先好。」	」
——[註 10]

意思即係話國王回復咗，頒令畀所有御醫唞一日。實際上王上喺17日後駕崩，亦即1544年11月29號^[11]。

之後嘅記錄就冇咗大長今嘅消息。

醫學史記

大長今亦提及喺野史《李朝鮮國醫官散札記》。以下呢部醫學史記記嘅內容關聯到長今嘅來歷同成績^[12]。

「	醫女長今，佢嘅姓失傳咗，查唔到，十一代王中宗頒發諭旨，喺十八年封佢做「大長今」……喺嗰陣時，未有先例畀醫女調治王上，但王上信賴長今用飲食調治病理嘅方法，於是長今、信非嘅名入得史冊。	」
——[註 11]

根據呢本書嘅記載，長今係喺中宗十八年（1523年）攞到「大長今」嘅稱號，而且喺佢做醫女之前，係個喺廚房煮飯嘅宮女。但因爲佢唔係正統史書，又冇其他資料佐證，所以佢講嘅嘢存疑^[12]。

現代文化

長今嘅人生拍成咗韓國劇集《大長今》。喺呢部劇集，長今嘅名叫徐長今。主角由演員李英愛飾演。部劇畀評論界評價高，喺好多亞洲國家攞得成功，攞得高收視率。然而，呢部戲嘅徐長今形象認爲係小說化嘅形象，因爲喺齣戲長今描寫做從一個宮中女廚變成做御醫女。主要原因係由於大長今生平有好多枝節模糊。

另外，又有描寫長今少女時代嘅動畫《長今之夢》。

扮佢嘅演員

放送頻道	節目	類型	演員	放映期間
MBC	大長今	電視劇	李英愛，趙廷恩（少女期）	2003年 ~ 2004年
KBS 2TV	天命		金美京	2013年
MBC	獄中花		未詳	2016年

另外有舞臺版《宮廷女官長今之誓》嘅扮演者菊川憐、動畫版《長今之夢》嘅配音鄭美淑。

有關電視節目

放送頻道	節目	類型	放映期間
MBC	大長今	電視劇	2003年9月15號 ~ 2004年3月23號
	長今之夢1期	動畫	2005年10月29號 ~ 2006年4月29號
	長今之夢2期	動畫	2007年3月14號 ~ 2007年9月19號

睇埋

• 朝鮮中宗
• 大長今 (劇集)
• 長今之夢

註

1. 文言原文：臺諫啓前事。憲府又曰: 「前日戶曹啓請: 『禪、敎兩宗，革罷已久，其位田。』刷充國用，而敎以勿刷，今不許度僧，永絶根株，則兩宗位田，宜刷屬公，而革罷寺刹位田，竝宜刷之。」傳曰: 「大抵人之死生，豈關醫藥？然進藥大王前，失宜者，論屬書吏，固有前例。未知於王后，亦有此例耶？其考前例以啓。且醫女長今，護産有功，當受大賞，厥終有大故，故未蒙顯賞。今縱不能行賞，亦不可決杖，故命贖杖，此，酌其兩端，而定罪之意也。餘皆不允。」
2. 文言原文：臺諫啓前事, 又曰: 「醫女長今之罪, 又甚於河宗海。産後衣襨改御時, 請止之, 則豈致大故? 刑曹照律, 不用正律, 而又命贖杖, 甚爲未便。」 皆不允。
3. 文言原文：大妃殿證候向愈, 上賞藥房有差。【提調金詮ㆍ張順孫、承旨趙舜, 馬粧一部、弓一丁、箭一部, 醫員河宗海馬一匹、米太十石, 金順蒙馬一匹, 醫女信非、長今各米太十石, 內官、飯監、別監亦皆有賜。】傳曰: 「近日, 久不視事, 不得接群臣, 心甚未安。 然慈殿猶未永差, 姑待數日, 當御經筵。」
4. 文言原文：傳曰: 「百工技藝, 皆不可闕, 而勸課節目, 非不詳盡矣。但各司官員, 不致力勸課, 故卒無成效。其中醫術, 尤爲大事, 而不各別勸課焉, 今之粗解其術者, 皆成宗朝所敎養者也。今則其勸課事, 何以爲之? 其問于醫司以啓。且醫女料食, 有全遞兒、有半遞兒。今者, 全遞兒有窠闕, 而不啓其應受之者, 必以自下啓之爲難也。但醫女大長今, 醫術稍優於其類, 故方出入大內, 而看病焉。此全遞兒, 其授長今。」
5. 文言原文：傳曰: 「予累月未寧, 今幾差復。 藥房提調及醫員等, 不可不賞。左議政張順孫熟馬一匹, 禮曹判書金安老、前都承旨丁玉亨、常山都正末孫加資,【常山都正獻藥於患腫之初, 易至濃潰, 故亦在賞列。】醫員河宗海加資准職, 同知朴世擧、洪沈加資, 各賜米太六石, 金尙坤加資, 兒馬一匹, 金守良、盧漢明, 掌務官員等, 各兒馬一匹, 醫女大長今、戒今各米太幷十五石、官木緜正布各十匹, 湯藥使令等, 賞賜有差。」
6. 文言原文：傳于政院曰: 「予頃者感寒, 得咳嗽證, 久未視事, 故少差而爲經筵, 其日適寒, 前證復發。醫員朴世擧、洪沈及內醫女大長今、銀非等議藥事, 曾已下諭也, 此意言于內醫院提調。且中和【二月初一日。】晝物,【別進御膳】亦可停矣。」
7. 文言原文：傳曰: 「內醫院提調尹殷輔、鄭順朋, 各賜熟馬一匹; 都承旨李瀣、醫員朴世擧ㆍ洪沈皆加資; 柳之蕃、韓順敬, 各兒馬一匹; 醫女大長今, 賜米、太幷五石; 銀非米、太幷三石; 湯藥使令, 各給官木綿二匹。」
8. 文言原文：議政府、中樞府、六曹、漢城府堂上及大司憲鄭順朋等問安, 傳曰: 「知道。」 是日醫女長今出言: 「去夜三更, 上入睡, 五更, 又暫入睡。且小便暫通, 大便, 則不通已三日。」云。醫員朴世擧、洪沈入診脈, 則左手肝腎脈浮緊, 右手脈微緩。更議藥劑, 五苓散加麻黃、防己、遠志、檳榔、茴香, 五服以進。
9. 文言原文：上不豫。政院問安, 仍啓曰: 「昨命王子、駙馬、內宗親外, 令勿問安, 而臣等居近密之地, 故敢問安。」傳曰: 「知道。 予證, 大槪則似歇, 然大便尙不通, 故方議藥耳。」內醫院提調問安,【彦弼私問內官朴漢宗曰: 「上體夜來如何?」漢宗曰: 「內官亦不親侍, 不能詳知。大槪似與昨同。但聞上方曉入寢云, 以是觀之, 則似爲少歇矣。」】傳曰: 「予證, 女醫知之。」【女醫長今言: 「去夜煎進五苓散二服, 三更入睡。且小便漸通, 大便則如舊不通, 今朝始用蜜釘。」云。】政府問安, 仍啓曰: 「昨者命勿問安, 故退去, 然未安於心, 故敢問安。」答如政院。
10. 文言原文：上不豫。政院問安, 傳曰: 「知道。」【承旨等問於內官朴杞曰: 「去夜上體如何?」對曰: 「不能詳知, 或云下氣始通。」】內醫院提調問安, 傳曰: 「知道。」政府問安, 傳曰: 「知道。」六曹、中樞府、漢城府堂上等問安, 傳曰: 「勿爲問安。」朝, 醫女長今自內出曰: 「下氣始通, 極爲大快。」云。俄而傳于藥房曰: 「予今下氣如常, 但氣弱耳。提調及醫員、醫女皆來往, 而醫員勿入直, 提調亦各散歸可也。」提調回啓曰: 「臣等聞下氣如常, 喜極不知所言。如有渴證, 則當御生地黃煎, 不可如常時御生冷。且各別調理爲當。」
11. 文言原文：醫女長今，其姓亡佚，今時人不可查，十一代中宗王十八年奉運承旨受封號大長今……在其，龍體尚無醫女受治之先，中宗王褘而准之，使乃信非、長今之名亦得受載之故。……後弘文館儒生朴善道賦詩云：『檀羅開國第一女，始為水刺繼內醫，皇苑護生冠杏林，承旨獲賜大長今，當為一時女仕傑……。』

攷

1. 〈《朝鮮王朝實錄》中宗十年三月二十一日〉。《朝鮮王朝實錄》。喺2017年10月5號搵到。
2. 〈《朝鮮王朝實錄》中宗十年三月二十二日〉。《朝鮮王朝實錄》。喺2017年10月10號搵到。
3. 〈《朝鮮王朝實錄》中宗十七年九月五日〉。《朝鮮王朝實錄》。喺2017年10月15號搵到。
4. 〈《朝鮮王朝實錄》中宗十九年十二月十五日〉。《朝鮮王朝實錄》。喺2017年10月20號搵到。
5. 〈《朝鮮王朝實錄》中宗二十八年二月十一日〉。《朝鮮王朝實錄》。喺2017年10月25號搵到。
6. 〈《朝鮮王朝實錄》中宗三十九年一月二十九日〉。《朝鮮王朝實錄》。喺2017年10月29號搵到。
7. 〈《朝鮮王朝實錄》中宗三十九年二月九日〉。《朝鮮王朝實錄》。喺2017年11月3號搵到。
8. 〈《朝鮮王朝實錄》中宗三十九年十月二十五日〉。《朝鮮王朝實錄》。喺2017年11月5號搵到。
9. 〈《朝鮮王朝實錄》中宗三十九年十月二十六日〉。《朝鮮王朝實錄》。喺2017年11月8號搵到。
10. 〈《朝鮮王朝實錄》中宗三十九年十月二十九日〉。《朝鮮王朝實錄》。喺2017年11月9號搵到。
11. 查兩千年中西曆轉換，舊曆係嘉靖二十三年十一月十五。
12. 范永聰、區顯鋒。〈李氏朝鮮的醫女制度和著名醫女〉。《當代歷史學第7卷第1期》。原著喺2013年6月13號歸檔。喺2017年11月13號搵到。