From Wikipedia, the free encyclopedia
《大公報》係中國現存最耐歷史嘅報紙,由報刊出版家英華喺1902年6月17號響天津創刊,喺天津、上海、武漢、廣州、香港發過行。1938年後響香港出版,嗰時開始立場親中國共產黨,有唔少人都話佢哋實際係畀香港中聯辦操控。
![]() |
《大公報》嘅立場親中共,引伸對非建制派嘅態度亦唔友善。另外,末代港督彭定康喺回應蘋果日報同壹週刊停刊事件嘅時候,亦提到《文匯報》成日出版大話、誣捏政府[1]。
多年來,《大公報》不斷攻擊同埋以騷擾式手法採訪香港泛民主派同反共人士,以反對派稱呼泛民主派,當中好多假名署名文章。甚至連學者同部分中間派亦被文批,例如2012年1月,香港大學民意研究計劃發表「香港人」同「中國人」身分認同嘅民意調查,即使負責民調嘅鍾庭耀已經多次解釋自己用意,亦成為抨擊對象;《明報》報稱,兩個月內有多達40篇文章抨擊鍾庭耀都出自《大公報》等嘅親共報紙,此外國媒體《華爾街日報》亦以「文革式語言」(Cultural Revolution rhetoric)形容事件,指「左報」旨在普選前先「閹割」(neuter)非建制人士。[2]事件中,聲援鍾庭耀嘅科技大學副教授成名、中文大學導師蔡子強,都俾《大公報》指責做「抗中亂港之實的真政客、假學者……」。科大教授成名回應話,咁係文革式方法,目的就係要噤聲。[3][4]
2011年11月,前《香港電台》廣播節目主持吳志森,言論同政治立場引起左派不滿,例如早前「劉曉波獲諾貝爾和平獎」、「毒奶受害者代表趙連海」等,佢都有節目中批評中共,被指立場「反共」。吳志森稱突然遭撤換節目主持,並指出:過去一年,佢受到香港親中共報紙《大公報》、《文匯報》、《商報》批判攻擊達70篇文,當中講得最多係要求香港電台中止佢做節目主持。[5]
2010年12月2日,《大公報》有篇〈一年一度工展會維園舉行 營業額可望倍增〉新聞,內文提及「位元堂響應廠商會的「一元産品大優惠」,在展期首星期推出一元即食翅,每日售一百五十份,希望帶旺攤位墮胎,吸引更多市民購物」使一些網民以為位元堂發明可作墮胎之用嘅即食翅,並喺工展會促銷。有網民解釋指,以上文字原意係「希望帶旺攤位人流」,由於簡體中文嘅「人流」代表「人工流產」(墮胎),報社將簡體字自動轉做繁體字就轉換出錯。
2011年2月6日,《大公報》再犯「墮胎」錯誤,發佈〈商場新春墮胎生意較去年同期錄得增一成〉新聞,文中仲多次出現「墮胎」字眼,唔單止再次成為網民熱話,更喺翌日上報。
2013年4月18號大公報刊登嘅《北京的哥奇遇:習總書記坐上了我的車》一文,俾中國媒體廣為轉載。之後大公報發聲明話報道係假新聞並向讀者致歉。[6]
2016年香港立法會選舉期間,《大公報》「特別政治組」記者跟蹤同追拍本土民主前線參選人梁天琦嗰陣發生身體接觸後打鬥至見血[7]。8月14日晚,梁天琦喺港鐵太古站同《大公報》記者發生爭執。[8]其後又連續兩日以頭版報道梁嘅背景,亦到佢中國大陸出生地翻查祖屋同先輩資料[9][10]。
2021年1月,《大公報》被報道有記者冒認社工老師,入唨「天水圍社區關注組」成員王繼祖屋企訪問,仲影低咗佢屋企嘅情況。關注組成員形容呢啲行徑可恥,用陰濕招呃屋企人信任入屋。佢哋發表聲明批評,大公報一邊公開人哋嘅私隱,用龐大嘅媒體壓力揭開人哋嘅瘡疤,另一方面又話要保護學生,非常諷刺,又批評《大公報》事後嘅報導係喺度作故仔[11]。