英國

大不列顛北愛爾蘭聯合王國; United Kingdom of Great Britain and Northern Ireland; Teyrnas Unedig Prydain Fawr a Gogledd Iwerddon（威爾斯文）; An Rìoghachd Aonaichte na Breatainn Mhòr agus Eirinn mu Thuath（蘇格蘭蓋爾文）; Unitit Kingdom o Great Britain an Norlin Airlann（蘇格蘭文）
旗	徽
	格言：« Dieu et mon droit » （法文）; 「我權天授」
	國歌："God Save the King" （英文）; 《天佑吾王》
屬地（實轄）
	幅員國土：243,610平方公里（世界第79名）; 水域：1.51%;
首都	倫敦
最大城市	倫敦
時區	格林威治標準時間：UTC±0; 夏令時：UTC+1
國民
人數	以下係2023年嘅估計數字人數：▲ 68,138,484（世界第22名）; 人口密度：280/km2;
官方語言	英文（事實上）
主要宗教	基督教（59.5%）; 伊斯蘭教（4.4%）; 印度教（1.3%）; 其他（2%）; 冇講明（7.2%）; 冇宗教信仰（25.7%）
行車方向	靠左
政制
國家結構形式	單一制
國家政權	議會制、君主立憲制
法律體系	普通法系
	主要領袖國家元首（君主）：查理斯三世; 政府首腦（首相）：施紀賢;
	其他領袖（三權分立）行政（首相）：施紀賢; 立法（議長）：麥福男爵、賀立紳爵士; 司法（最高法院院長）：韋彥德男爵;
經濟
	GDP（購買力平價）以下係2023年嘅估計數字總計：▲ $3.847兆（第10名）; 人均：▲ $56,471（第28名）;
	GDP（國際匯率）以下係2023年嘅估計數字總計：▲ $3.159兆（第6名）; 人均：▲ $46,371（第22名）;
	HDI 以下係2021年嘅估計數字 ▲ 0.929（第18名）－極高;
中央銀行	英倫銀行
貨幣	英鎊（GBP，£）
堅尼系數	▲ 0.366; 中 · 第33名
資訊
國家代碼	GB
國際域名縮寫	.uk
國際電話區號	+44

英國Jing¹gwok³，又叫不列顛Bat¹lit⁶din¹（英文：Britain）、聯合王國Lyun⁴hap⁶ Wong⁴gwok³（英文：United Kingdom），全名大不列顛北愛爾蘭聯合王國Daai⁶ Bat¹lit⁶din¹ Bak¹ Oi³ji⁵laan⁴ Lyun⁴hap⁶ Wong⁴gwok³（英文：United Kingdom of Great Britain and Northern Ireland），係西歐一個島國。英國總面積達到243,610平方公里（即係94,060平方英里），係世界面積第八十大嘅國家，以及歐洲面積第十一大嘅主權國家，人口約有6636萬，係全球第二十一名同歐洲第三名。

Quick Facts 大不列顛北愛爾蘭聯合王國United Kingdom of Great Britain and Northern IrelandTeyrnas Unedig Prydain Fawr a Gogledd Iwerddon（威爾斯文）An Rìoghachd Aonaichte na Breatainn Mhòr agus Eirinn mu Thuath（蘇格蘭蓋爾文） Unitit Kingdom o Great Britain an Norlin Airlann（蘇格蘭文）, 屬地（實轄） ...

Close

佢係由大不列顛島上面嘅英倫（England）、蘇格蘭（蓋爾話：Alba）同威爾斯（威爾斯文：Cymru），加埋愛爾蘭島東北部嘅北愛爾蘭（Northern Ireland）共同組成，重包括1098個小島同埋一啲海外領地。英國本土係喺歐洲大陸西北面嘅不列顛群島，畀北海、英倫海峽、塞爾特海、愛爾蘭海同大西洋包圍。

英國國旗似個中文嘅「米」字，所以有一個花名「米字旗」。米字旗係由英格蘭旗、蘇格蘭旗同歷史上用咗來代表愛爾蘭嘅圖案合併而成。威爾斯由於早期已經畀人認為係英格蘭嘅一部份，所以米字旗上面無。米字旗最早係王室嘅旗幟，即使到咗今日，英國都無法律確認米字旗做英國國旗，不過佢晌功能上同國旗已經無乜差別。

近代英國藉住300幾年嘅貿易、移民同埋武力征服，將帝國嘅殖民地伸展到世界各地，喺高峰期領土遍及地球四分之一嘅土地，包括晒南極洲在內嘅七大洲、四大洋，據統計，1920年英國嘅殖民地人口有多過四億，土地面積達3500萬平方千米。無時無刻都有部份英國領土畀太陽曬住，所以英國亦都畀人叫做「日不落帝國」（the sun never sets on the British Empire），係人類歷史上，第一個世界性霸權國家。英國嘅殖民地有加拿大、埃及、肯雅、南非、英屬印度、英屬錫蘭、緬甸、馬來西亞、英屬香港、澳洲、紐西蘭等。英國嘅殖民對以上國家嚟講都有深遠嘅影響。

英國嘅君主立憲制同民主思想近代唔少國家學咗，至於民主思想，更影響今日世界至深。

英國係第一、第二次世界大戰主要戰勝國，所以成為咗聯合國安理會常任理事國^[6]。佢亦係歐洲聯盟、北大西洋公約組織同英聯邦（大英帝國嘅繼任組織）成員國。

2016年6月，英國舉行脫離歐洲聯盟嘅公投，結果脫歐派贏出公投，引起英國嘅社會撕裂，令到蘇格蘭、北愛爾蘭醞釀脫離英國。^[7]^[8]

喺而家嘅英國境內，人類存在嘅最早證據可以追溯到大約78萬年前嘅英格蘭，喺英格蘭入面發現過最古老嘅原始人類骨骼可以追溯到50萬年前。現代人類喺舊石器時代晚期開始住喺嗰頭，而永久嘅定居點就大概喺過去6000年入面建立。而家不列顛嘅南部，包括大部分嘅英格蘭地區同威爾斯，亦都曾經係羅馬帝國嘅一個省。喺羅馬帝國嘅統治結束之後，日耳曼等民族開始遷入不列顛群島，英格蘭開始進入盎格魯-撒克遜時期，而基督教亦都係喺呢個時期開始傳入英國。1066年，法國諾曼第公爵威廉入侵咗英格蘭，並陸續征服不列顛群島各地，史稱「諾曼征服英倫」，歐陸文化喺係個時候逐漸傳入英國。與此同時，不列顛北部嘅蘇格蘭王國亦慢慢開始成形。

而家嘅英國領土係過去幾百年入面多次合併嘅結果。喺10世紀嘅時候，蘇格蘭同英格蘭各自都係獨立嘅國家。1284年，威爾斯公國畀英格蘭控制，直到1535年成為英格蘭嘅一部分。1603年，英格蘭王國同蘇格蘭王國成為咗君合國，1707年正式合併為大不列顛王國。1801年，大不列顛王國同愛爾蘭王國（1169年至1691年間逐步畀英格蘭控制）合併，組成大不列顛愛爾蘭聯合王國。1922年，愛爾蘭自由邦成立，而北愛爾蘭則繼續由英國政府控制，英國國名亦都喺1927年改為大不列顛北愛爾蘭聯合王國。

英國喺19世紀嘅時候係一個遙遙領先世界嘅一個大國，當時有「世界工廠」嘅稱號，亦都係世界上第一個工業化嘅國家，係西方資本主義嘅倡導者，並且係早期議會民主制嘅誕生地。無論係喺科學技術定係文學藝術方面都有顯着嘅頁獻。喺佢頂峰時期，大英帝國曾經控制世界五份之一嘅土地同人口，因為佢控制嘅土地覆蓋着地球大部分嘅經度，太陽時時刻刻都會照耀住英國嘅領土，所以英國又被稱為「日不落帝國」，係人類史上最大嘅帝國。即使到而家，太陽喺英國海外領地同埋以英國君主為元首嘅英聯邦王國上空至今都仍然唔會落山。到到二十世紀前半葉，經歷咗兩次世界大戰嘅英國國力開始衰退。而喺後半個世紀入面，呢個龐大嘅殖民帝個嘅殖民地開始獨立。喺處理殖民地獨立問題嘅時候，英國利用「分而治之」嘅手段，喺務求該國最大利益嘅時候，畀咗原殖民地極大嘅不安定因素。最後一個脫離英國嘅殖民地，係喺1997年7月1號將主權移交畀中華人民共和國嘅香港。