墨爾本
From Wikipedia, the free encyclopedia
墨爾本(英文:Melbourne),嗰度啲唐人通常叫墨爾砵、墨爾缽、墨城,舊陣時叫美利濱、新金山,係澳洲維多利亞州嘅首府,亦係全國第二大城市,人口估計約4,900,000(2018年資料)。墨爾本係澳洲多元民族文化嘅中心,有好多嘅移民。
墨爾本被叫做「澳洲嘅文化首都」[1],亦係全國嘅文化、商業、教育、娛樂、餐飲、同埋旅遊中心[2]。墨爾本喺服飾、藝術、音樂、電視製作、電影同埋舞蹈等潮流文化領域引領澳洲。
墨爾本唔單止係澳洲嘅文化首都,同時亦係體育中心。墨爾本曾經開過1956年夏季奧運會,係南半球第一個開奧運會嘅城市。2006年英聯邦運動會,2007年世界游泳錦標賽亦都係喺墨爾本舉行。呢個城市集中咗幾乎澳州所有主要嘅運動賽事.包括賽馬(墨爾本盃)、網球(澳洲公開賽同戴維斯盃)、澳式欖球總決賽、F1賽車(澳洲一級方程式格蘭被治)。