![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/ae/Aristotle_Altemps_Inv8575.jpg/640px-Aristotle_Altemps_Inv8575.jpg&w=640&q=50)
唔啦更謬論
一種非形式謬論 / From Wikipedia, the free encyclopedia
唔啦更謬論(粵拼:m4 laa1 gaang1 mau6 leon6;英文:fallacies of relevance;拉丁文:ignoratio elenchi)係一種非形式謬論,又叫分散注意謬論(fallacies of distraction),指講緊謬論嗰個人個論證未必係唔合理或者唔真確,但係實際上根本冇處理到講嗰個人處理緊嘅問題[2][3]。唔啦更謬論有分好多種,其中一種比較常見嘅係草人謬論(Straw man fallacy),指一個人攻擊一個佢對手根本冇提出過嘅立場,但係跟手就扮到好似打敗對手噉,例如係以下呢場對話入面嘅 B 君噉:
- A 君:我信理神論嘅,即係話我信上帝,但係我唔信宗教。(對手提出咗個立場)
- B 君:超,你噉講即係話人類唔使要道德啦,隨街殺人放火強姦都得喇喎?你個立場根本就係錯嘅!(將對手個立場曲解做第個易駁嘅立場)
- A 君:我都冇噉講過,我淨係話我唔信宗教之嘛。你喺度曲解緊我講嘅嘢。
![Thumb image](http://upload.wikimedia.org/wikipedia/commons/thumb/a/ae/Aristotle_Altemps_Inv8575.jpg/640px-Aristotle_Altemps_Inv8575.jpg)
喺上面呢場對話當中,B 君攻擊緊一個對手冇主張過嘅立場:宗教同道德之間冇必然關係-有大把信教嘅人啲行為都好唔道德,世界上亦都有好多好有品德嘅無神論者、不可知論者、或者理神論者,所以 A 君提倡唔信宗教唔等如主張唔使要道德。亦即係話 B 君講嘅嘢雖然有道理(人類需要道德),但係根本冇應對到佢對手真係講緊嘅立場,所以犯咗一個唔啦更謬論。
啲人之所以會犯唔啦更謬論有好多原因,有啲人可能係唔覺意,但係又有啲人係因為唔夠人詏所以專登用呢類手法詐詐諦引開注意力。