冰皮月餅

冰皮月餅係香港大班麵包西餅喺1989年推出嘅新派中秋節月餅^[1]，外皮用糯米粉、麵粉製成，餡料除咗傳統嘅綠豆蓉外，重有生果蓉等，由於唔用烤焗，月餅表面唔使搽油。冰皮月餅同越南一種糯米月餅嘅外形相似^[2]。

大班冰皮迷你綠豆茸月餅

製法

冰皮月餅嘅製法係將清水同糖煮滾熄火，加入預拌粉攪勻；之後將粉槳倒入易潔盆度，同錫紙冚住蒸；然後攞出用手或機搓勻粉團；之後用保鮮紙包住粉糰，放入冰箱冷藏；最後將粉糰分成小份，沾上粟粉，壓入月餅模度再倒出嚟就得。個餡可隨意造成唔同風味嘅餡心。

食用同保存技巧

冰皮月餅嘅食用同保存都好講究，因為外皮無經過烘烤程序，所以喺常溫下顯得非常嬌貴，唔易保存。所以，切開咗嘅月餅最好盡快食，一般唔可以放置超過兩個鐘，唔係唔止影響口感，重可能影響新鮮度。

如果要保存，冰皮月餅應該喺雪櫃冷格儲存。如果要獲得最佳口感，可以喺食用前半個鐘將月餅放入冷藏格，等佢自然解凍後再切開食。

節日後嘅處理

由於冰皮月餅係時令食品，過咗中秋就因唔合時而無人問津，因此喺中秋節後，市面上嘅冰皮月餅多數會低價拋售。由於冰皮月餅嘅保質期最長唔過幾日，所以中秋過後好多大廠家都回收冰皮月餅進行銷毀，避免出現陳餡冰皮月餅，保證品牌質量。此外，近年香港都會有環保團體喺中秋過後舉行月餅罐回收活動，以免浪費資源。

參考

1. 〈冰皮月餅故事〉。大班麵包西餅。原著喺2012年1月21號歸檔。喺2012年2月22號搵到。
2. "Mid-Autumn Moon Festival in Vietnam". vnculture.com. 2010年9月11號. 喺2012年9月6號搵到.