公民民族主義
From Wikipedia, the free encyclopedia
公民民族主義, 又叫做民主民族主義或者自由民族主義,係民族主義嘅其中一種,通常同族裔民族主義相對。公民民族主義就係以自由主義嘅價值觀,包括政治自由、寬容、平等主義、個人權利等等為基礎,而唔係以民族中心主義為基礎。[1][2] 呢個主義嘅支持者通常都表示,一個人嘅國家認同感係佢嘅身份認同嘅重要部分之一,令一個人能夠活出有意義同有自由嘅生命。[3] 同時,一個民主嘅政體需要一種共同嘅認同感嚟正常運作。[4]
根據 Donald Ipperciel,公民民族主義同族裔民族主義嘅最大分別就係,族裔民族主義係基於一個國家人口嘅膚色,令國家有集權主義或者專政制度嘅趨向,但係公民民族主義就係源於憲法同民主主義嘅特色。[5] 喺20世紀期間,公民民族主義對於同盟國打倒納粹黨嘅納粹主義,特別係入面嘅種族主義,都有唔少嘅幫助。[6] 當然,就好似土耳其政治學家 Umut Özkirimli 所指,一個以“公民”爲中心嘅國家,都唔包保一定唔會出現法西斯式嘅排擠外族嘅仇恨心。[7]
公民民族體就係基於一份共同國籍嘅政治認同,所以係以支持一個國家嘅政治體制同價值觀念爲本。喺一個咁樣嘅國家入面,國籍係開放俾各種族裔嘅人,無論佢嘅文化同種族背景係咩。[8] 例如,根據土耳其憲法第66章,一位土耳其嘅公民喺種族上唔一定要係土耳其人。
理論上,一個公民民族嘅國家並唔渴望高舉某一種文化[8]。德國哲學家 Jürgen Habermas 亦都表示,一個住喺自由民主制嘅國家嘅新移民,並冇需要文化上同化,只需要接受國家嘅憲法同價值觀。呢個理論叫做“憲法愛國主義”。[8]