灰姑娘

《灰姑娘》（粵拼：fui1 gu1 noeng4；英文：Cinderella），又叫《仙履奇緣》，係一個童話故事。個故仔大致上係講好耐之前有個後生女叫灰姑娘，佢嘅後抵乸同兩個繼姐成日都糟質佢，當正佢係工人噉使；有一日，宮廷想搞舞會畀王子揀老婆；本來灰姑娘係冇得去舞會嘅，不過佢得到仙子教母嘅幫助，然後著住仙子教母畀佢嘅靚衫去舞會，而且王子仲喺舞會上鍾意咗佢；灰姑娘冇向王子透露佢嘅真正身份，但佢離開舞會途中漏低咗隻鞋；及後王子靠住隻鞋搵返佢，仲娶埋佢做老婆，最後大團圓結局。

呢幅插圖描繪畫畫人想像中嘅灰姑娘－灰姑娘係圖入面嗰位爛身爛世嘅少女。

  「仙履奇緣」跳轉到呢度。想搵其他用法，請睇「仙履奇緣 (搞清楚)」。

  想搵浦羅哥菲夫嘅芭蕾舞劇嘅話，請睇灰姑娘 (浦羅哥菲夫)。

《灰姑娘》個故仔有多個版本，而且唔同版本之間有明顯嘅出入。

劇情大綱

以下依個劇情大綱，跟嘅係1697年由法國作家沙略·佩羅寫嗰個版本^[1]。

灰姑娘身世

話說好耐好耐以前，有個好有錢嘅男人，佢有一個生得好靚心哋又好嘅女（主角），但佢老婆死咗。後嚟佢娶咗個新老婆，做主角嘅後抵乸。後抵乸自己本身帶住兩個女，後抵乸同佢兩個女性格又自私又貪心，仲好妒忌主角生得靚過佢哋。於是佢哋三個就夾埋虐待主角，成日迫主角做嗮所有嘅家頭細務，當正佢係工人噉使。後抵乸唔畀主角有自己一間房，又唔准主角著靚衫，仲迫佢夜晚要喺壁爐側面睏。主角朝朝早起身嗰陣都會搞到成身灰^{[註 1][2]}－於是後抵乸同主角兩個繼姐就笑佢，同佢改咗個花名叫灰姑娘^{[註 2]}。

不過主角心哋好善良又性格樂觀，一路都係默默噉忍受三個人嘅虐待。

國王搞舞會

有一日，灰姑娘屋企收到封信：國王宣佈想喺城堡搞舞會，幫佢個仔搵返個老婆。灰姑娘兩個繼姐一聽到就好興奮，諗住自己有機會做皇后，就爭住搵靚衫準備去舞會。而當灰姑娘話佢都想舞會嗰陣，佢哋就笑灰姑娘，話王子想搵嘅係老婆唔係僕人，同時後抵乸心知灰姑娘靚過佢兩個女，更加唔會畀灰姑娘出席舞會。於是灰姑娘冇得去舞會，淨係有得望住後抵乸同繼姐盛裝打扮噉出門口。

灰姑娘好絕望，一個人留喺屋企喊，喊吓喊吓突然見到有位仙子出現喺佢面前。原來依位仙子係佢嘅教母，仙子教母知道嗮成件事，就安慰灰姑娘叫佢唔使絕望。然後下一刻，仙子教母就郁手施展咒語，一嘢將個南瓜變咗做一架用金造嘅馬車、將老鼠變咗做拉馬車嘅駿馬、又將一隻大鼠變做馬車司機。跟住仙子教母又望吓灰姑娘，就再施咒，將灰姑娘身上嗰啲爛熔熔嘅衫變做一條鑲咗寶石嘅靚裙同埋一對用玻璃造嘅鞋。灰姑娘有得去舞會好開心，當佢上馬車準備出發嗰陣，仙子教母祝佢玩得開心，但同時又叮囑佢要喺午夜之前返屋企－因為仙子教母嘅咒語有個限制，就係一去到沓正十二點嗰一刻就會失嗮效。灰姑娘有留心聽同記住咗依個叮囑。

依幅插圖描繪仙子教母（企左邊嘅老女人）幫灰姑娘（企右邊嘅後生女）整南瓜馬車。 依幅插圖描繪仙子教母（企左邊嘅老女人）幫灰姑娘（企右邊嘅後生女）整南瓜馬車。  依幅插圖描繪灰姑娘（金色裙嗰位女士）喺舞會當中同貴族男士交際。 依幅插圖描繪灰姑娘（金色裙嗰位女士）喺舞會當中同貴族男士交際。  依幅插圖描繪灰姑娘（金頭髮嘅女仔）試著玻璃鞋，啱啱好著得落。 依幅插圖描繪灰姑娘（金頭髮嘅女仔）試著玻璃鞋，啱啱好著得落。

皇家舞會一路維持三晚。第一晚灰姑娘一出場就引起全場注意，尤其係王子一路都望住佢，畀佢嘅美貌同高雅舉止吸引咗。灰姑娘有記住教母講嘅嘢，喺午夜之前返咗屋企。一返到屋企，灰姑娘就係噉多謝仙子教母，然後兩個繼姐返到嚟就係噉喺度談論「嗰個一到午夜就唔見咗人嘅神秘女仔」－佢哋唔認得嗰個女仔就係灰姑娘。第二晚，灰姑娘又著住仙子教母畀佢嘅靚衫出席舞會，王子變得更加鍾意佢，仲開始同佢傾偈。兩個人好啱傾，不過灰姑娘掛住同王子傾偈跳舞唔記得咗時間，傾傾吓佢發覺就快到十二點，於是佢就嗱嗱臨跑返屋企，王子唔明點解灰姑娘要走就一路追，灰姑娘跑落城堡嘅階梯嗰時，唔小心畀隻玻璃鞋甩咗落嚟，灰姑娘嚟唔切執返隻鞋就繼續跑，身上嘅裙一路變返爛裙一路跑。最後王子發覺灰姑娘連影都冇埋，不過佢搵到灰姑娘留低嗰隻玻璃鞋，發誓要搵返隻鞋嘅主人。

最尾嘅結局

冇幾耐之後，決心想搵返灰姑娘嘅王子就反轉嗮成個王國噉搵，逐家逐戶噉叫佢哋啲女試著隻玻璃鞋。佢哋一路搵，終於嚟到灰姑娘屋企。王子一到，灰姑娘兩個繼姐就爭住想試著玻璃鞋，但兩個人都著唔落。然後輪到灰姑娘試著，隻鞋完美噉 fit1 嗮，灰姑娘仲攞返另外嗰隻玻璃鞋出嚟。王子見到就好開心，即場話要娶灰姑娘。

灰姑娘做咗王妃。灰姑娘嘅兩位繼姐驚起上嚟就哀ai1佢原諒。心哋善良嘅灰姑娘諗都唔諗就原諒咗佢哋，打後佢仲以德報怨，幫繼姐喺宮廷嘅貴族當中搵到如意郎君。

最後所有人都幸福快樂噉生活落去。

版本差異

《灰姑娘》依個故仔喺歐洲民間有多個唔同版本流傳。依啲版本可能同沙略·佩羅嗰個有明顯嘅差異，例如：

• 玻璃鞋：廿一世紀初最廣傳嘅版本，話灰姑娘嗰對神奇嘅鞋係用玻璃造嘅，不過有啲版本話隻鞋係用金造嘅，例如格林兄弟嘅版本就係噉^[3]。亦可以睇吓葉限嘅故仔入面提到嘅金鞋。
• 「幫灰姑娘嘅係邊個？」^[4]：仙子教母係佩羅自己老作嘅內容；其他版本冇提到仙子教母，有啲版本係話灰姑娘親生阿媽嘅鬼魂出面幫佢，又有啲版本係話灰姑娘親生阿媽個墳度生咗樖好茂盛嘅樹出嚟，而樖樹有神奇力量生咗條靚裙出嚟畀灰姑娘著。
• 試鞋經過：喺格林兄弟嘅版本入面，灰姑娘個後抵乸同兩個繼姐為咗想著得落金鞋而無所不用其極，後抵乸一見到自己親生女嘅腳大得滯就攞刀，叫佢哋兩個一個斬自己腳趾另一個削自己腳踭；不過佢哋嘅詭計話咁快就穿煲－佢哋搞吓搞吓，王子就留意到隻鞋變到血淋淋噉，然後就叫佢哋行開^[3]。
• 繼姐下場：喺佩羅個版本裏面，好心嘅灰姑娘原諒咗佢嘅繼姐，最後大家和和氣氣大團圓結局；不過又有啲版本話繼姐冇好收場，例如格林兄弟嘅版本講灰姑娘跟王子走咗之後，有雀仔追住兩個繼姐嚟啄，一路啄佢哋嘅眼，啄到佢哋盲咗^[3]。

文化影響

Cinderella（1911年）

内文：仙履奇緣 (1950年電影)

睇埋：灰姑娘 (浦羅哥菲夫)

《灰姑娘》嘅故事舉世聞名，多次被改編入歌劇、芭蕾舞劇、音樂劇同電影等唔同媒體嘅作品。

淨係睇電影，廿世紀尾幾十年間就有上百部情節參考或者直接改編自《灰姑娘》故事嘅戲拍咗出嚟。幾乎每一年都有至少一部噉樣嘅戲誕生同發行，令《灰姑娘》成爲擁有改編電影最多嘅文學作品之一。有關比較出名嘅《灰姑娘》電影，可以睇吓

• 迪士尼嘅 1950 年《仙履奇緣》就係以灰姑娘做主角嘅。
• 《史力加》同《史力加 3》用咗灰姑娘做配角。
• 2014 年《魔法黑森林》－《魔法黑森林》有用返《灰姑娘》當中某啲比較兒童不宜嘅情節，例如係講到灰姑娘兩位繼姐為咗著得落金鞋而斬腳趾削腳踭^[5]。

喺粵語嘅樂壇裡面，梁詠琪嘅 2000 年專輯《花火》入面嘅一曲《灰姑娘》亦成為佢其中一首最出名嘅歌。

起源

睇埋：洛多皮斯、葉限同格林童話

《灰姑娘》依個故仔歷史悠久。

早喺公元前 1 世紀嘅古希臘嗰陣，已經有洛多皮斯（古希臘文：ροδωπις，羅馬拼音：Rhodôpis）嘅故仔，情節講到法老王靠住一隻鞋搵到佢心儀嘅平民少女，跟住仲娶埋嗰位少女做老婆－依段情節同《灰姑娘》非常相似^[6]。

唐朝嘅文學入面亦有提到葉限依個虛構角色，講到佢畀惡毒後抵乸虐待，後嚟有國王透過葉限隻金鞋搵到佢，將葉限冊封做佢嘅王后^[7]。

廿一世紀初最廣泛流傳嗰個版本嘅《灰姑娘》係源自 1697 年嘅法國嘅，依個版本打後因為畀《格林童話》收錄而出咗名。

睇埋

• 童話故事
• 仙子教母
• 窮至有錢
• 灰姑娘效應
• 《千種皮》
• 《驢皮妹》

註釋

1. 法文 cendres，英文 cinder－當中 cinder 係特定噉指畀火燒煤炭或者木頭成嘅灰。
2. 法文 Cendrillon 唔可能係女仔名。詳情可以睇吓文法性別嘅概念。

引述

1. A modern edition of the original French text by Perrault is found in Charles Perrault, Contes, ed. Marc Soriano (Paris: Flammarion, 1989), pp. 274-79.
2. cinder. Cambridge Dictionary.
3. Cinderella. Jacob and Wilhelm Grimm，格林兄弟版《灰姑娘》嘅英文版。
4. Garner, Emelyn Elizabeth. Folklore From the Schoharie Hills, New York. Ann Arbor: University of Michigan press, 1937. p. 130.
5. Alexander, C. S., Carazo, R. L., Case, C., Eldridge, B., Habermeyer, R., Haywood, L., ... & Raven, J. (2020). Woke Cinderella: Twenty-First-Century Adaptations. Lexington Books.
6. Roger Lancelyn Green: Tales of Ancient Egypt, Penguin UK, (2011), Chapter: The Land of Egypt.
7. 《酉陽雜俎》

拎

• 【畫畫說故事】灰姑娘 | Cinderella | 保持樂觀的心態 - 粵語，呢段片用粵語講《灰姑娘》嘅故仔，夾雜咗啲似標準官話嘅用語。
• Cinderella - Jacob and Wilhelm Grimm （英文），格林兄弟嗰個《灰姑娘》故事嘅英文版。依個版本有講到灰姑娘嘅繼姐為咗著金鞋而斬腳趾削腳踭，亦有提到雀仔啄盲佢哋對眼。
• Literature / Cinderella （英文），TV Tropes 依頁講《灰姑娘》。