From Wikipedia, the free encyclopedia
亞歷山大丹尼士Enviro 200(Alexander Dennis Enviro 200),喺推出初期叫亞歷山大丹尼士Enviro 200 Dart(Alexander Dennis Enviro 200 Dart),係一款由英國亞歷山大丹尼士出嘅一款低地台中型巴士。亞歷山大丹尼士喺2006年3月20號宣佈推出Enviro 200 Dart,款車喺同年8月亮相。佢取代咗丹尼士飛鏢SLF同埋Pointer車身。
亞歷山大丹尼士Enviro 200/亞歷山大丹尼士Enviro 200H Alexander Dennis Enviro 200/Alexander Dennis Enviro 200H | |
---|---|
![]() 亞歷山大丹尼士Enviro 200 ![]() 亞歷山大丹尼士Enviro 200MMC ![]() 亞歷山大丹尼士Enviro 200 XLB | |
又叫 | New Flyer MiDi |
製造廠 | 亞歷山大丹尼士 |
邊道出 | 英格蘭Guildford 英格蘭Scarborough 馬來西亞Pasir Gudang(森那美) 馬來西亞(DEFTECH) 美國明尼蘇達St. Cloud(量產New Flyer MiDi) 美國印第安納Nappanee |
取代咗 | 丹尼士飛鏢SLF |
製造年份 | 2006年— |
主要對手 | 猛獅12.240 猛獅14.240/14.250 Optare Solo Optare Versa VDL SB180 Wright StreetLite |
規格 | |
長 | Enviro 200 8.9/9.1米、9.3/9.5米、9.6米/9.8米(ECWVTA)、10.2/10.4米、10.7/10.9米、10.8/11.1米(ECWVTA)、11.3米 Enviro 200MMC 8.9米、9.7米、10.4/10.7米、10.8/11.1米、11.5/11.8米、12.8米(三軸) |
闊 | 2.4米 |
引擎 | 康明斯ISBe/ISB |
波箱 | Allison 2100/T280R/B300R Voith DIWA BAE Systems HybriDrive(混能車驅動系統) ZF AS Tronic lite |
Enviro 200嘅新版Enviro 200MMC喺2014年亮相。
Enviro 200底盤(又叫做Dart 4)用返同之前嘅飛鏢SLF相似嘅後置引擎佈局,即係引擎係打直擺喺車尾中間。架車有幾隻長度可以揀,由8.9米至到11.3米不等;佢可以配康明斯ISBe四氣缸或六氣缸引擎(11.3米版只可以用後者),經Allison或者Voith DIWA波箱去行尾軸,2014年開始亦可以揀ZF AS Tronic lite波箱。
Enviro 200可以用原廠車身以達致底盤車身一體化,車嘴沿用同廠Enviro 400嘅設計。而底盤亦可以配東蘭開夏/Darwen/Optare Esteem(已經喺2009年停產)或者MCV Evolution車身。而喺2007年初,亞歷山大丹尼士宣佈Enviro 200車身可以配猛獅14.240(代號A66)底盤。
Enviro 200原本係喺亞歷山大丹尼士位於蘇格蘭Falkirk嘅廠房嵌車身,但自2007年中開始,車身裝嵌逐步搬去佢屬下Plaxton位於英格蘭Scarborough嘅廠房。但最遲2009年開始,Falkirk同埋Scarborough兩間廠都有出Enviro 200車身。另外Scarborough間廠亦開始嵌埋Enviro 200底盤。
2008年底,亞歷山大丹尼士喺Euro Bus Expo 2008展覽會展出Enviro 200嘅柴油/電力混合驅動版Enviro 200H(唔同2003年底亞歷山大丹尼士前身TransBus International出嗰隻TransBus Enviro 200H),佢用BAE Systems嘅HybriDrive驅動系統,同埋用康明斯ISBe四氣缸引擎發電。2014年開始,Enviro 200亦可以揀留定位去裝GKN Gyrodrive飛輪混合驅動系統。
2011年,喺歐洲賣嘅Enviro 200底盤同車身改到符合歐洲委員會嘅Whole Vehicle Type Approval標準(簡稱ECWVTA),底盤多咗另一個別名E20D,車身長度選擇亦都變咗。
2013年開始,Enviro 200底盤亦開始喺馬來西亞出廠,由森那美旗下Sime Darby TMA Sdn. Bhd.喺Pasir Gudang嘅廠房同埋DEFTECH代工。
Enviro 200喺英國倫敦已經有多間公司用緊,行倫敦嘅合約巴士線,而喺倫敦以外亦有唔少公司買咗,包括大規模嘅巴士集團Stagecoach、Arriva同埋第一集團。2009年,有5架Enviro 200H喺英國倫敦開始試行,由Transdev London營運,2011年再有9架Enviro 200H喺蘇格蘭開始行。
Enviro 200亦有被出口去其他地方,香港嘅港鐵公司喺2008至2009年出咗11架11.3米版,九龍巴士喺2011至2013年出咗41架10.4米版(其中7架原裝有手動減速器,用嚟行51號線;而2013年出嗰11架係單門版),愉景灣交通服務有限公司喺2014同2017年總共出咗6架10.4米版同埋1架11.3米版,珀麗灣客運喺2016至2018年出咗9架11.3米版;愛爾蘭嘅Bus Éireann喺2009年出咗23架;另外有啲底盤去咗西班牙,配當地車身;亦有啲底盤去咗澳洲,第一架配當地North Coast Bus & Coach車身,第二架由紐西蘭Kiwi Bus Builders嵌Enviro 200車身,其後嘅改由亞歷山大丹尼士嘅澳洲附屬公司Custom Coaches嵌Enviro 200車身;紐西蘭嘅NZ Bus集團由2011年開始接收超過300架11.3米Enviro 200,另外Howick & Eastern Buses、Mana Coach Services同埋Pavlovich Coachlines等亦喺2011年開始接收Enviro 200;馬來西亞嘅RapidKL由2015年開始接收80架,車身係由DEFTECH嵌。
第一間要猛獅14.240(A66)/Enviro 200配搭嘅巴士公司係英國Stagecoach,佢喺2008至2009年接收咗82架。另外倫敦Metrobus公司喺2008年接收咗3架。後來猛獅為自己嘅A66倉貨選配Enviro 200車身(放棄咗以往嘅Plaxton Centro車身),猛獅A66/Enviro 200配搭嘅巴士自2010年開始出現喺其他巴士公司。
喺2010年之後猛獅新巴士喺英國嘅需求大幅下跌,配Enviro 200車身嘅猛獅A66亦都冇再出。
Enviro 200MMC同Enviro 200嘅佈局相似,但架車本身經過大幅改良,成架車比之前輕咗200公斤。
車身採用新設計,車頭左右唔對稱,有啲組件係同較早時推出嘅Enviro 400MMC雙層巴士一致,包括司機位、電氣系統同埋可以快速裝拆嘅「Quick Release Glazing」車窗,而車廂亦可以比Enviro 200裝到更多座椅。
佢只可以配歐盟六型排放嘅康明斯ISBe四氣缸或六氣缸引擎,經Allison、Voith DIWA或者ZF AS Tronic lite波箱去行尾軸。亦可以揀GKN Gyrodrive飛輪混合驅動系統。尾軸嘅避震氣囊由兩個加到四個。至於底盤別名「Dart 4」同埋「E20D」亦喺呢款Enviro 200MMC上面繼續沿用。
架車有幾隻長度可以揀,由8.9米至到11.8米不等,但軸距唔同咗。
2016年,亞歷山大丹尼士宣佈為紐西蘭市場開發三軸版Enviro 200MMC,稱為Enviro 200 XLB(又叫Dart 4 XLB),喺驅動軸後面加多一條車軸,全長12.8米。同年,亞歷山大丹尼士亦同中國比亞迪合作,喺比亞迪D9UR全電動巴士底盤上裝車身,亞歷山大丹尼士稱之為Enviro 200 EV,初時得全長12米版,後來再宣佈推出10.8米同埋9.6米版。
喺Enviro 200MMC推出初期,英國政府依然容許車廠限量生產歐盟五型引擎巴士,令到舊版Enviro 200可以繼續賣,Enviro 200MMC嘅銷情亦顯得緩慢。首先引入Enviro 200MMC嘅巴士公司係National Express West Midlands,另外Stagecoach同第一集團等大集團亦都有引入。
2017年開始,Enviro 200MMC開始被運出口。紐西蘭嘅兩軸同埋三軸版Enviro 200MMC由2017年中開始喺奧克蘭載客。香港嘅新世界第一巴士喺2017年底引入5架Enviro 200MMC,香港機場地勤服務有限公司喺2020年底引入4架Enviro 200MMC作為機場員工巴士。
倫敦Go-Ahead London喺2016年首先引入51架Enviro 200 EV。Arriva North West喺2017年引入12架Enviro 200 EV,係倫敦以外首份訂單。
2018年,Enviro 200 EV亦被出口到紐西蘭[1]。
2012年,亞歷山大丹尼士同加拿大嘅New Flyer宣佈會喺北美洲推出中型巴士,架車會以Enviro 200為藍本[2],全長30呎或35呎,配符合美國環保局EPA 2013廢氣標準嘅康明斯ISB 250匹引擎同埋Allison B300R波箱,尾軸嘅避震氣囊由兩個加到四個。喺2013年,樣辦車陸續喺英國出廠,同年新車正式喺北美洲推出,並正名為New Flyer MiDi,量產車由New Flyer喺明尼蘇達St. Cloud嘅廠房生產。
2017年5月,兩間公司宣佈中止中型巴士生產方面嘅合作,並計劃喺2017年第四季將MiDi生產線搬去亞歷山大丹尼士喺印第安納Nappanee嘅廠房[3],同埋用返Enviro 200呢個名推銷。喺Nappanee廠房生產嘅Enviro 200,繼續用原有New Flyer MiDi嘅車身設計,但康明斯ISB 250匹引擎已經符合美國環保局EPA 2017廢氣標準。
截至2017年5月New Flyer同埋亞歷山大丹尼士宣佈中止合作為止,有大概200架New Flyer MiDi賣咗畀北美洲嘅巴士公司同埋校園用[3]。2018年嗰時,已經有Enviro 200喺Nappanee嘅廠房出廠同埋付運。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.