九龍塘
From Wikipedia, the free encyclopedia
九龍塘(Kowloon Tong,舊譯Kau Lung Tong)係香港新九龍一個地方,九龍市區裏面一個低密度住宅區。一般來講,界限街伸到去煙墩山南面山腰,都可以當係九龍塘。行政上面,九龍塘東西兩面,分別係歸九龍城區同埋深水埗區管。九龍塘原本係一條村名,即係界限街警察遊樂會一帶。今時今日九龍塘,位置、範圍都同原本位置好唔同。九龍塘除咗出名係中上階層聚居之外,亦都出名時鐘酒店。
九龍塘有兩間大學,中間有香港城市大學,東面九龍仔一帶,有香港浸會大學。其中城市大學好近港鐵九龍塘站,同區裏面大商場又一城拍埋。而隔籬又一村都當係九龍塘。
九龍塘近九龍仔嗰邊,除咗有浸會大學,近山一啲係廣播道,以前係香港所有電視台電台集中地,不過因為唔夠地,唔少已經或者就快搬走。