魷魚遊戲

  呢篇文講電視劇。想搵韓國一種叫「魷魚」嘅遊戲嘅話，請睇魷魚 (遊戲)。

《魷魚遊戲》（粵拼：jau4 jyu2 jau4 hei3，韓文：오징어 게임）係套2021年嘅Netflix韓國原創劇，李政宰同朴海秀主演。

魷魚遊戲 오징어 게임
宣傳海報
類型	動作 劇情 驚悚
編劇	黃東赫
導演	黃東赫
主演	李政宰 朴海秀 吳永秀（韓文：오영수 (배우)） 魏嘏雋 鄭好娟 許成泰（韓文：허성태） 金姝憐（韓文：김주령） 崔帕西·阿努潘 劉星柱（韓文：유성주） 李瑜美
國家／地區	韓國
語言	韓語
季數	1
集數	9（每集一覽）
每集長度	約32－63分鐘
配樂	鄭在日（韓文：정재일）
製作
製作人	金志妍 黃東赫 韓興碩
剪接	南娜英
攝影	李亨德
製作公司	Siren Pictures
發行公司	Netflix
預算	200億韓元[1]
播映
首播頻道	Netflix
圖像制式	4K（超高清電視）
聲音制式	杜比全景聲
播出日期	2021年9月17號 (2021-09-17)
出面網頁
官方網站
IMDb 介紹

簡介

套劇故仔圍繞住噉嘅一個遊戲：456名背景各異但一樣債台高築嘅玩家，為咗贏得456億韓圓嘅獎金參加一系列兒童遊戲，但如果輸咗會有致命嘅後果。導演兼編劇黃東赫就係根據自己早年嘅經濟困難以及韓國嘅貧富差距，構思咗套劇嘅事件。

集數

集數	標題	譯名	導演	編劇	上線日期
1	무궁화 꽃이 피던 날	一二三，木頭人	黃東赫	黃東赫	2021年9月17號 (2021-09-17)
2	지옥	地獄	黃東赫	黃東赫	2021年9月17號 (2021-09-17)
3	우산을 쓴 남자	擔遮嘅男人	黃東赫	黃東赫	2021年9月17號 (2021-09-17)
4	쫄려도 편먹기	即使被困住也要選邊站	黃東赫	黃東赫	2021年9月17號 (2021-09-17)
5	평등한 세상	平等嘅世界	黃東赫	黃東赫	2021年9月17號 (2021-09-17)
6	깐부	剛布	黃東赫	黃東赫	2021年9月17號 (2021-09-17)
7	V.I.P.S	一班貴賓	黃東赫	黃東赫	2021年9月17號 (2021-09-17)
8	프론트맨	代表人物	黃東赫	黃東赫	2021年9月17號 (2021-09-17)
9	운수 좋은 날	幸運之日	黃東赫	黃東赫	2021年9月17號 (2021-09-17)

劇情設定

遊戲一覽

次序	遊戲	遊戲規則	參與者	死亡者	生存者
1	一二三紅綠燈	參賽者需要喺做鬼嘅大木偶喺每次倒數嗰陣向前走，喺5分鐘之內過到紅線就可以過關。喺木偶倒數完轉頭望嘅時候重郁緊，或者未能夠喺限時內未完成嘅參賽者會被當場槍斃。	456	255	201
投票	/	選擇繼唔繼續進行同參加遊戲。	201	0	201
2	椪糖	參賽者喺未知道遊戲嘅情況下選擇三角形、圓形、星形、遮形其中一個圖案，之後每個人會獲得一塊印有對應圖案嘅椪糖。參賽者喺10之分鐘內用細針完整剝落圖案就可以過關，椪糖圖案破損或者限時內未完成嘅參賽者會被當場槍斃。	187	79	108
SP	特別遊戲	喺睏覺嘅時間開始嗰陣，讓所有參賽者自相殘殺。	107	27	80
3	扯大纜	10個人組成一組，由組織抽籤決定對戰雙方。每隊各自企喺高塔嘅一邊並用手扣扣喺條繩度，將對方所有人拉落去就可以過關。之後斬斷條繩，輸嗰隊會因為繩中間斷開而跌死。	80	40	40
4	彈波子	參賽者喺未知道遊戲情況之下搵人兩個一組，之後每人會獲得10粒波子，之後宣佈對手係同組嘅對方。參賽者喺30分鐘之內以任何非暴力方式贏到對方嗰10粒波子就可以過關，輸咗或者未能夠喺限時內未完成嘅參賽者會被當場槍斃。未能夠組成隊伍嗰一個「邊緣人」就唔使參賽並返到宿舍。	39	22	17
5	墊腳石橋（韓文：징검다리）	參賽者喺未知道遊戲情況之下先選擇一件有冚巴嘅背心，數字係決定過橋嘅順序，之後要喺16分鐘內赤腳走過一條懸掛喺高空、由16組玻璃組成嘅橋，每步需要從一組兩塊玻璃（分別係可以承重兩個人嘅強化玻璃同一個人都唔能夠承重嘅普通玻璃）中選擇其中一塊跳過去，順利到達喋血雙紅就可以過關，踩中普通玻璃嘅就當場跌死。時間一到，所有玻璃都會爆破。	16	13	3
6	魷魚遊戲	決賽者先擲硬幣決定遊戲攻守方，並可以用武力作出對抗。攻方達陣到魷魚圖案最上方嘅圓形部位就可以獲勝，守方獲勝就需要將攻方推出魷魚圖案外面。若果其中一方無法繼續遊戲嘅時候，剩餘嘅嗰方就會係最終勝利者。輸嘅會被當場槍斃。	2	1	1

人物階層

工作人員
角色	介绍
勞工	佩戴圓形圖案面具。層級最低嘅職位，擔任工人嘅工作。負責煮嘢食、搬運同處理屍體。需要管理者嘅批准先至可以出聲，宿舍裏面亦裝有監視器。
士兵	佩戴三角形圖案面具。擁有行使武力嘅權限，經常持槍出現。負責槍決被淘汰嘅參賽者、維持秩序同確保遊戲嘅進行。
管理者	佩戴正方形圖案面具。指揮勞工同士兵，同時亦負責控制所有監視器。經常由士兵護送出場，負責發佈同介紹遊戲事項。
負責人	經常戴住暗色幾何化面具，監管一切有關遊戲嘅事務，負責發號施令同接待貴賓。
非工作人員
貴賓	遊戲嘅贊助人，由一群嚟自世界各地嘅富豪組成。呢啲人都戴住金色動物面具，會到場觀看遊戲並對參賽者落注，作為娛樂。

此外，除咗負責人以外嘅其他工作人員都唔可以喺其他人面前除低面具，違反嘅會被負責人槍決。

文化影響

《魷魚遊戲》嘅成功得到世界各地好多關注，其中過咗四個禮拜已經有1.42億人次睇過。不過喺2021年10月，中國影音平台優酷就宣布推出一檔叫做《魷魚的勝利》嘅綜藝節目。但由於海報設計等方面都被指高度抄襲《魷魚遊戲》，於是引發咗好多批評。優酷之後就話，話係因為工作失誤，將舊版嘅海報攞咗喺招商活動入面用^[2][3]。

另外，香港亦出現一啲模仿《魷魚遊戲》嘅作品：

• 香港百老匯電器搵咗被稱「港版李政宰」嘅譚俊彥同被稱「港版孔劉」嘅張松枝拍電視廣告，重現劇入面地鐵月台打畫片一幕。
• 香港無綫電視處境劇《愛回家之開心速遞》第1447、1448集用《鹹魚遊戲》做單元，入面嘅「鹹魚遊戲」靈感嚟自魷魚遊戲，更有譚俊彥客串「456」一角，不過佢並唔係玩家而係幕後人員。
• 香港Youtube頻道試當真嘅節目《試玩毛》，亦有用《墨魚遊戲》做單元，入面嘅「墨魚遊戲」靈感嚟自魷魚遊戲。

爭議

套劇被指內容包含暴力、不當行為以及駭人嘅情節，認為唔啱青少年同細路睇^[4]。

參考

1. 〈《魷魚遊戲》製作費1.34億港元 　Netflix投資拍韓劇6年收益376億港元〉 (繁體中文)。頭條日報。2021-10-05。
2. 〈陸綜抄襲《魷魚遊戲》韓網罵爆！中國人也挺不下去：太丟人 | 娛樂 | Newtalk新聞〉。《新頭殼 Newtalk》 (中文)。2021-10-21。喺2021-12-14搵到。
3. 〈新陸綜抄襲魷魚遊戲「相似度高達90%」 中國網友也怒：編劇請動腦〉。《鏡週刊 Mirror Media》 (繁體中文)。2021-10-21。喺2021-12-14搵到。
4. 〈家長須留意子女觀看不適合的節目和媒體〉。澳門特別行政區新聞局。喺2021-10-18搵到。

出面網頁

• （） 喺Netflix上面睇《魷魚遊戲》（因為版權限制，呢個節目可能只喺某啲地區度上架。）
• 《魷魚遊戲》喺豆瓣嘅資料（大陸簡體）