頻率

  想搵統計學上嘅頻率嘅話，請睇頻率 (統計學)。

頻率（粵拼：pan4 leot2*6）係度一段單位時間裏便，重覆次數。佢嘅倒數就係週期。任何周而復始嘅過程，都有頻率。例如，打圈、震動、波浪，都有頻率。頻率單位係每秒幾多次，國際單位叫赫，符號 Hz。

每分鐘擺動25次，頻率就係0.416 Hz

公式

睇埋：時間

想像有一件物體（波源），佢响度發出一段段持續嘅聲波^{[註 1]}。設 ${\displaystyle f}$ 做波源發出嘅呢段聲波嘅頻率，呢股波嘅週期 ${\displaystyle T}$ 就等如^[1]

${\displaystyle T={\frac {1}{f}}}$

• 頻率（英文：frequency）：指一秒重複幾多次－1 Hz 表示每秒重複 1 次、2 Hz 表示每秒重複 2 次... 如此類推^[2]。
• 週期（英文：period）：指重複一次要幾耐（以秒計）。

假想依家有一位人類觀察者喺度聽嗰股聲波，同時假設由始至終，聲波嘅頻率無論點變都冇離開人類嘅聽力範圍。設波源同觀察者都係靜止唔郁（速度同加速度都係 0）嘅，觀察者接收到嗰一股波動，每兩個相鄰嘅高峰（maxima ^{[註 2]}；近似粵拼：mek1 sim4 maa4）之間喺時間上都相差咗 ${\displaystyle T}$ 咁多，而股波動嘅波長 ${\displaystyle \lambda }$（簡化講可以當做兩個相鄰高峰之間嘅距離）就會係

${\displaystyle \lambda =Tc_{s}}$，掉一掉就變

${\displaystyle T={\frac {\lambda }{c_{s}}}}$

當中 ${\displaystyle c}$ 喺呢個情況下係音速。

要廣義化（適用於其他波動同介質）嘅話，${\displaystyle c}$ 就係「呢種波動喺呢種介質入便嘅行進速度」。

振動指嚿物體相對於空間入面嘅某一點來回噉郁（例如郁去左邊，去到最左嗰點就向右郁，去到最右嗰點之後向左郁... 如此類推），即係話振動呢種郁動實係會每隔一段短嘅時間就會重複嘅。

聲學

用小提琴拉四吓唔同音高嘅音符

用電結他彈好多吓唔同音高嘅音符

一個人重複噉㩧兩碌音叉；呢場實驗展示音叉嘅振動產生聲。

睇埋：音高同振動

喺現代聲學之前，玩音樂嘅人經已能夠齋靠耳仔聽得出唔同嘅聲有「高低」之分。打後物理學上對聲嘅研究仲有進一步噉分析聲波嘅頻率。

聲學上嘅研究已知，一段聲波聽落「個音有幾高」係取決於佢頻率嘅，而股聲波「有幾大聲」就取決於佢嘅振幅。科學家可以用示波器等嘅架生量度語音嘅呢啲聲學特性。

睇埋

• 電壓（交流電）
• 簡諧運動

註釋

1. 就算將「聲波」換做光、表面波或者其他波動，下面講嘅原理都可以用同樣嘅方法嚟諗。
2. 呢隻字詞喺英文入邊係眾數。

引述

1. Lecture 21: The Doppler effect (PDF)
2. Tongue, Benson (2001). Principles of Vibration, Oxford University Press.