順德（粵拼：seon6 dak1）喺廣東南面珠江三角洲，家下係佛山市嘅市轄區，叫順德區，區治大良。境內有唔少河涌，土地肥沃，所以漁農業都好發達。1980年代改革開放後，因為響香港有唔少原籍順德嘅人士，所以有唔少香港廠家響度起工廠，投入資金，令佢成為南方一個輕工業重鎮，其中以電器最出名，成為咗「廣東四小虎」之一，亦都係中國大陸同廣東省最富庶嘅地方之一。
山
順德北有都寧，西面有天湖，西北面有西淋山。[1]
水
北江水由南海入順德，叫河澎海，再向東南，屈返北，到扶閭海，之後又到東纍石海。北江分支，主流入番禺，過咗沙灣水，就流入珠江。另一支去到板沙海入中山。[1]
秦朝到東晉，順德塊地基本上係番禺縣地方，南北朝到明朝初期屬南海縣同新會縣地頭，中間五代十國嗰時喺咸寧縣。唐代陣順德度開始有墟市。
南漢乾亨元年（917年）改廣州做興王府，仲照著唐長安嘅建置，將新會縣拆成咸寧、常康兩縣同永豐、重合兩場，以拱衛都城。咸寧縣治就喺而家嘅順德北滘簡岸路村。宋開寶四年（971）南漢畀滅咗後，咸寧等同番禺、四會畀合成返做南海縣。到宋陣開始多人住落，譬如碧江村就喺呢陣建立，以造紙同醃筍而出名。南宋末年北方民眾走難落來，順德嘅人口就猛增。
朝廷為強化控制創順德
大明正統十四年（1449年）黃蕭養起義後，朝廷為咗加強管治，景泰三年（1452年）將南海嘅東涌、馬寧、鼎安、西淋四都同新會嘅白藤堡（1958年10月復歸新會縣）劃出，創置咗順德縣，有「順天明德」嘅意思，縣治係原廣州府南海縣嘅大良堡，改埋名做大良。[2]
當其時南有馬寧巡檢司，北有紫泥巡檢司。西有江村巡檢司，後尾搬去西北查浦。北有都寧巡檢司，後尾搬去都粘堡。東南便有馬岡巡檢司，後尾廢咗[3]。
後期
明、清兩代順德係由廣州府管轄嘅。大清時經順德就發展得好富庶。當時縣治響容奇，（據 祝鹏《廣東省廣州市佛山市沿革地理》，縣治一路都響大良）有一個縣丞。又設紫泥、江村、馬寧，北都寧四巡司。光緒二十三年，大清同英國簽中英緬甸條約，其中響西江邊開甘竹商埠。[1]
民國都劃分都無乜大變，全縣分成十區。到1914年6月屬粵海道管理。1920年廢道後就直屬咗省。
共和國時代
1949年10月28號，中國人民解放軍進佔咗順德，到1950年3月20號成立咗順德縣嘅人民政府，係隸屬珠江行署。
1958年陣，當局將順德同番禺兩縣合併咗，改埋名叫番順縣，係隸屬佛山專區。不過到1959年6月就拆返出來，但順德就繼續由佛山專區嚟到管著。一路到咗1983年實行咗市管縣體制，成個順德就一路畀咗佛山嚟到管轄。
最後，2003年起變成佛山市下面一個區，是為順德區。
順德而家係歸屬咗佛山市，成咗下邊嘅一個市轄區，北便係禪城區、南海區，西便都係南海區。而市外，東北便係廣州市荔灣區，東便係番禺區，南係中山市，西南便係江門城區，西便係鶴山縣。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
