From Wikipedia, the free encyclopedia
雲咸街（英文Wyndham Street）係香港一街，喺香港島中環必打山。因爲舊時下面就係必打街，有大鐘樓，所以舊時又叫大鐘樓上街。雲咸街係香港開埠街道之一，一八四二年起好，打通山上嘅荷李活道，同山下嘅皇后大道。
條街伏喺必打山，地圖上碗形，東面起自皇后大道中，近畢打街，今娛樂行邊，呢度係條路最低處。之後向西南上山，過安蘭街、威靈頓街、美臣里同安慶臺、到德己立街同下亞厘畢道成四叉路口。呢段路好斜。由四叉路口，轉西再轉北山腰斜上橫行，就到亞厘畢道同荷李活道三叉路口爲終，是爲西面起點。呢段路無先前咁斜。
必打做船政司，以雲咸街左邊嗰石山做船政廰，管理船隻往來。而雲咸街打落嘅必打街，有必打步頭，是爲公家步頭。
《香港雜記》所載，由皇后大道中到忌連利街之間，有新公司、德國會館、德臣中西新聞紙館、孖剌中西新聞紙館、士蔑西報同牛奶房。
新公司，卽係家下叫嘅香港會所（Hong Kong Club），喺德忌笠街同雲咸街呢段皇后大道。佢過皇后大道就係書信館，而書信館側邊必打街頭，就有大鐘樓。故此雲咸街又叫大鐘數上街。新公司喺一八四五年起，於一八四六年五月廿六號落成，家下搬咗去昃臣道[1]，而地址歷幾代，有青年會，有戲院，最終變成今日娛樂行。
德國會館（Club Germania；或叫German Club）喺雲咸街，佢係由皇后大道中搬來，後尾搬咗去堅尼地道。雲咸街會址橫跨今日安蘭街[2]。而佢後面有一條美臣里，對住威靈頓街。
呢處舊時報館雲集。德臣中西新聞紙館，出《德臣西報》同《香港華字日報》，喺雲咸街五號門牌，就喺威靈頓街街口北面。孖剌中西新聞紙館，出《孖剌西報》同《香港中外新報》。另外重有士蔑西報新聞紙館，出《士蔑西報》。
近荷李活道口，就有中環差館，不過家下搬咗去軍器廠街，變成歷史遺蹟。
雲咸街山街一段好斜，又劃爲車落山之路，所以時有交通意外，大車細車衝落山致人命傷亡。
一九九七年八月十八正午，雲咸街同皇后大道中交界，差人探員駕車撞向人羣，導致三死十傷。車禍之後，段路鋪設防滑鋼沙，另加路牌最少四組，減低意外。但行車方向就無變，照舊落山。到咗二〇〇〇年四月廿九號，有架泥頭車，重廿四噸，無理雲咸街唔畀重過五點五噸嘅車用。車一時失控，沿斜路直衝雲咸街同皇后大道中交界，橫掃廿米鐵欄後，再撼娛樂行外棚架，先至停低，意外有三男一女受傷。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
