From Wikipedia, the free encyclopedia
西林寺（Sai Lam Temple），減筆西林，係香港一寺，喺沙田上禾輋村，離沙田火車站無遠山上。一九二三年梁子衡起，舊日寺內有唔少和尚。附近萬佛寺祖師月溪法師，亦曾駐西林寺。間寺曾經有如遊樂場，遊人甚多，及後一度荒廢。現已爲商人經營，擺骨灰龕爲業，面目全非。
建寺人梁子衡，法號浣清，原籍廣東南海。按寺嘅講法，梁氏先後妻妾九人，頭三個喺中國死咗。其後梁氏來港發展。二十世紀初，經營西鄉園素食館，有兩舖，一者喺九龍城啟德機場附近，另一喺旺角砵蘭街。一九二三年，佢喺現址起西林寺，亦執咗兩間舖，成西林主持，法號浣清。歡迎和尚掛單，亦幫善信做法事同招待遊客[1]。
一九三三年，月溪法師，游化香港，曾駐西林寺。月溪法師日後起咗萬佛寺。
西林寺曾爲郊遊勝地。二十世紀六十年代，寺廟似遊樂場，有園林勝景，飲食玩住都有[2]。旁邊先天道安老院都有園林，一併遊玩[2]。寺內香火鼎盛，齋菜聞名。寺前西林路有唔少食肆，每每假日，相當熱鬧。亦有不少人拍戲取景。
一九八〇年，西林寺主持浣清大師去世，於是有人出售西林寺予泰國財團，齋菜生意亦結束，寺內神位亦移走，自此旅遊勝地不再。泰國財團想改土地用途，香港政府唔准，因擱置荒廢而失修。[3]。二〇〇四年，沙田區議員曾提出重建西林寺爲旅遊地，因土地屬私人物業關係，而無法實行[4]。
二〇〇六年，香港商人莊氏，斥資逾三千萬港元購業權，計劃重建西林寺為旅遊地[4]，並成立西林（普眾）基金會負責重建。二〇〇九年十月，改建完工，但結果改建成五幢骨灰龕堂，三千骨灰位，與寺廟舊貌，大相逕庭。地政總署勒令該寺停止經營骨灰位，是以違反地契。
西林寺依山而建，門樓匾額刻有「西林」，左右對聯：「西樓灋苑宜修灋，林集禪門要學禪。」近入口處建有荷塘，有白蘭樹，最底有三屋宇，當中兩座兩層高為「客房」，另一座三層高係「西鄉園素食」，而後方有棟兩層高。大門直入後拾級而上，會睇到另一入口處「大悲願門」，修建時拆咗[4]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
