細胞

細胞（粵拼：sai3 baau1，Cell）係生物嘅基本構成單位。除咗病毒，第啲生物全部都係細胞構成嘅。之不過，病毒嘅生命活動一定要響細胞入便先至有顯現。

細胞
生理
屬於	multicellular structure[*], group of cells[*], 生物組織
識別碼
[改維基數據]
睇 傾 改

響顯液下嘅細胞，紅色嘅係角質素，綠色嘅係DNA。

一般嚟講，好似細菌呢啲微生物同埋原生動物淨係得一個細胞構成，叫做單細胞生物；而高等植物同高等動物係多細胞生物。細胞可分做兩挺類型：原核細胞同真核細胞。

歷史

英國人羅拔虎克（Robert Hooke，1635～1703）響1665年發現細胞。佢用自己做嘅顯微鏡睇水壺崒，發現有機物質上有一格一格嘅細空間，於是乎就用英文「cell」嚟嗌呢啲格仔空間。1674年，荷蘭人列文虎克（Antonie van Leeuwenhoek）用佢自己做嘅顯微鏡睇到微生物，係第一個發現細菌嘅科學家。

1809年，法國人拉麥克（Jean-Baptiste de Lamarck，1744—1829）提出：「所有生物嘅身體，都係由細胞組成。」當時未有具體證據支持呢個說法。到1850年代，德國人舒旺（Theodor Schwann，1810~1882）發現動物細胞裡面有細胞核。與此同時，另一個德國人舒萊登（Matthias Schleiden，1804~1881）研究植物嗰陣，亦都話植物細胞裡面有細胞核。兩個人都認為：「生物係由細胞組成」，咁就係細胞學嘅基礎。

中國嘅李善蘭響1858年寫咗一本《植物學》，用咗「細胞」作為cell嘅中文譯名。

結構

動物細胞結構圖解。①核仁 ②細胞核 ③核糖體
④囊泡 ⑤糙面內質網 ⑥高爾機體 ⑦細胞骨架
⑧光面內質網 ⑨粒線體 ⑩液泡 ⑪細胞質
⑫溶酶體 ⑬中心粒

動物嘅細胞同植物嘅細胞響結構上係有唔同嘅。整體嚟講，植物細胞係有一個細胞壁包住細胞嘅物質，但動物就冇呢種結構，成個細胞都可以隨意轉變形狀。雖然係咁，有啲結構係動物同植物都有嘅，例如細胞核。

動物細胞嘅結構

• 細胞核：包含咗遺傳物質(DNA)，包括染色體、核糖核酸等。
• 細胞膜：細胞同環境之間嘅分界，能夠調節物質嘅進出，例如可以防禦細菌或者其他生物嘅入侵，即免疫功能。
• 粒線體：又稱「線粒體」，主要協助細胞呼吸，並且產生細胞使用能量最直接嘅形式──三磷酸腺苷。
• 細胞質：含有維持生命嘅基本物質，好似醣類、脂質、蛋白質，因此亦都係細胞生存嘅主要場所。

植物細胞嘅結構

植物細胞結構

• 細胞壁：作用係固定同支撐植物細胞嘅形狀，但結構較為疏鬆，可以畀其他物質進入細胞內部。
• 葉綠體：主要功能係吸收光能，轉化成化學能，並藉此將無機物（二氧化碳同水）合成為有機物（醣類）。呢種過程為之光合作用──光表示光能，合表示合成。
• 細胞核：同動物細胞一樣。
• 細胞膜
• 粒線體
• 細胞質

細胞學說

内文：細胞學說

細胞學說（cell theory）係現代生物學基礎之一。呢個理論宣稱^[1][2]：

1. 細胞係生命嘅基本單位；細胞具有細胞核（nucleus）同細胞質（cytoplasm）等結構並且由細胞膜（cell membrane）保護住。
2. 生物冚唪唥都由一粒或者多粒細胞組成嘅。以及
3. 所有現存嘅細胞都係由之前存在嘅細胞做細胞分裂（cell division）所產生出嚟嘅（而廿一世紀初生物學其中一個最大嘅問題係「宇宙嘅第一粒細胞點嚟」）^[3]。

一粒細胞本身具有生命應有嘅特徵，同時又有好多生物係由大量細胞組成：細胞曉做新陳代謝，由嘢食嗰度產生自己生存落去所需嘅能量同對外界刺激作出適當嘅反應，維持自身存在；而且細胞內部帶有遺傳資訊（DNA；可以話係隻生物嘅設計藍圖）；喺細胞分裂發生嗰陣，粒細胞自我複製，同時將佢啲遺傳資訊傳達去下一代嘅細胞嗰度，所以啲下一代會似生佢哋出嚟嘅細胞。喺一隻多細胞生物－例如係人同貓噉－裏面，隻生物身體嘅每一粒細胞最終都係由一粒受精卵嘅細胞嗰度嚟嘅，令到成隻多細胞生物全身上下嘅細胞喺遺傳上都一致^[1][4]。

因為細胞對生命過程嘅重要性，細胞係好多病變過程嘅基本單位，例如係癌病噉，癌病嘅主要一個問題在於啲癌細胞唔受控係噉自我複製，搞到身體好多器官唔能夠正常噉運作，而呢啲器官好多時做嘅係一啲維持生命必需嘅功能（心臟確保全身各部份都有血用、胃負責消化嘢食... 等等），所以呢啲器官失去功能可以引致死亡^[5][6]。

攷

1. Mazzarello, P (May 1999). "A unifying concept: the history of cell theory". Nature Cell Biology. 1 (1): E13–15.
2. BalušKA, F., Volkmann, D., & Barlow, P. W. (2004). Eukaryotic cells and their cell bodies: cell theory revised. Annals of Botany, 94(1), 9-32.
3. Wald, G. (1954). The origin of life. Scientific American, 191(2), 44-53.
4. Aging changes in organs, tissues, and cells.
5. Zink, Daniele; Fische, Andrew H.; Nickerson, Jeffrey A. (1 October 2004). "Nuclear structure in cancer cells". Nature Reviews Cancer. 4 (9): 677–687.
6. Sherr, C. J. (1996). Cancer cell cycles. Science, 274(5293), 1672-1677.