漢字文化圈

  提示：呢篇文講嘅唔係中華圈或大東亞共榮圈。

 漢字文化圈（粵拼：hon3 zi6 man4 faa3 hyun1） （日文：漢字文化圏かんじぶんかけん，平文式轉寫：Kanji Bunkaken；韓文：漢字文化圈한자 문화권，文觀部式轉寫：Hanja Munhwagwon；越南文：𥿺文化𡨸漢Vòng văn hóa chữ Hán）係指大體上位於東亞、以源自中國嘅漢字爲文字媒介、文言爲語體媒介大量借用古典中文語彙、立足兼共享中華文化遺產嘅文化圈^[1]。呢個文化圈嘅主要國家地區有中國、台灣、香港、澳門、韓國（大韓民國、北韓）、日本（同埋日本治下嘅琉球）、越南。有時包括東南亞嘅星加坡。由於唐人在東南亞比重大兼且影響力大，東南亞嘅馬來西亞有時計入呢個文化圈，係半圈屬地區；蒙古、藏地、新疆有受中華文化影響，但處於邊緣地帶，同時受其他文化（譬如印度文化圈、中亞文化圈等等）影響，所以係文化圈嘅模糊區。

漢字文化圈地圖：中國、日本、南北韓、越南，以及同中華文化有聯繫嘅族群、地區。

「漢字文化圈」呢個詞用呢個文化圈內主要嘅語文寫出來嘅樣，都係用方塊字寫出，再加上表音文字。有台灣華語、中國華語、粵語、韓語、越南語、日語。其中方塊字部份有呢幾門語言特殊嘅字型、筆畫寫法。

漢字文化圈主要語言寫「漢字文化圈」。

由於漢字文化圈內嘅主要民族長期用漢字，佢哋嘅語言當中有好多中文成份，比如日文嘅漢語、韓文嘅漢字詞、越南文嘅漢越詞。透過呢個語文媒介，儒家思想成爲唨呢啲民族共有嘅文化背景，同時喺呢啲民族當中影響唨多數人嘅大乘佛敎，亦都係傳統文化源流之一；透過呢個語文媒介，促成唨文化圈內啲成員之間嘅文化、信息交流^[1]。目前中國同日本繼續用開漢字，南韓有漢字但少用，北韓同越南廢除漢字。

漢字文化圈從地理角度又可以叫東亞文化圈dung1 aa3 man4 faa3 hyun1^{[註 1]}；從文化角度又可稱爲儒家/教文化圈jyu4 gaa1 / gaau3 man4 faa3 hyun1，重有稻米文化圈dou6 mai5 man4 faa3 hyun1^{[註 2]}、筷子文化圈faai3 zi2 man4 faa3 hyun1^{[註 3]}等稱呼。

簡介

漢字文化圈指嘅係文化相近、歷史上受中國同中華文化（或漢文化）影響、過去或者而家用漢字、曾經共同使用文言文（日韓越稱佢為「漢文」/「漢字」）作為書面語（並非口語嘅漢語官話作為交流媒介）、受中華文化影響嘅東亞同東南亞部分地區嘅文化區域。

歷史上完全使用漢字或同本國固有文字混用，古代官方同埋知識分子多數用文言文（日本、越南、北韓、韓國稱之為「漢文」）作為書面語言。

經濟、政治上佢哋嘅共通點包括：以前都係農耕民族、有冊封體制、識用足夠量嘅漢字、官方同知識分子會用文言文寫文等等。

漢字文化圈內各國歷史上都位於東亞地區，鄰近中國，用過漢字，本國語言大量借用唨古漢語詞彙。

特徵

• 歷史上曾經或而今仍然有漢字作為傳播語言同埋文化載體。
• 歷史上有冊封體制，同古中國君主有臣屬關係或邦交。
• 喺漢朝、隋朝、唐朝、宋朝、明朝等朝代曾經向中國學習，政經文化、飲食生活、禮儀習俗接近。
• 受過儒家思想影響。
• 受過佛、道思想影響。
• 種稻米用筷子食飯。
• 多少有用陰曆/農曆同埋相關節日，例如農曆新年、端午、盂蘭節、中秋、冬至。

註

1. 但係實際上東南亞都有份，比如港澳臺、越南、星馬處於東南亞一帶。
2. 漢字文化圈內，唔係所有地方都食米，比如北中國以麥、高粱等作爲主食。同時唔止漢字文化圈食米，諸如泰國、緬甸、老撾等地方都種禾。
3. 同米一樣，揸筷子嘅地方亦唔限喺漢字文化圈，比如泰國、老撾、柬埔寨亦用筷子。

參考

1. 岡島昭浩 (2004年12月12號)。〈「漢字文化圏」とは（譯：「漢字文化圈」係）〉 (PDF) (日文)。大阪大學。喺2015年5月8號搵到。

出面網頁

• 京都大學 漢字研究
• 古代中日韓文化交流
• 中日韓文化交流大事年表