From Wikipedia, the free encyclopedia
恐狼(粵拼:hung2 long4;英文:dire wolf;學名:Canis dirus,呢個字喺拉丁文嘅意思係「得人驚嘅狗」噉解)係犬屬一個經已絕咗種嘅物種。佢哋喺 125,000 至 9,440 年前(更新世晚期至全新世)存在過,同斯劍虎(Smilodon fatalis)一齊俾人並列做最廣為人知嘅北美洲史前食肉獸。呢個物種喺 1854 年響沿住美國俄亥俄河近印第安納州埃文斯維爾嘅鴿子河河口嗰度由 Francis A. Linck 發現,並且跟手喺 4 年之後俾人改埋名叫「Canis dirus」[1][2]。目前最大嘅恐狼化石組係喺洛杉磯嘅拉布雷亞瀝青坑(La Brea Tar Pits)嗰度揾到嘅。
恐狼嘅殘骸喺好多唔同嘅生態系嗰度都揾得到,好似係北緯 42 度以南嘅北美嘅平原、草地、同埋有森林嘅山等等,連喺南美嘅乾旱大草原嗰度都有佢哋嘅蹤影。呢啲恐狼出沒地由同海平面差唔多噉高去到成海拔 2,255 米(7,400 呎)高嘅高地都有。
恐狼明顯似現代嘅灰狼(Canis lupus)。佢有兩個亞品種,Canis dirus guildayi 同 Canis dirus dirus,一般都認為係由北美洲嘅犬屬動物 Canis armbrusteri 嗰度進化出來嘅。一隻普通嘅恐狼同現代最大隻嘅灰狼差唔多大細-Canis dirus guildayi 平均重大約 60 公斤(132 磅),而 Canis dirus dirus 就平均重大約 68 公斤(150 磅)。佢嘅頭殼同啲牙嘅形狀似灰狼,但係啲牙稍為大隻些少,比較能夠將肉撕開,而佢一樣出位嘅特徵係佢喺犬齒嘅咬合力係已知嘅犬屬動物之冠[3]。一般都認為呢樣特徵係為咗要獵食更新世晚期嗰啲大型食草動物-包括咗馬、大地懶、乳齒象、古風野牛、同擬駝等等[3]-而進化出來嘅。另一樣似現代灰狼嘅嘢係,恐狼係成群噉打獵嘅。之但係雖然佢哋同灰狼有噉多相似之處,佢哋唔係任何現存物種嘅直系祖先。
恐狼同灰狼喺北美一齊生存咗大約 100,000 年左右。大約喺 10,000 年前-即係人類喺美洲出現咗冇幾耐-嘅冰河時期滅絕事件嗰陣,恐狼同其他大部份嘅北美洲大型動物一齊絕咗種[4]。至於點解恐狼會絕種,學界到咗家陣都仲係眾說紛紜:有人話係因為氣候變化搞到佢哋唔夠食物,又有人話係因為爭資源爭輸咗俾人類呢個當時新嚟嘅物種[4]。
恐狼係已知嘅犬屬物種當中最大隻嘅[5][6]。佢哋形狀同身體比例上似現代北美洲嘅狼品種[5][7],成年嘅恐狼對膊頭閒閒地都有成 38 吋(97 厘米)高,由頭到尾會有成 69 吋(180 厘米)長[5][8]。
恐狼嘅腳喺比例上比灰狼嘅短同強壯,可見恐狼並唔擅於奔跑,因而有可能係食腐肉或者以捕獵較大型同笨重嘅獵物為生。
同灰狼相比,恐狼嘅頭又大又闊,腦蓋較細。恐狼嘅牙較巨大,喺冠上有大量嘅磨損痕跡,故此好多古生物學家認為恐狼係用牙嚟咬碎骨頭。恐狼嘅骨上亦發現有好返晒或好返啲嘅傷痕,呢啲傷痕同現今嘅狼喺捕獵大型獵物(例如野牛同馬)時所造成嘅傷痕好相似,所以亦有人認為佢哋會獵殺大型嘅獵物。
犬屬動物嘅化石紀錄顯示佢哋係喺9百萬至1千萬年前嘅中新世晚期,由北美洲細小嘅Leptocyon沿灰狐同狐狸嘅分支演化出來。犬屬後來喺8百萬年前擴散至歐洲同亞洲,並成為而家嘅狼、胡狼、狐狸同貉嘅祖先。直至3百萬至5百萬年前,犬屬動物擴散至非洲同南美洲。喺3百萬年前巴拿馬地峽嘅形成,促使佢哋闖入南美洲嘅旅程。
跟住嗰9百萬年,狼喺北美洲進行大規模嘅發展同多樣化,直至更新世中期(80萬年前),Canis ambrusteri喺南北美洲出現同分佈。後嚟佢哋喺北美洲消失,但有可能喺南美洲延續成為恐狼嘅祖先。不過亦有一啲證據顯示恐狼係由其他較細隻嘅南美洲狼演化而嚟。
更新世晚期(30萬年前),灰狼經白令陸橋抵達北美洲。10萬年前,恐狼亦嘅北美洲出現。
一萬六千年前(冰河時期末),人類抵達北美洲,大部份嘅大型哺乳動物開始消失。恐狼由於冇咗主要獵物,而且跑得比其他犬屬嘅物種(如灰狼及紅狼)慢,捉唔到較靈活嘅獵物,開始焗住要食腐肉。直至一萬年前,大型哺乳動物同恐狼都絕種。不過喺阿肯色州亦有發現一啲化石,證明恐狼可能喺4000年前仍有一啲殘餘份子喺歐薩克山脈度生活。
喺拉布雷亞瀝青坑裏面,恐狼嘅數目非常之多,總數超過3600隻,比所有其他嘅哺乳動物更多。由此可見,恐狼可能好似而家嘅狼或者狗咁群體獵食,並且得知當時物種喺接近絕種時所承受嘅壓力。
喺1854年夏天,當俄亥俄河嘅水位較低時,響美國印第安納州埃文斯維爾發現到恐狼嘅模式標本。呢個標本係一個化石化嘅顎骨,由Joseph Granville Norwood博士響Francis A. Linck度搵到嘅。佢將呢個標本交畀約瑟夫·萊迪(Joseph Leidy)研究,萊迪確定呢個標本屬於狼嘅一個已絕種物種,喺1858年發表嘅文獻中,萊迪將呢個標本命名為恐狼。[9]
Norwood博士喺交畀約瑟夫·萊迪恐狼標本嘅信中提及另有一個標本已交返Linck度,但Linck喺1854年已經死咗,故此未能確定。呢封信同恐狼嘅模式標本現時存放喺費城自然科學院裏面。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.