Remove ads
Presto（英文讀音：/ˈprɛstəʊ/）係加拿大安大略嘅一種類似八達通嘅電子收費系統，可以喺渥太華同大多倫多及咸美頓地區嘅一啲城市嘅公共交通工具用。最初係膠造嘅電子車飛，叫 Presto 卡（英文：Presto card；法文：carte Presto），2007年6月宣佈計劃[1]，2009年11月喺多倫多聯合車站同 Oakville 市三條巴士線開始試用，2010年5月開始第二期啟用；2019年8月完成第四期啟用，截至2019年底大約有230萬張卡用緊[2]，由都市聯通旗下嘅同名子公司負責營運。
同八達通一樣，Presto 卡其實係一種聰明卡，外殼正常係膠造（但係出過金屬造嘅版本[3]），黑色底（早期版本係綠色底）；喺多倫多亦有一種紙卡版，但係紙卡其實都係聰明卡，入面有粒晶片，所以唔可以循環再用[4]。2020年，Presto 亦推出咗直接用信用卡、提款卡同手機拍卡嘅功能[5]。
雖然 Presto 卡可以喺唔同嘅交通工具用，但係用法並唔統一。所有交通工具都要上車拍卡（tap on），但係唔係所有交通工具都要落車拍卡（tap off），唔同用法包括下面幾種：
- 全綫統一收費，上車拍卡，落車唔拍卡；例如多倫多公車局，又或者約克區公車局嘅普通巴士。
- 全綫統一收費，上車之前喺車站拍卡畀錢，落車唔拍卡；例如約克區公車局嘅 Viva 巴士。
- 分段收費，上車之前喺車站揀車程距離，拍卡畀錢，落車唔拍卡；Viva 巴士曾經試過係咁。
- 分段收費，上車拍卡，落車拍卡；例如 GO 巴士同機場快綫。
喺落車要拍卡嘅交通工具，如果落車唔記得拍卡（或者唔知道要落車拍卡），就會當你尾站落車，即係會畀多咗無謂錢。掉轉都係一樣；喺落車唔拍卡嘅交通工具，如果你落車拍咗卡，睇你幾時落車，佢可能會當你搭多咗第程車，又係畀多咗無謂錢。
Presto 推出咗直接用信用卡、提款卡同手機拍卡嘅功能之後，亦多咗拍錯卡嘅風險，如果用錯第張卡落車拍卡，或者唔小心第張卡揩親部拍卡機，就會畀咗兩次錢[6]。
Presto 一直都有同警方合作，將乘客資料交畀警方。2017年，佢哋推出咗新版嘅隱私政策，但係仍然話視乎情況，警方就算冇搜查令，資料都可能會交畀警方，安省前私隱專員同其他專家指出，咁寫即係連最低限度嘅保障都冇，如果真係查緊案，冇可能攞唔到搜查令[7][8]。
喺2017年，Presto 交咗乘客資料畀警方30次，警方攞料嘅成功率大概係五成[9]。
到2023年佢定都冇修改隱私政策[10]。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
Remove ads