點新聞

《點新聞》（英文：Dot Dot News）係一間總部位於香港，喺2016年開設，親中派香港大公文匯傳媒集團旗下嘅網上媒體^{[1] [2] [3]} 。

《點新聞》被部分網民指多次製造同散播針對假新聞，被一啲民主派人士批評，曾經被點新聞抹黑嘅美國駐港澳總領事館亦批評過佢哋散佈虛假消息，又曾經多次盜取其他媒體採訪材料被譴責。 2019年9月，《點新聞》嘅Facebook專頁因為「內容散播仇恨，存在謠言」而被刪除^{[1] [4]}，《點新聞》就話Facebook咁做係打壓佢哋嘅新聞自由同政治處理^[5] 。

背景

同中聯辦嘅關係

點新聞係《大公報》同《文匯報》兩間親中媒體合併為香港大公文匯傳媒集團之後，成立嘅業務^[6]，而香港大公文匯傳媒集團本身亦係中聯辦旗下，而集團本身就曾經評價《點新聞》係一個直秉承愛國愛港、求真求實理念嘅香港媒體^[7] 。

2016年8月，香港政治組織本土民主前線發言人梁天琦被《大公報》一名姓盧記者追訪同跟蹤^[8]，二人喺港鐵太古站發生爭執，雙方互相拉扯同打鬥，相關影片引起外界關注^[9] 。 8月14日晚，《點新聞》喺自己嘅Facebook專頁以「還原真相」為題發表文章，指梁天琦「涉惡意打記者」^[10]，內容話《大公報》一名姓盧記者當時接觸梁天琦，希望梁天琦對即將發表、關於梁天琦嘅獨家報道作出回應，但係被梁天琦施襲，仲附上咗當時二人打鬥嘅照片。相關文章隨即被《文匯報》Facebook專頁轉載^[11] 。

爭議

反送中運動期間

攞以死抗命嘅抗爭者散播謠言抹黑鄺俊宇

2019年6月反對逃犯條例修訂風波期間，香港社運人士梁凌傑喺6月16號遊行前夕，喺金鐘太古廣場高處掛上標語示威，後從高處墮下，經搶救不治，終年35歲。《點新聞》就聲稱引述網民爆料報道，聲稱死者牽涉幾單案件，出事前同鄺俊宇討論過數問題，又話佢危站高處係因為立法會議員鄺俊宇畀錢，仲話鄺俊宇喺現場叫佢等媒體嚟到後再跳上氣靜墊予資助。最後報道仲話梁凌傑墮樓後，鄺俊宇就馬上離開^{[12] [13]} 。

鄺俊宇當晚發表發聲明嚴厲否認呢個指控，佢表示當時佢三次向警方要求進入封鎖區但都被拒絕，只能夠喺對面街向梁凌傑喊話，警察當時又聲稱唔需要亦唔容許鄺俊宇幫手。鄺俊宇批評《點新聞》嘅行為係踩著死者屍體去作新聞，形容《點新聞》行為卑鄙、可恥、違反做人嘅基本道德。佢亦表示打算就相關報導採取法律行動^{[14] [2]}。相關報導後來喺《點新聞》網站同Facebook專頁已經搵唔到^{[1] [13]} 。

抹黑《蘋果日報》刪片

2019年6月21號，《點新聞》以「暴徒圍毆警員片曝光《毒果》急刪片」為標題，報導《蘋果日報》拍攝嘅6月12號反對逃犯條例修訂草案示威嘅影片入面，影到示威者打警員，但《蘋果日報》為咗隱瞞真相將影片刪除。專門揭發假消息嘅Facebook專頁求驗傳媒就踢爆，話個段片其實係來自6月9號嘅遊行示威，而唔係6月12號嘅遊行示威，求驗傳媒批評相關人士唔單止盜取其他人嘅影片，仲搞錯埋日期；此外，求驗傳媒亦指出相關影片一直喺《蘋果日報》網站，亦冇證據證明《蘋果日報》曾經將影片刪除，批評《點新聞》「再一次愧對『新聞』兩字」。《蘋果日報》就發出嚴正聲明批評《點新聞》抹黑，又指有關影片顯示嘅係警員同市民拉扯後倒地糾纏嘅畫面^[15]。

武漢肺炎期間抹黑美國駐港總領事館

喺武漢肺炎期間，美國駐港澳總領事館有兩名職員確診，之後總領事館宣布停止總領事館服務兩日作深層清潔。不過，點新聞就作出「獨家」報道，聲稱收到「政府可靠消息人士」嘅消息，話佢哋兩個以外交豁免權為由拒絕隔離，仍然喺社區遊走同埋喺領事館返工。多個親中派政黨，包括工聯會、民建聯亦隨即「配合」，透過記者會同示威聲討^[16]。

之後美國駐港領事館發表聲明，高調反駁有關嘅報道，又不點名批評由北京中央政府控制嘅傳媒，喺呢件事上面散發虛假消息，又表明們反對點新聞喺重大嘅公共健康議題散佈虛假消息。之後特首林鄭月娥回應事件亦確認，嗰兩個職員已經入院接受隔離^[16]。

《國安法》案件審訊偷拍《獨立媒體》記者電腦

喺2021年7月27號，首宗《國安法》案件裁決，一名點新聞記者喺聆訊期間拍攝獨立媒體記者電腦，獨立媒體記者之後同嗰個記者交涉，點新聞記者聲稱影相係為咗確認當時自己前面一個男士係咪佢喺《文匯報》嘅同事，又聲稱自己第一次嚟法庭，唔知道唔可以影相^[17]。

2021年香港選舉委員會界別分組選舉 ‎民調造假

喺2021年9月23號，點新聞進行網上民調，問及公眾對選舉嘅睇法，又聲稱超過95%網民正面評價呢次選舉。但係選項入面除咗一個『其他』之外，其他選項都係正面評價嘅選項，結果被香港民意研究所嘅鍾劍華教授喺社交媒體質疑。鍾劍華又話，香港民意研究所絕對唔會做啲咁嘅民調^[18][19]。

多次盜取其他媒體採訪材料

《點新聞》試過唔止一其他媒體嘅採訪材料。除咗喺反送中運動期間，喺2022年1月，英國曼徹斯特有香港人發起人鏈聲援新聞自由活動，FreeHKMedia記者喺直播期間拍到人鏈尾聲有中國人騷擾和平活動嘅人士。之後，《點新聞》喺社交媒體上載一段自稱「獨家」片段《無懼竄英黑暴襲擊辱罵 愛國女生勇敢發聲斥「港獨」：我絕對不允許你分裂我的國家》，當中大概30%嘅內容都係來自FreeHKMedia嘅直播片段。之後，FreeHKMedia發譴責聲明，指《點新聞》鼠竊狗偷扮獨家行為卑劣^[20]。

睇埋

• 被視為受到中華人民共和國政府影響嘅非本地媒體一覽
• HKG報：另一個被指不時發放有利親中派假新聞嘅媒體

參考

1. 張嘉敏 (2019-09-14)。〈【逃犯條例】點新聞fb專頁被刪另開新帳戶　曾以輕生者作假新聞〉。香港01。
2. 〈【逃犯條例】《點新聞》指鄺Ｘ宇教唆墮樓　鄺俊宇斥踩屍體作新聞〉。《香港01》 (繁體中文)。香港。2019-06-19。原著喺2019-06-16歸檔。喺2019-06-16搵到。
3. 〈點、橙、輕、G、堅....　建制網媒出沒注意！〉。立場新聞。2016-08-15。原著喺2019-08-14歸檔。喺2019-07-04搵到。
4. 〈問林鄭「幾時死」　人民日報狠批香港記者「無良港媒」〉。立場新聞。2019-08-13。原著喺2019-08-14歸檔。喺2019-09-22搵到。
5. 〈臉書"雙標"不要臉 點新聞力抗打壓〉。中國評論新聞網。2019-09-20。
6. 匡野 (2018)。〈《香港大公文汇传媒集团媒体融合的实践与思考》〉。《中国出版科学研究所》 (12)。ISSN 1009-9263。
7. 〈點新聞再向Facebook抗議 要求刪除假專頁〉。文匯報。2019-09-17。原著喺2019-09-18歸檔。喺2019-09-24搵到。
8. 〈涉與梁天琦打鬥 《大公報》記者被捕 ｜ 蘋果日報〉。《Apple Daily 蘋果日報》 (香港中文)。原著喺2021-03-16歸檔。喺2021-03-16搵到。
9. 〈【蘋民直擊】【足本字幕】梁天琦被狗仔隊跟 太古站與人打鬥〉。蘋果日報。2016-08-14。原著喺2016-08-16歸檔。喺2016-08-16搵到。
10. 〈點新聞facebook：【#還原真相】梁天琦涉嫌惡意打記者〉。2016-08-14。原著喺2019-02-14歸檔。喺2016-08-16搵到。
11. 〈《大公報》記者報警稱被梁天琦襲擊 網媒引述：可開記招對質〉。香港01。2016-08-14。
12. 〈網民爆料: 金鐘墮下死者原來牽涉兩案件 出事前與鄺俊宇討論過數問題〉。《點新聞》 (繁體中文)。香港。2019-06-19。喺2019-06-16搵到。
13. 〈要「黃衣人」等媒體來再跳？ 鄺俊宇批網媒：踩著屍體作新聞〉。自由時報。2019-06-16。原著喺2019-06-17歸檔。喺2019-09-23搵到。
14. 〈【引渡惡法】鄺俊宇遭刻意抹黑 怒轟造謠者卑鄙〉。《蘋果日報》 (繁體中文)。香港。2019-06-19。原著喺2019-06-16歸檔。喺2019-06-16搵到。
15. 李八方 (2019-06-24)。〈隔牆有耳：點新聞偷片抹黑　《蘋果》法律追究〉。蘋果日報。
16. 〈武漢肺炎︱美領館斥中共媒體造謠 林鄭指兩確診職員正隔離 一名女兒亦確診 ｜ 蘋果日報〉。《Apple Daily 蘋果日報》 (香港中文)。原著喺2021-03-16歸檔。喺2021-03-16搵到。
17. 〈《點新聞》女記者庭上拍攝《獨媒》記者電腦 稱首次到法庭不知不准攝影 | 獨媒報導〉。《獨立媒體》。2021-07-27。喺2021-07-27搵到。
18. 〈嚴正聲明 「香港民意研究所」絕對唔會做這樣的民調〉。www.facebook.com。喺2021-09-23搵到。{{cite web}}: CS1 maint: url-status (link)
19. 〈Stand News 立場新聞 - 【很正面】 「完善」制度後的選委會選舉上星期日(19 日)舉行，由中聯辦控制的網媒《點新聞》星期四就刊出報道，稱經「民調」發現，95% 受訪者都正面評價選委會選舉。但根據該報道所指，有關「民調」中的選項，全部都是「正面」評價選委會選舉，唯一例外選項是「其他」。 | Facebook〉。www.facebook.com (英文)。喺2021-09-25搵到。
20. 〈FreeHKMedia發文譴責點新聞偷圖扮獨家 ：報格自重 人貴自知 – 和你報 WhatsNews Media〉 (臺灣中文)。喺2022-01-23搵到。