黃智雯

黃智雯（英文：Mandy Wong，1982年12月21號—）係香港女演員，曾經入圍2007年度香港小姐競選五強，曾經係無綫電視經理人合約女藝員兼當家花旦，而家係凱藝娛樂旗下藝人。佢喺2018年憑《三個女人一個「因」》成為「星馬雙料視后」^[4] 同「雙料民選視后」^[5][6]。

黃智雯 Mandy Wong Chi Man
2021年10月嘅黃智雯
女藝人
羅馬拼音	Wong Chi Man
英文名	Mandy
花名	ManMan、阿Dus、黃智Dus、wmm、星期日女王
國籍	中國（香港）
籍貫	廣東廣州
出世	(1982-12-21) 1982年12月21號（41歲）  英屬香港
職業	演員、主持
語言	粵語、英文、普通話
教育程度	香港演藝學院舞蹈及戲劇系表演藝術文憑
母校	聖公會基德小學（中文：聖公會基德小學） 文理書院（九龍）（中文：文理書院（九龍））
屋企人	家姐：Cathy Wong
演奏樂器	鋼琴[1]、結他[2]
代表作品	電視劇： 《缺宅男女》 《On Call 36小時》系列 《降魔的》系列 《三個女人一個「因」》 《使徒行者3》 《把關者們》 《隱門》 主持節目： 《一個因去跳舞》 舞台劇： 《超自然之戀》
出名角色	婁笑蘭（關二嫂）—《缺宅男女》 洪美雪 —《On Call 36小時》系列 莊芷若 / Salvia —《降魔的》系列 方以因（Evie）/ 菠蘿椰奶（Pina Colada）/ 愁擘擘 —《三個女人一個「因」》 張心月（Luna）—《隱門》
活躍年代	2007年至今
經紀公司	無綫電視（2007年-2023年） 凱藝娛樂（2024年-）[3]
網路電影資料庫（IMDb）資訊
獎 萬千星輝頒獎典禮 飛躍進步女藝員 2012年《缺宅男女》、《On Call 36小時》、《飛虎》、《巴不得媽媽...》 馬來西亞最喜愛TVB女主角 2018年《三個女人一個「因」》- 方以因 新加坡最喜愛TVB女主角 2018年《三個女人一個「因」》- 方以因 其他獎 MY AOD我的最愛頒獎典禮 我的最愛最具潛質女藝人 2012年《缺宅男女》- 婁笑蘭 星和無綫電視大獎 TVB飛躍進步藝人 2013年 觀眾在民間電視大奬 民選最佳女主角 2018年《三個女人一個「因」》- 方以因 香港電視大獎 女主角獎（劇集） 2018年《三個女人一個「因」》- 方以因

個人經歷

早年生活

黃智雯喺九龍新蒲崗大，讀過聖公會基德小學（中文：聖公會基德小學）同文理書院（九龍）（中文：文理書院（九龍）），佢2002年喺香港演藝學院攞到舞蹈文憑，主修音樂劇舞^[7]；並喺2007年攞到戲劇文憑^[8]。畢業之後，黃智雯曾經喺國泰航空做過三年空姐。^[9] 佢喺2007年參加香港小姐競選，入圍最後五強。

演藝生涯

2008年至2011年：新人出道，啱啱入無綫

2008年，黃智雯被安排入讀第22期無綫電視藝員訓練班，之後開始展開佢嘅演藝生涯。佢初期喺多部劇集入面飾演記者、鄰居、秘書等跑龍套角色。2009年，黃智雯喺潘嘉德監製嘅劇集《巴不得爸爸...》入面飾演女主角胡杏兒嘅妹妹「蘇鳳蓮」而開始為人熟悉，黃智雯喺劇入面嘅「眼鏡妹」造型更加被網民封做女神。自此之後，黃智雯成為監製潘嘉德嘅御用演員。

2010年，黃智雯喺時裝劇《搜下留情》飾演女主角陳慧珊細膽怕事嘅妹妹「鄭笑雯（鵪鶉妹）」。劇入面黃智雯再用「眼鏡妹」嘅造型亮相，好受觀眾歡迎，更加被媒體封咗做「宅男女神」。同年，黃智雯同無綫簽約，正式成為無綫經理人合約女藝員。^[10]2011年，黃智雯喺《居家兵團》、《怒火街頭》、《潛行狙擊》同《不速之約》入面都擔任重要角色，戲份幾重，仲第一次入圍《萬千星輝頒獎典禮2011》「飛躍進步女藝員」，更加被外界視為大熱人選之一。

2012年至2017年：攞到女飛躍同人氣急升

2012年，黃智雯喺時裝家庭劇《缺宅男女》飾演巴辣人妻「婁笑蘭（關二嫂）」，佢鵲巢鳩佔嘅形象備受矚目，演技亦都被網民讚進步咗好多。佢之後喺時裝醫療劇《On Call 36小時》飾演見習醫生「洪美雪」，同喺時裝警匪劇《飛虎》飾演倔強飛虎「蘇文強」。另外，佢喺劇集《巴不得媽媽...》同兩位經驗豐富嘅前輩演員黃淑儀同汪明荃合作。黃智雯喺2012年憑《缺宅男女》喺《萬千星輝頒獎典禮2012》第一次入圍「最佳女配角」最後兩強，仲攞到「飛躍進步女藝員」獎。

2013年，時裝警匪劇《女警愛作戰》喺香港地區首播，黃智雯喺劇入面飾演一個外冷內熱嘅衝鋒隊督察「司徒驕（Madam Kiu）」。之後，佢喺穿越劇《情逆三世緣》飾演女主角關詠荷嘅妹妹「田秋雁」^[11]，呢次係佢第一次次演繹反派角色^[12]，呢套劇嘅監製莊偉建亦都喺媒體面前公開讚佢演得好出色。同年，黃智雯喺時裝醫療劇《On Call 36小時II》再次飾演神經外科醫生「洪美雪」，喺《TVB 馬來西亞星光薈萃頒獎典禮2013》攞到「最喜愛TVB電視角色」獎，並憑呢套劇喺《萬千星輝頒獎典禮2013》再入圍「最佳女配角」，更加被外界視為大熱之一。

2014年，黃智雯喺台慶劇《飛虎II》入面再次飾演女飛虎「蘇文強」，並憑呢套劇第一次入圍《萬千星輝頒獎典禮2014》「最受歡迎電視女角色」。

2015年，黃智雯喺時裝劇《師奶MADAM》飾演「熊丹丹（Angel）」。同年，佢喺時裝懸疑劇《拆局專家》第一次擔正做第一女主角，飾演冷酷嘅「雷蕾」，喺《TVB 馬來西亞星光薈萃頒獎典禮2015》攞到「最喜愛TVB電視角色」獎，係佢第二次攞到呢個獎，同時憑呢套劇第一次入圍《萬千星輝頒獎典禮2015》「最佳女主角」。佢之後喺台慶劇《張保仔》飾演青樓名妓「朱淑君」，呢套劇亦都係佢拍嘅第一套古裝劇。

2016年，黃智雯喺時裝溫情劇《超能老豆》再擔正做第一女主角，飾演品性純良嘅「諸麗花（花老師）」。佢之後喺時裝法律劇《律政強人》飾演亦正亦邪嘅律師「方寧（Martha）」，同前輩方中信同廖啟智合作。佢憑呢套劇第一次入圍《TVB 馬來西亞星光薈萃頒獎典禮2016》「最喜愛TVB女主角」最後五強同攞到「最喜愛TVB電視角色」獎，係佢第三次攞到呢個獎，佢仲喺《星和無綫電視大獎2016》攞到「我最愛TVB女角色」獎。同年12月，佢喺民初劇《流氓皇帝》飾演「吳多茹」，當中嘅百樂門舞女造型吸引咗唔少網民關注。

2017年，黃智雯喺時裝劇《雜警奇兵》同《降魔的》都擔正做第一女主角。佢憑住《雜警奇兵》「龍麗莎（Laser 姐）」呢個角色喺《星和無綫電視大獎2017》攞到「我最愛TVB電視女角色」獎，係佢第二次拎到呢個獎。同年，佢喺台慶劇《降魔的》一人分飾兩角，分別飾演溫柔熱血嘅急症室醫生「莊芷若」同埋由千年黑色鼠尾草化身嘅「魔（Salvia）」，演技再得到觀眾讚賞^[13]；佢憑呢套劇入圍《萬千星輝頒獎典禮2017》「最受歡迎電視女角色」最後五強，同埋喺《觀眾在民間電視大獎2017》「民選最佳女主角」得票第二名^[14]。

2018年到而家：攞到星馬雙料視后，穩坐一線

2018年，黃智雯擔正做第一女主角嘅時裝心理喜劇《三個女人一個「因」》繼《雜警奇兵》之後再被放喺星期日黃金時段播放，黃智雯因為咁而被網民封做「星期日女王」^[15][16]。佢喺劇入面飾演有三重人格嘅大律師「方以因（Evie）」，同時分飾次人格「菠蘿椰奶（Pina Colada）」同第三人格「愁擘擘」。劇入面三個截然不同嘅人格都被佢賦予傳神嘅演繹，由正經內斂嘅主人格，狂野豪邁嘅次人格，悲觀細膽嘅第三人格，以至人格模仿另一個人格嘅演繹都恰到好處，演技備受觀眾肯定。黃智雯喺呢套劇開拍半年之前就開始做資料搜集，同埋睇好多同多重人格有關的嘅影視作品同書，為角色做準備。套劇集播出之後，唔少網民都支持佢攞視后^[17]。呢套劇喺豆瓣更加攞到8.5分嘅高分^[18]。由於呢套劇播出後大受歡迎，TVB喺觀眾熱烈要求下，破例喺MyTV SUPER上載20集足本版劇集^[19]。同年8月，黃智雯獲邀喺第十七屆美國華裔小姐競選總決賽擔任特別嘉賓，主辦單位喺美國紐約時代廣場俗稱「世界第一屏」嘅納斯特克展示屏刊登廣告，令到佢成為史上第一位登上呢個廣告屏嘅TVB藝人^[20]。黃智雯喺「萬千星輝賀台慶」以大熱姿態攞到「馬來西亞最喜愛TVB女主角」同「新加坡最喜愛TVB女主角」兩個獎^[21]。佢喺得獎感言提到：「我到今日仍然好深信，努力未必係有回報，但喺只要肯努力，一定會有人睇到。」另外，黃智雯喺視評人方以文舉辦嘅《觀眾在民間電視大獎》攞到「民選最佳女主角」獎^[22]，同埋喺視評人游大東舉辦嘅《香港電視大獎（中文：香港電視大獎）》攞到「女主角獎（劇集）」^[23]，成為由觀眾投票揀出嚟嘅「雙料民選視后」。佢亦都憑《三個女人一個「因」》成為《萬千星輝頒獎典禮2018》視后大熱人選之一，最後喺「最佳女主角」同「最受歡迎電視女角色」入圍最後五強。

2019年，黃智雯第一次一個人主持真人 show 節目《一個因去跳舞》。佢喺節目中由零開始學做韓國女團成員，拍攝期間更加因為訓練密集、欠缺休息而病咗，最後要入院打針，佢認真同敬業嘅態度得到觀眾讚賞^[24][25]。同年，黃智雯喺時裝喜劇《街坊財爺》飾演幫手解決貴利問題嘅熱心社工「朱瑪莉（Mary）」，同前輩鄭則仕、苑瓊丹、黎諾懿同埋邵美琪合作演出。

2020年，黃智雯喺三套劇都擔正做第一女主角。佢首先喺時裝懸疑劇《十八年後的終極告白》飾演重案組督察「阮麗瑾（Madam Yuen）」。呢套劇嘅氣氛沉重，加上佢嘅角色經歷咗悲慘嘅變故，令到佢喺拍完之後用咗接近半年時間抽離情緒^[26]。佢之後喺時裝奇幻喜劇《降魔的2.0》再次飾演溫婉善良嘅醫生「莊芷若」，當中芷若借咗肉身俾鬼魂啤啤同馬季約會嘅一幕，黃智雯成功演繹到啤啤嘅神韻，演技得到唔少網民稱讚^[27]。而《十八年後的終極告白》同《降魔的2.0》有兩個星期都係喺翡翠台兩個黃金時段緊接住播出，係佢第一次有主演嘅劇集同期疊播^[28]。黃智雯憑《降魔的2.0》嘅莊芷若喺《hk01娛樂民選港劇大獎》以超過四百票攞到「最佳女主角」獎，係佢喺《三個女人一個「因」》嘅方以因之後再次成為由觀眾投票選出嘅「民選視后」^[29]。同年，黃智雯喺台慶劇《使徒行者3》飾演有學者症候群同亞氏保加症嘅 CIB 總督察「章紀孜（Madam G）」，演技被讚成熟有深度^[30]。佢憑呢套劇成為《萬千星輝頒獎典禮2020》視后大熱人選之一，最後喺「最佳女主角」同「馬來西亞最喜愛 TVB 女主角」入圍最後五強。

2021年，黃智雯喺時裝懸疑劇《刑偵日記》飾演 EOD Number One 拆彈員「游雁星（Madam 星）」。為咗配合角色需要，佢喺套劇開拍四至五個月前就開始健身^[31]，喺拍攝拆彈同爆破戲份時要著住超過八十磅重嘅仿真防爆衣同埋戴超過二十磅重嘅頭盔^[32][33]。同年，黃智雯喺以海關為題材嘅劇集《把關者們》擔正做第一女主角，喺劇入面飾演海關 TCB 商品說明調查科總貿易管制主任「關佩欣（Madam Kwan）」^[34]。佢喺劇入面經歷小產嘅演技受到讚賞^[35][36][37]。佢憑《把關者們》再入圍《萬千星輝頒獎典禮2021》「最佳女主角」最後五強。

2023年，黃智雯喺邵氏劇集《廉政狙擊》飾演廟街歌手「方家晴」^[38]。之後，佢喺劇集《隱門》飾演「張心月（Luna）」，係佢入行以嚟最沉鬱同最難抽離嘅角色^[39]。為咗準備角色，佢仲報讀短期心理學課程^[40]。佢嘅表現受到前輩吳岱融同監製王心慰嘅讚賞^[41][42]，演技亦受到讚賞^[43][44][45]。

2022年2月，黃智雯上大陸拍電視劇《隱娘》，呢次係佢第一次拍大陸電視劇^[46]。同年8月，佢開拍新劇《再見·枕邊人》，同馬德鐘合作^[47]。

舞台劇

2020年1月，黃智雯第一次演出舞台劇《今晚打老虎（中文：今晚打老虎 (舞台劇)）》（一共六場），飾演才女「王秀英」。

2021年5月，黃智雯第二次演出舞台劇，喺國際知名劇場導演鄧樹榮（中文：鄧樹榮）執導、由法國當代輕喜劇改編嘅舞台劇《超自然之戀》（一共四場）飾演美女機械人「Chloé」^[48]。其中14號20:00同埋15號15:00嗰兩場有座談會。佢喺呢套舞台劇挑戰跳西班牙舞同劍擊，表演得到同劇演員嘅讚賞^[49]。佢嘅演出更加被紐約戲劇新聞網站 BroadwayWorld 寫文報導同讚賞^[50]。佢憑呢套劇喺《第三十屆香港舞台劇獎》第一次入圍「最佳女主角（喜劇／鬧劇）」^[51][52][53]。

2023年6月，黃智雯第三次演出舞台劇，再同鄧樹榮導演合作，喺《薄伽梵歌》做「說書人」。^[54]

合作多次嘅演員

袁偉豪

黃智雯同袁偉豪一樣喺2007年加入無綫電視，佢哋曾經合作十五次，合作劇集包括《桌球天王》、《搜下留情》、《On Call 36小時》系列、《飛虎》系列、《好心作怪》、《情逆三世緣》、《拆局專家》、《流氓皇帝》、《三個女人一個「因」》、《使徒行者3》、《刑偵日記》、《把關者們》，同埋舞台劇《今晚打老虎（中文：今晚打老虎 (舞台劇)）》，喺《On Call 36小時》系列、《三個女人一個「因」》、《今晚打老虎》同《把關者們》飾演情侶^[55]。佢哋由配角合作到主角，更加喺2018年嘅《萬千星輝賀台慶》一齊攞到「馬來西亞同新加坡最喜愛男女主角」，成為「星馬雙料視帝視后」^[56]。

梁競徽

黃智雯同梁競徽曾經合作十次，合作劇集包括《東山飄雨西關晴》、《學警狙擊》、《老婆大人II》、《缺宅男女》、《飛虎》系列、《法網狙擊》、《女警愛作戰》、《飛虎之潛行極戰》同《使徒行者3》，喺《缺宅男女》飾演夫妻。兩人更加喺2012年嘅《萬千星輝賀台慶》一齊攞到「飛躍進步男女藝員」獎^[57]。

羅子溢

黃智雯喺入行初期成日同羅子溢合作。佢哋曾經合作七次，合作劇集包括《搜下留情》、《On Call 36小時》系列、《缺宅男女》、《飛虎》系列同《巴不得媽媽...》，並於《搜下留情》、《飛虎》系列同《巴不得媽媽...》飾演情侶^[58]。

王浩信

黃智雯同王浩信由配角合作到主角，佢哋曾經合作七次，合作劇集包括《居家兵團》、《飛虎》、《法網狙擊》、《女警愛作戰》、《好心作怪》、《刑偵日記》同《廉政狙擊》，喺《居家兵團》同《刑偵日記》飾演情侶^[59]。

馬國明

黃智雯同馬國明由女配角合作到女主角，佢哋曾經合作七次，合作劇集包括《On Call 36小時》系列 、《飛虎》、《流氓皇帝》、《降魔的》系列同《使徒行者3》，喺《降魔的》系列有感情線，喺《使徒行者3》飾演情侶^[60]。

合作多次嘅監製

潘嘉德

黃智雯自從喺2009年被監製潘嘉德賞識，參演《巴不得爸爸...》之後就成為佢嘅御用演員。兩人合作過十一次，合作劇集包括《巴不得...》系列、《搜下留情》、《不速之約》、《On Call 36小時》系列、《拆局專家》、《超能老豆》、《流氓皇帝》同《三個女人一個「因」》。監製潘嘉德更加讚黃智雯勤力肯拼搏，從來無令佢失望^[61]。2020年1月，黃智雯第一次演出舞台劇，就係由潘嘉德執導嘅《今晚打老虎（中文：今晚打老虎 (舞台劇)）》。

開時裝網店

2023年3月，黃智雯同屋企人合資開網店「MAJOR C」，主要賣日韓時裝。^[62]

圈中好友

黃智雯加入無綫電視之後人緣好好，佢嘅好朋友包括胡杏兒、胡定欣、胡蓓蔚、姚子羚、李施嬅、趙希洛、孫慧雪、袁偉豪、馬國明、陳山聰、王浩信、羅子溢、謝東閔、楊潮凱、李佳芯、胡鴻鈞、何遠東、黎諾懿、譚俊彥、王敏奕、陳自瑤、王鎮泉等。佢同胡杏兒、胡定欣、胡蓓蔚、姚子羚同李施嬅組成姊妹團「胡說八道會」^[63]，又同袁偉豪、陳山聰、謝東閔、胡諾言、胡定欣、胡蓓蔚、姚子羚同李施嬅組成「Crazy Runner」^[64]。黃智雯因為拍《降魔的》而同胡鴻鈞同何遠東結緣，組成「降魔的偷跳小隊」^[65]；佢更加將趙希洛叫做「靈魂姊妹」（soul sisters）^[66]。

個人生活

黃智雯嘅家姐係英皇教育前補習名師Cathy Wong；媽媽喺灣仔開化妝品店。

黃智雯男朋友係珠寶公司高層詹文天（Anthony Jim），佢哋由2012年開始拍拖。^[67]

演出作品

電視劇（無綫電視）

首播	劇名	角色
2008年	同事三分親	女住戶
	甜言蜜語	琴　師
	溏心風暴之家好月圓	陳杜丹（Donna）
	東山飄雨西關晴	莊婌媛
	畢打自己人	馬慧丹（Mandy）
	Click入黃金屋	Bennie
2009年	學警狙擊	張樹珊
	桌球天王	Amy
	老婆大人II	伍凱彤
	蔡鍔與小鳳仙	吳賞梅
	巴不得爸爸...	蘇鳳蓮
2010年	搜下留情	鄭笑雯（鵪鶉妹）
	飛女正傳	記　者
	居家兵團	諸葛蓉
2011年	怒火街頭	張芷芯（Silvia）
	潛行狙擊	蒙心凌（阿檬）
	不速之約	邰　欣
2012年	缺宅男女	婁笑蘭（關二嫂）
	On Call 36小時	洪美雪
	飛虎	蘇文強
	巴不得媽媽...	夔懿曦
	法網狙擊	黃菲菲
2013年	女警愛作戰	司徒驕（Madam Kiu）
	好心作怪	夏思嘉
	情逆三世緣	田秋雁
	On Call 36小時II	洪美雪
2014年	飛虎II	蘇文強
2015年	師奶MADAM	熊丹丹（Angel）
	拆局專家	雷　蕾
	張保仔	朱淑君
2016年	超能老豆	諸麗花（Ophelia）
	律政強人	方　寧（Martha）
	流氓皇帝	吳多茹／水奕璇
2017年	雜警奇兵	龍麗莎（Laser 姐）
	降魔的	莊芷若（Felicity）／Salvia
2018年	三個女人一個「因」	方以因（Evie）／菠蘿椰奶（Pina Colada）／愁擘擘
2019年	街坊財爺	朱瑪莉（Mary）
2020年	十八年後的終極告白	阮麗瑾（Madam Yuen）
	降魔的2.0	莊芷若／Salvia
	使徒行者3	章紀孜（Madam G）
2021年	刑偵日記	游雁星（Madam 星）
	把關者們	關佩欣（Madam Kwan、Yan）
2023年	隱門	張心月（Luna）／葉敏敏
2024年	再見·枕邊人	顧晴天

電視劇（邵氏兄弟）

首播	劇名	角色
2018年	飛虎之潛行極戰	張慧珊（Dr. Cheung）
2023年	廉政狙擊•黑幕	方家晴

電視劇（中國大陸）

首播	劇名	角色
未播	隱娘	遲若卿（特別演出）

主持節目

播出 年份	節目	集數	備註
2007年	事必關己（中文：事必關己）	固定外景主持
2009年	東張西望
2017年	胡說八道真情假期	第1-6集 （一共10集）	喺澳洲拍攝
2019年	一個因去跳舞	一共5集	喺韓國首爾拍攝

綜藝節目

黃智雯參與綜藝節目一覽（中文：黃智雯參與綜藝節目列表）

電影

首映	片名	角色
2012年	2012我愛HK 喜上加囍	節目編導
	天生愛情狂	二妹
2013年	風暴	女酒樓侍應

舞台劇

首映	劇名	角色	合作演員
2020年1月	今晚打老虎（中文：今晚打老虎 (舞台劇)）	王秀英	錢嘉樂、袁偉豪、楊詩敏、羅冠蘭、李國麟、康華、魯文傑
2021年5月	超自然之戀	Chloé	葉榮煌、王耀祖
2023年6月	薄伽梵歌[68]	說書人	朱栢謙、鄒柏賢、林靖嵐、劉亭君、謝甲賢、張志豪、鄧天心

廣告代言

年份	產品
2016年	萊特維健阿膠氣血寶
2020至2023年	維特健靈維新烏絲素
2020年	Pitanium 表皮匠
2021年	Slimfinity Daily Pro-meal
2022年	中國人壽（海外）危疾保、醫療保、高端醫保、自願醫保
2022至2023年	大眾銀行

獎項同提名

萬千星輝頒獎典禮

年份	獎項	劇集	角色	結果
2012年	飛躍進步女藝員	《缺宅男女》 《On Call 36小時》 《飛虎》 《巴不得媽媽...》	唔適用	獲獎
2018年	馬來西亞最喜愛TVB女主角	《三個女人一個「因」》	方以因／ 菠蘿椰奶／ 愁擘擘	獲獎
	新加坡最喜愛TVB女主角			獲獎

MY AOD我的最愛頒獎典禮（中文：MY AOD我的最愛頒獎典禮）

年份	獎項	劇集	角色	結果
2012年	我的最愛最具潛質女藝人	《缺宅男女》	婁笑蘭	獲獎

壹電視大獎（中文：壹電視大獎）

年份	獎項	劇集	角色	結果
2013年	最搶鏡女配角	《缺宅男女》	婁笑蘭	獲獎

TVB 馬來西亞星光薈萃頒獎典禮（中文：TVB 馬來西亞星光薈萃頒獎典禮）

年份	獎項	劇集	角色	結果
2013年	最喜愛TVB電視角色	《On Call 36小時II》	洪美雪	獲獎
2015年		《拆局專家》	雷　蕾	獲獎
2016年		《律政強人》	方　寧	獲獎
2017年	最喜愛TVB綜藝節目	《胡說八道真情假期》	同胡杏兒、胡蓓蔚、胡定欣、李施嬅、姚子羚一齊攞獎	獲獎

星和無線電視大獎（中文：星和無線電視大獎）

年份	獎項	劇集	角色	結果
2013年	TVB飛躍進步藝人	唔適用	唔適用	獲獎
2016年	我最愛TVB電視女角色	《律政強人》	方　寧	獲獎
2017年		《雜警奇兵》	龍麗莎	獲獎

觀眾在民間電視大奬

年份	獎項	劇集	角色	結果
2018年	民選最佳女主角	《三個女人一個「因」》	方以因	獲獎

香港電視大獎（中文：香港電視大獎）

年份	獎項	劇集	角色	結果
2018年	女主角獎（劇集）	《三個女人一個「因」》	方以因	獲獎

明報周刊演藝動力大獎（中文：明報周刊演藝動力大獎）

年份	獎項	劇集	角色	結果
2018年	最突出女角色	《三個女人一個「因」》	方以因	獲獎
	我最支持的演藝動力大獎			獲獎

01娛樂民選港劇大獎

年份	獎項	劇集	角色	結果
2020年	最佳女主角[69]	《降魔的2.0》	莊芷若	獲獎

其他獎項

年份	頒獎/機構	獎項	結果
2017年	無綫電視	無線電視台十年長期服務員工獎	獲獎
2017年	新浪微博之星大獎2017	微博給力綜藝節目 -《胡說八道真情假期》	獲獎
2022年	最強人氣品牌大獎2022	最強人氣廣告女星	獲獎

獎項提名

年份	頒獎機構	獎項	劇集/節目	角色	結果
2011年	MY AOD我的最愛頒獎典禮2011	我的最愛最具潛質女藝人	《潛行狙擊》	蒙心凌	提名
	萬千星輝頒獎典禮2011	飛躍進步女藝員	《東張西望》 《居家兵團》 《怒火街頭》 《潛行狙擊》 《不速之約》	唔適用	提名
2012年	MY AOD我的最愛頒獎典禮2012	我的最愛電視女配角	《缺宅男女》	婁笑蘭	最後五強
	萬千星輝頒獎典禮2012	最佳女配角			最後兩強
2013年	TVB 馬來西亞星光薈萃頒獎典禮2013	最喜愛TVB女配角	《好心作怪》	夏思嘉	最後五強
	萬千星輝頒獎典禮2013	最佳女配角	《On Call 36小時II》	洪美雪	提名
2014年	星和無綫電視大獎2014	我最愛TVB女配角			最後十強
	TVB 馬來西亞星光薈萃頒獎典禮2014	最喜愛TVB女配角	《飛虎II》	蘇文強	提名
		最喜愛TVB電視角色			提名
	萬千星輝頒獎典禮2014	最佳女配角			提名
		最受歡迎電視女角色			提名
2015年	星和無綫電視大獎2015	我最愛TVB女配角			最後十強
	TVB 馬來西亞星光薈萃頒獎典禮2015	最喜愛TVB女配角	《師奶MADAM》	熊丹丹	提名
	萬千星輝頒獎典禮2015	最佳女主角	《拆局專家》	雷蕾	提名
		最受歡迎電視女角色	《師奶MADAM》	熊丹丹	提名
2016年	星和無綫電視大獎2016	我最愛TVB女主角	《律政強人》	方寧	提名
	TVB 馬來西亞星光薈萃頒獎典禮2016	最喜愛TVB女主角			最後五強
	萬千星輝頒獎典禮2016	最佳女主角			提名
		最受歡迎電視女角色			提名
2017年	星和無綫電視大獎2017	我最愛TVB女主角	《雜警奇兵》	龍麗莎	提名
	TVB 馬來西亞星光薈萃頒獎典禮2017	最喜愛TVB女主角			提名
		最喜愛TVB電視角色			提名
	萬千星輝頒獎典禮2017	最佳女主角			提名
		最受歡迎電視女角色	《降魔的》	莊芷若	最後五強
	觀眾在民間電視大奬2017	民選最佳女主角		莊芷若／Salvia	最後五強 (第二名)
		民選最佳資訊綜藝節目主持	《胡說八道真情假期》	胡定欣 姚子羚 黃智雯 胡蓓蔚 李施嬅 胡杏兒	最後六強 (第二名)
2018年	萬千星輝頒獎典禮2018	最佳女主角	《三個女人一個「因」》	方以因	最後五強
		最受歡迎電視女角色			最後五強
	明報周刊演藝動力大獎2018	最突出女藝員獎			最後五強
	微博之星2018	微博人氣電視劇女主角			最後五強
		微博年度熱劇角色			提名
		微博人氣電視劇拍檔		方以因 利東佳	同袁偉豪入圍最後五強
	觀眾在民間電視大奬2018	民選最佳戲劇拍檔			同袁偉豪入圍最後六強 (第三名)
	YAHOO!搜尋人氣大獎2018	電視女藝人	唔適用	唔適用	最後五強
2019年	萬千星輝頒獎典禮2019	最佳女主角	《街坊財爺》	朱瑪莉	提名
		最受歡迎電視女角色			提名
2020年	萬千星輝頒獎典禮2020	最佳女主角	《使徒行者3》	章紀孜	最後五強
		最受歡迎電視女角色			提名
		馬來西亞最喜愛TVB女主角			最後五強
	觀眾在民間電視大奬2020	民選最佳女主角	《十八年後的終極告白》	阮麗瑾	提名
			《降魔的2.0》	莊芷若	提名
			《使徒行者3》	章紀孜	提名
2021年	萬千星輝頒獎典禮2021	最佳女主角	《刑偵日記》	游雁星	提名
			《把關者們》	關佩欣	最後五強
		最受歡迎電視女角色	《刑偵日記》	游雁星	提名
			《把關者們》	關佩欣	提名
		馬來西亞最喜愛TVB女主角	《刑偵日記》	游雁星	提名
			《[把關者們》	關佩欣	提名
		最受歡迎電視拍擋		海鋒 關佩欣	同袁偉豪一齊被提名
	觀眾在民間電視大奬2021	民選最佳女主角	《刑偵日記》	游雁星	提名
			《把關者們》	關佩欣	最後十強 (第六名)
		民選最佳戲劇拍擋		海鋒 關佩欣	同袁偉豪一齊被提名
2022年	第三十屆香港舞台劇獎	最佳女主角（喜劇／鬧劇）	《超自然之戀》	Chloé	提名
2023年	萬千星輝頒獎典禮2023	最佳女主角	《隱門》	張心月	提名
		馬來西亞最喜愛TVB女主角			提名

攷

1. "黃智雯 Mandy 💞 (@wong_manman) posted on Instagram: "🌿🌾 #mylittlecorner" • Apr 16, 2021 at 2:37pm UTC". Instagram (英文). 原先內容歸檔喺2021-12-12. 喺2021-06-17搵到.
2. 〈【廉政狙擊】胡定欣為新劇角色失眠　黃智雯重拾結他廟街獻藝〉。Topick。2021-05-25。原先內容歸檔喺2021-05-25。喺2021-05-26搵到。
3. 凱藝娛樂 Supreme Art Entertainment
4. 〈【星馬視帝視后】黃智雯袁偉豪成雙料視帝視后〉。原先內容歸檔喺2020年10月12號。喺2020年1月24號搵到。
5. 〈觀眾在民間電視大獎2018結果〉。2018-12-11。原先內容歸檔喺2021-03-29。喺2021-03-29搵到。
6. 〈2018香港電視大獎——民選視后投票結果〉。2019-04-29。
7. 〈畢業生 - 舞蹈 - 香港演藝學院〉。www.hkapa.edu (英文)。原先內容歸檔喺2020-03-15。喺2019-01-28搵到。
8. 〈歷屆畢業生名單 - 校友 - 人物 - 香港演藝學院〉。www.hkapa.edu (英文)。原先內容歸檔喺2020-10-12。喺2019-01-28搵到。
9. 〈補習天后家姐帶挈關二嫂唐樓搬豪宅脫貧〉。《FACE第246期》。2012-02-08。原先內容歸檔喺2019-01-20。喺2020-01-31搵到。
10. 〈網友熱搜鵪鶉妹 黃智雯倒模曼玉捱出頭〉。《蘋果日報》。2010-04-30。原先內容歸檔喺2020-04-26。喺2020-01-31搵到。
11. 〈Bobby穿越千年 苦戀關詠荷 - 東方日報〉。orientaldaily.on.cc。原先內容歸檔喺2020-04-26。喺2021-06-17搵到。
12. 〈黃智雯第一次演反派〉。原先內容歸檔喺2020年4月26號。喺2020年1月31號搵到。
13. 〈【獨家專訪】黃智雯需要被人控制性格飄忽追求實在愛情〉。原先內容歸檔喺2017年11月16號。喺2020年1月31號搵到。
14. 〈第2屆 觀眾在民間電視大奬2017〉。《方以文 睇電視啦喂 Facebook》。2018-01-01。喺2022-01-21搵到。
15. 〈黃智雯不介意被封「星期日女王」：美劇都係一個禮拜一集啦〉。《香港01》。2018-03-01。原先內容歸檔喺2020-03-15。喺2020-01-31搵到。
16. 〈"星期日女王"黄智雯杀出重围〉。《羊城晚报》 (簡體中文)。2018-03-15。原先內容歸檔喺2020-04-26。喺2020-01-31搵到。
17. 〈【三個女人一個因】黃智雯為演「方以因」：日日上網睇真人病例〉。hk01。2018-04-11。原先內容歸檔喺2021-08-14。喺2021-08-14搵到。
18. 〈豆瓣網：三個女人一個「因」〉。喺2018-04-29搵到。
19. 〈《三個女人一個「因」》終於有足本版　公開57分鐘未刪剪情節〉。《U港生活》。2018-04-23。原先內容歸檔喺2021-08-14。喺2021-08-14搵到。
20. 〈黄智雯赴纽约任表演嘉宾登上"世界第一屏"：开心到飞起！〉。《搜狐》。2018-09-17。原先內容歸檔喺2021-08-18。喺2021-08-18搵到。
21. 〈袁偉豪黃智雯得獎打孖上 膺星馬雙料視帝視后〉。《明報OL網》。2018-11-20。原先內容歸檔喺2018-11-20。喺2020-01-31搵到。
22. 〈觀眾在民間電視大獎2018結果〉。《方以文 睇電視啦喂 Facebook》。2018-12-11。原先內容歸檔喺2021-03-29。喺2021-03-29搵到。
23. 〈2018香港電視大獎——民選視后投票結果〉。《游大東 Instagram》。2019-04-29。
24. 〈選韓團扮後生！36歲黃智雯同鮮肉堆冇代溝〉。《東網 娛樂》。2019-01-16。原先內容歸檔喺2020-06-07。喺2020-06-07搵到。
25. 〈《一個因去跳舞》黃智雯挑戰K-Pop舞蹈訓練　Mandy跳到體力不支入院〉。HKET。2019-01-23。原先內容歸檔喺2020-06-07。喺2020-06-07搵到。
26. 〈愛情長跑8年有結婚計劃 黃智雯自信勝任做賢妻〉。《明報》。2020-05-06。原先內容歸檔喺2020-06-21。喺2020-06-07搵到。
27. 〈【降魔的2.0】黃智雯被上身戲獲激讚　慘被封「戲份最少女主角」〉。《香港01》。2020-05-29。原先內容歸檔喺2020-06-07。喺2020-06-07搵到。
28. 〈兩劇疊住上！黃智雯為着背心狂操上半身〉。《東網 娛樂》。2020-05-01。原先內容歸檔喺2020-06-07。喺2020-06-07搵到。
29. 〈01娛樂民選港劇大獎結果〉。《01 娛樂》。2021-01-10。原先內容歸檔喺2021-02-12。喺2021-01-10搵到。
30. 〈黃智雯演活「學者症候群」患者被讚演技有深度 入行13年再度衝擊視后〉。《U港生活》。2021-01-03。原先內容歸檔喺2021-03-25。喺2021-03-24搵到。
31. 〈刑偵日記｜黃智雯與男友有共識　唔擔心做高齡產婦：高齡咗好耐啦〉。hk01。2021-07-07。{{cite news}}: CS1 maint: url-status (link)
32. 〈黎諾懿減十磅谷胸肌　黃智雯麒麟臂油淋淋〉。《東網》。2020-05-26。原先內容歸檔喺2021-12-12。喺2021-06-17搵到。
33. 〈【黃智雯專訪】仿真防爆衣重80磅 黃智雯練大隻做拆彈專家 演舞台劇患「完show後遺症」〉。《明周娛樂》。2021-07-10。原先內容歸檔喺2021-07-27。喺2021-08-01搵到。
34. 〈袁偉豪黃智雯新劇演夫妻 拍牀上戲齋傾偈冇動作〉。《明報》。2021-01-14。
35. 〈把關者們︱黃智雯演技大爆發！　崩潰情緒逐級遞進觀眾睇到眼濕濕〉。hk01。2021-10-06。原先內容歸檔喺2021-10-06。喺2021-10-06搵到。
36. 〈把關者們｜黃智雯演技爆發 盡顯小產之痛〉。am730。2021-10-06。原先內容歸檔喺2021-10-06。喺2021-10-06搵到。
37. 〈【把關者們】黃智雯戲份不及女二網民感不值　Mandy多層次演技騷實力〉。Topick。2021-10-06。原先內容歸檔喺2021-10-06。喺2021-10-06搵到。
38. 〈搵譚嘉儀教路惡補歌喉 黃智雯拍拖十年即興結婚｜黃智雯專訪〉。《明周娛樂》。2023-03-17。喺2023-03-24搵到。
39. 〈隱門｜黃智雯瘋狂被虐待險抑鬱　拍完返到屋企仲驚緊：抽離唔到〉。hk01。2023-05-25。喺2023-05-26搵到。 {{cite web}}: Cite has empty unknown parameter: |dead-url= (help)
40. 〈黃智雯拍劇崩潰似衝落懸崖〉。《東網》。2023-06-29。喺2023-07-03搵到。 {{cite web}}: Cite has empty unknown parameter: |dead-url= (help)
41. 〈吳岱融憑《隱門》奸角受觀眾歡迎　黃智雯都話怕怕〉。《星島日報》。2023年6月4日。喺2023年6月5日搵到。
42. 〈名人雜誌丨黃智雯勢爭視后：仲有路障未衝破　監製王心慰爆《隱門》結局三大綫索〉。《星島網》。2023年6月25日。喺2023年6月30日搵到。
43. 〈【隱門】黃智雯冬天親身落水演戲　Mandy殮房爆喊戲獲讚冇得頂〉。Topick。2023年6月3日。喺2023年6月6日搵到。
44. 〈【隱門】心月黑化終極大暴走　黃智雯過足戲癮：演員夢寐以求嘅角色〉。Topick。2023年6月22日。喺2023年6月23日搵到。
45. 〈隱門｜黃智雯純純兔黑化升級癲得好勻洵 兩分半鐘極速變臉狠樣三連環晒層次式演技〉。《港生活》。2023年6月27日。喺2023年6月27日搵到。
46. 〈戚其義點名演出！黃智雯以最佳狀態「出戰」內地劇〉。《東網》。2022-03-11。喺2022-03-13搵到。{{cite news}}: CS1 maint: url-status (link)
47. 〈馬德鐘唔介意新劇「執四攤」　黃智雯自加親熱戲自肥〉。《東網》。2022-08-24。喺2022-08-24搵到。{{cite news}}: CS1 maint: url-status (link)
48. 〈超自然之戀〉。french may。2021-03-30。原先內容歸檔喺2021-04-02。喺2021-03-30搵到。
49. 〈男友觀戰讚精彩！黃智雯咀仔過百次嗌未夠喉〉。on.cc。2021-05-16。原先內容歸檔喺2021-12-12。喺2021-06-17搵到。
50. "BWW Review: LARGER THAN LIFE at Hong Kong City Hall Theatre". broadway.com. 2021-05-16. 原先內容歸檔喺2021-05-16. 喺2021-06-01搵到.
51. 〈第三十屆香港舞台劇獎提名名單〉。《香港戲劇協會 Instagram》。2022-02-26。
52. 〈香港舞台劇獎｜黃智雯憑《超自然之戀》獲提名劇后「其實我很鍾意演喜劇」〉。《明周娛樂》。2022-02-27。
53. 〈力爭舞台劇劇后　黃智雯入圍當攞咗〉。《東網》。2022-02-28。
54. 〈【隱門x薄伽梵歌】黃智雯遇樽頸盼觀眾見到突破 自言未有結婚衝動不怕不婚即分〉。Topick。2023-06-13。喺2023-06-22搵到。 {{cite news}}: Unknown parameter |dead-url= ignored (|url-status= suggested) (help)
55. 〈袁偉豪黃智雯新劇演夫妻 拍牀上戲齋傾偈冇動作〉。《明報》。2021-01-14。
56. 〈袁偉豪黃智雯得獎打孖上 膺星馬雙料視帝視后〉。《明報OL網》。2018-11-20。原先內容歸檔喺2018-11-20。喺2020-01-31搵到。
57. 〈黄智雯获飞跃进步女艺员奖 感谢"老公"梁烈唯〉。原先內容歸檔喺2021年12月12號。喺2021年8月1號搵到。
58. 〈羅仲謙對厭黃智雯嗌分手〉。on.cc。2012-09-28。原先內容歸檔喺2021-06-03。喺2021-06-03搵到。
59. 〈【黃智雯專訪】仿真防爆衣重80磅 黃智雯練大隻做拆彈專家 演舞台劇患「完show後遺症」〉。《[[明周]]娛樂》。2021-07-10。原先內容歸檔喺2021-07-27。
60. 〈《使徒行者3》林峯返娘家 馬國明黃智雯再續前緣〉。《頭條日報》。2020-10-07。原先內容歸檔喺2021-06-04。
61. 〈【三個女人一個因】合作9年　潘嘉德激讚黃智雯：冇令我失望過〉。hk01。2018-03-16。原先內容歸檔喺2021-01-18。喺2021-06-03搵到。
62. 〈【廉政狙擊】黃智雯與家人合資開網店　未忘初心想開舞蹈學校〉。Topick。2023-03-11。喺2023-03-11搵到。
63. 〈「胡說八道會」澳洲Trip正式出發〉。原先內容歸檔喺2017-08-16。喺2020-01-24搵到。
64. 〈Crazy Runner拜年團 一對對甜蜜放閃〉。《東方日報》 (香港中文)。原先內容歸檔喺2021-01-28。喺2021-06-17搵到。
65. 〈降魔的偷跳小隊〉。2020-05-02。原先內容歸檔喺2021-04-22。喺2021-04-20搵到。
66. 〈黃智雯趙希洛法國閨密遊 互拍最「Dus」時刻〉。《明周娛樂》 (美國英文)。2019-12-05。原先內容歸檔喺2021-04-10。喺2019-12-31搵到。
67. 〈視后黃智雯隨時閃婚：胡說八道已揀好姊妹裙〉。《東網 娛樂》。2018-11-24。原先內容歸檔喺2020-04-26。喺2020-01-24搵到。
68. 〈鄧樹榮導演最新作品《薄伽梵歌》〉。《鄧樹榮戲劇工作室 Facebook》。2023-04-21。
69. 〈01娛樂民選港劇大獎結果〉。《01娛樂》。2021-01-10。喺2021-01-10搵到。

出面網頁

• 黃智雯喺香港影庫嘅資料（香港繁體）
• BLOG | Welcome to Mandy's Blog - Yahoo! BLOG
• 黃智雯嘅新浪微博
• 黃智雯嘅Instagram頁
• 黃智雯嘅facebook頁