金融市場

金融市場（粵拼：gam1 jung4 si5 coeng4；英文：financial market）係指畀啲人以低交易成本嚟交易金融產品（證券同金融衍生工具等）嘅市場。

2007 年影到嘅香港交易所交易大堂；喺 2020 年代初，香港交易所係全世界最大嘅證券交易所之一，有成超過 2,500 間公司嘅股票喺度畀人買賣^[1]。

基礎概念

内文：金融同市場

睇埋：投資同資金

「金融機構係文明社會其中一條支柱，幫手將啲資源引導去能夠最有效噉用佢哋嘅時空，支援同誘使啲人做出有生產力嘅建設，同埋管控佢哋孭起嘅經濟風險。」^[2]

－著名耶魯大學經濟學家羅拔·蕭拿（Robert Shiller）

金融市場源自啲人買賣證券：喺一個有咁上下健康嘅經濟體當中，啲人應該會想做生產，滿足啲人嘅慾望；不過要搞生意做生產，好多時都要使好多錢－生產者要買物資用嚟做生產^{[註 1]}，又要請人幫手做嘢... 呀噉；喺廿一世紀初嘅世界，有志創業嘅人可以同自己嘅公司做招股上市，即係向股市嘅投資者公開噉賣自己間公司嘅股票；揸住啲股票嘅人算係間公司嘅擁有者，間公司賺到錢佢哋可以有份分，所以成件事對買賣雙方嚟講都可以好著數^[3]－

• 對賣家嚟講，賣到自己啲股票，佢就可以籌集到資金做生意；
• 對買家嚟講，（假設佢眼光夠好）買到「第時價值會勁升」嘅公司嘅股票，佢將來就有可能會賺到好多錢^{[註 2]}；

債券原理同股票都好類似，分別在於債券比較似係「借錢」畀賣家，揸住債券嘅人冇份「擁有」間公司。

响廿一世紀初嘅世界，金融市場仲會涉及埋好多買家同賣家以外嘅人，包括咗－

• 金融市場會涉及理財計劃師等嘅工作人員，呢啲人員會向買賣雙方提供好多服務，簡單例子有「提供有關股價同市場趨勢嘅資訊」；
• 政府人員又會介入金融市場嘅事務－由政府嘅角度睇，一個經濟體要增長，就需要啲人有返咁上下意慾做投資，啲人買股票等嘅金融產品，啲企業就能夠攞到資金嚟擴充業務，達致「開創工作機會」等嘅效果；因為噉，政府有強烈誘因想調節金融市場入面發生緊乜事，會定立同實行法律，嚴懲（例如）「報假消息嚟引投資者買某隻股」嘅人^[4]。

喺廿一世紀初嘅世界，證券係最受歡迎嘅投資方式之一：有報告指，買賣股票係成為百萬富翁其中一種最常見嘅方法^{[註 3][5]}；好多人都會揸住啲股票，等自己嘅儲蓄可以越轆越大，而市面上仲有 apps 專門設計嚟畀人買賣股票，提供埋「畀人用虛擬嘅錢練習買賣」等嘅功能^[6]。响 2020 年尾，全球公開噉畀人買賣嘅證券嘅市值，據估計有成大約 93.7 T 美金－當中 1 T = 10¹²－咁多^[7]。

評估方法

睇埋：經濟測量、經濟指標、標準差同統計分析

有份參與金融市場活動嘅人，一般都會想搵方法評估「啲嘢嘅價掂唔掂」：如果有位投資者想做決策決定買邊間公司嘅股票或者債券先好，正路實要評估吓各公司嘅表現係點；而處理金融事務嘅政府人員又會想定時定候判斷吓個市場係處於咩情況，從而決定自己使唔使郁手介入。

要留意嘅係，金融市場係複雜系統^[8]，複雜系統嘅行為本質上就冇得完美 100% 精確噉量度同預測嘅，梗會或多或少噉有啲不確定存在，而且仲出嗮名成日有混沌行為。有關不確定嘅問題要點應付，可以睇吓統計學同概率論上嘅概念。

個別公司

睇埋：財務報表同股息

要評價一間公司「個勢係點，啲股值唔值得買」，可以用到好多種指標^[9]：

• 市淨率（P/B）：一間公司嘅市淨率係指以下呢個數值

  每單位股嘅市場價格（P） ${\displaystyle /}$ 每單位股嘅帳面價值（B），

  • 當中帳面價值係指間公司嘅所有資產加埋再扣返佢啲負債；簡化噉講，市淨率反映緊「間公司啲股嘅價，有幾受到市場低估」－如果市淨率數值愈細，就愈係表示間公司嘅價受到低估；有好多投資者都相信，要靠投資賺多啲錢，實要勁走去買啲價值受低估嘅股票，再等呢啲股嘅價升返去「應有水平」先嚟賣（價值投資），所以呢啲投資者就成日都會靠住市淨率嚟搵出「邊間公司最受低估」，通常會係想市淨率細過 1。
• 市盈率（P/E）：顧名思義係指^[10]

  每單位股嘅市場價格（P） ${\displaystyle /}$ 每單位股賺到幾多盈利（E），

  • 一般認為，一間公司要有長遠嘅未來可言，一定要持續噉擴充自己嘅業務，而噉亦表示佢賺到嘅盈利一定要有返咁上下，亦表示佢嘅市盈率數值唔可以太大，大得滯就表示有「啲人好似好睇好間公司，但間公司查實唔係好賺到錢」噉嘅情況。
• 亦有好多投資界人士主張，市盈率有陣時會誤導人，於是諗出咗啲市盈率嘅變體，想更加準確噉反映一間公司個勢係點，好似係本益成長比（PEG）噉：有研究者指，如果一間公司增長得好勁，佢哋嘅市盈率好多時會一時之間漲咗，搞到間公司就噉望落好似「啲價高得滯」噉樣；所以呢啲研究者就提議要考慮埋一間公司嘅實質^{[註 4]}增長率，而 PEG 就係指

  市盈率 ${\displaystyle /}$ 間公司預會增長幾多（用 EPS 嘅增長嚟量度），

  • 當中 EPS 係指 earning-per-share（每單位股產生嘅盈利）。一般認為，PEG 嘅數值低過 1 先算係值得投資^{[註 5]}。

... 呀噉。普遍嚟講，每隻指標都梗會有啲甩漏（有啲重要資訊係佢反映唔到嘅），所以投資者起碼要睇勻嗮多隻指標，先至可以做決定。

亦有好多投資者會留意啲指標之間嘅統計相關（correlation）：統計相關係統計學上成日用嘅一個數值；簡單啲講，統計相關會係一個處於 -1 同 +1 之間嘅數，如果兩間公司嘅股價有正嘅相關值，就表示佢哋嘅股價傾向一齊升或者一齊跌；而如果兩間公司嘅股價有負嘅相關值，表示佢哋嘅股價傾向一隻升一隻跌。統計相關被指係可以提供到好多有用嘅資訊^[11]，例如一位投資者正常就會想手上嘅資產彼此之間唔好有太勁嘅相關；除此之外，如果市場啲股之間有好勁嘅正相關，有人士會覺得噉係表示緊投資者有強烈嘅羊群行為^[12]。

市場整體

内文：股價指數

投資者做投資決策嗰陣，往往會想睇吓個市場整體個勢係點，睇完先至去睇個別公司嘅走勢。股價指數（stock market indices）泛指一系列嘅數值，要計一隻股價指數，分析者會睇勻市場嘅各變數－例如係某類股票嘅股價，再由呢啲變數嗰度計一個數值出嚟，個數值反映有關嗰拃變數嘅資訊。用日常用語嚟講，即係話一隻股價指數會反映個市場整體個勢係點^[13]。

• 恒生指數
• 日經平均指數（Nikkei 225）
• 標準普爾 500 指數（S&P 500）
• 道瓊斯工業平均指數（Dow Jones）

投資風險

内文：金融風險

睇埋：概率論同平均

投資呢家嘢，梗會有風險。因為噉，對投資有返咁上下熟嘅人做投資嗰陣，都實會搵啲方法嚟衡量單投資有幾大風險，途中會用到概率論等嘅好多數學方法。

例如受險價值（value at risk，VaR）就係金融相關分析上成日用嘅一隻統計數字，會反映指定一單投資同一段時期，一位投資者（投資者可以係個人以至成間公司）「最多可以唔見幾多錢」，籠統啲講即係話 VaR 反映緊位投資者承受住幾多嘅風險；正常嚟講，計 VaR 應該會得出好似以下噉嘅資訊^[14]－

「手上睇緊嗰件資產，有 3% 嘅 1 個月 2% VaR」

上面句嘢意思係話，喺嚟緊嗰 1 個月之內件資產有 3% 咁大嘅機率價值會跌 2% 咁多。抽象化啲嘅話

「手上睇緊嗰件資產，有 x% 嘅 [時段] y% VaR」

→ 呢句嘢意思等同「喺嚟緊 [時段] 咁耐嘅時間內，件資產有 x% 咁大嘅機率價值會跌 y% 咁多」。 VaR 有多種計法，最簡單嗰隻係走去睇返件資產嘅過往紀錄，並且假設將來嘅走勢會同過往嘅相似（或者最少唔係爭咁遠），睇吓件嘢過往跌得最勁係試過跌幾多，同埋噉嘅跌勢有幾常發生^{[註 6][15]}。

應對風險

内文：多角化投資

睇埋：風險管理同保險

投資者有好多技巧可以用嚟應付投資常見嘅風險。

• 多角化投資（diversification）：指投資者套投資組合持有多種唔同嘅資產，即係例如一位投資者揸住啲股票又同時揸住啲債券，唔淨只揸住單一一款資產；又或者會揸吓啲大（大通常即係穩定）嘅公司嘅股票，同時又會揸吓啲細嘅新創公司嘅股票；又可能係手上同時揸住基於美國嘅資產、又揸住基於日本嘅資產、又揸住基於歐洲嘅資產... 呀噉^[16]。
• 證券投資基金（investment fund）：指成班投資者將佢哋啲錢夾埋一齊，跟住再（通常）請返個識做投資管理嘅人幫佢哋手攞呢嚿錢去做投資；例如一班人將佢哋嘅錢夾埋一齊，有 100 萬美金，跟住佢哋請位投資管理者幫佢哋手攞嚿錢去投資，最後嚿錢變咗 200 萬，班人就齊齊將賺到嗰 100 萬攞去分咗佢。一般認為證券投資基金有唔少好處，包括係規模經濟（交易成本低）同埋一班人一齊承擔風險呀噉^[17]。
• 短倉（short）：一類進階嘅投資做法（唔建議投資新手用），泛指一啲「預件資產價值會跌，跌咗就會有利可圖」嘅做法；最常見嘅做法係賣空－想像依家位投資者借一件資產返嚟，再賣咗件資產佢，等到遲啲佢就要買返件資產返嚟還畀債主，如果期間件資產嘅價跌咗，噉呢位投資者就有賺^[18]。

金融危機

内文：金融危機

睇埋：金融壓力測試同企業紓困

例子可以睇吓經濟泡沫。

功效

金融市場對經濟體嚟講有各種嘅作用：

1. 可以方便執行貨幣政策。
2. 就商業銀行而言，可使其資金運用效率提高，尤其負債管理觀念形成後更明顯。
3. 對企業嚟講，可以提供資金出路，或者提供資金融通。
4. 對個人嚟講，係個人儲錢嘅工具，提升個人儲錢投資嘅意願同埋收益。
5. 對政府嚟講，金融市場承購政府債券，可以令政府少啲向央行借錢，搞到通貨膨脹，亦都令政府資金有出路。

睇埋

• 保險同大數定律
• 複雜系統同混沌
• 未來學

註釋

1. 可以睇吓固定資本嘅概念。
2. 不過「齋靠一隻股票嚟賺大錢」呢家嘢其實好少有，一般認為係可遇不可求。
3. 有兩點要講清楚返：
   a) 呢度講緊嘅係 self-made 噉成為百萬富翁－即係話佢哋做到百萬富翁，唔係靠由屋企人（或者第啲來源）嗰度繼承財產嘅。
   b) 呢度講嘅「百萬」係以美金計嘅。
4. 實質即係指啲數值考慮埋通脹嘅影響。
5. 可以睇吓呢篇文（英文）。
6. 但呢種做法畀人詬病，話佢容易受到黑天鵝效應影響－簡單講，黑天鵝效應係指「一啲有可能，但打前未發生過嘅事」。亦可以睇埋歸納嘅相關問題。

文獻

• Attanasio, O., Barr, A., Cardenas, J. C., Genicot, G., & Meghir, C. (2012). Risk pooling, risk preferences, and social networks. American Economic Journal: Applied Economics, 4(2), 134-167.
• Bogle, John Bogle (2007). The Little Book of Common Sense Investing: The Only Way to Guarantee Your Fair Share of Stock Market Returns. John Wiley and Sons.
• Graham, Benjamin; Jason Zweig (2003-07-08) [1949]. The Intelligent Investor. Warren E. Buffett (collaborator) (2003 ed.). HarperCollins.
• Haas, M., & Pigorsch, C. (2009). Financial Economics, Fat-Tailed Distributions. Encyclopedia of Complexity and Systems Science, 4(1), 3404-3435，呢篇文比較專，睇嘅人起碼要有啲統計底。研究者有講到條問題，就係金融市場嘅走勢唔多似係跟常態分佈（社科上最常用嗰隻概率分佈），而且個實際分佈似係有相當嘅峰度，易出現極端數值。
• Mahdizadeh, M., & Zamanzade, E. (2019). Goodness-of-fit testing for the Cauchy distribution with application to financial modeling. Journal of King Saud University-Science, 31(4), 1167-1174.
• 馮邦彥 (2016) 香港金融與貨幣制度，三聯書店有限公司。

攷

1. "HKEX Monthly Market Highlights". www.hkex.com.hk. Retrieved 22 January 2021.
2. Financial Markets: Prof. Robert Shiller, Yale University，原句："Financial institutions are a pillar of civilized society, directing resources across space and time to their best uses, supporting and incentivizing people in their productive ventures, and managing the economic risks they take on."
3. What is a stock exchange? Understanding the marketplace where shares are bought and sold. Personal finance.
4. "Securities Fraud Awareness & Prevention Tips faq by FBI, accessed February 11, 2013.
5. How Most Millionaires Got Rich. BND.
6. How can I get more virtual money to trade in my Demo account?. Plus500 FAQ.
7. Market capitalization of listed domestic companies (current US$). The World Bank.
8. Münnix, M. C., Shimada, T., Schäfer, R., Leyvraz, F., Seligman, T. H., Guhr, T., & Stanley, H. E. (2012). Identifying states of a financial market. Scientific reports, 2(1), 1-6.
9. Pae, J., Thornton, D. B., & Welker, M. (2005). The link between earnings conservatism and the price‐to‐book ratio. Contemporary Accounting Research, 22(3), 693-717.
10. Anderson, K., & Brooks, C. (2006). The long‐term price‐earnings ratio. Journal of Business Finance & Accounting, 33(7‐8), 1063-1086.
11. Oil, Stocks at Tightest Correlation in 26 Years. The Wall Street Journal.
12. CHART OF THE DAY: S&P 500 Correlations Hit Record As Stocks Move En Masse. Insider.
13. What Is a Stock Market Index?. The Motley Fool.
14. Value at Risk (VaR). CFI.
15. Feuerverger, A., & Wong, A. C. (2000). Computation of value-at-risk for nonlinear portfolios. Journal of Risk, 3, 37-56.
16. Medo, M., Yeung, C. H., & Zhang, Y. C. (2009). How to quantify the influence of correlations on investment diversification. International Review of Financial Analysis, 18(1-2), 34-39.
17. Goetzmann, William N.; Rouwenhorst, K. Geert (2005). The Origins of Value: The Financial Innovations that Created Modern Capital Markets. (Oxford University Press.
18. Short sellers make VW the world's priciest firm. Reuters.

拎

• 香港 - 金融市場（繁體中文），Investing.com
• 香港國際金融中心的地位（繁體中文）
• 广东金融学院（簡體中文）
• Financial Markets: Role in the Economy, Importance, Types, and Examples（英文），Investopedia 呢篇文簡介金融市場嘅概念。
• Law of Large Numbers: What It Is, How It's Used, Examples（英文），Investopedia 呢篇文講到大數定律對投資者嚟講有咩用。
• The 4 Basic Elements of Stock Value（英文），Investopedia 呢篇文有講到一隻股票嘅價由邊啲因素話事。