野比大雄

  「大雄」跳轉到呢度。想搵專輯，請睇「大雄 (專輯)」。

野比大雄（粵拼：je5 bei2 daai6 hung4，日文：野比 のび太，8月7號—，舊譯葉大雄、野比太、大寶等等）係日本漫畫多啦A夢嘅虛構角色，野比大助同野比玉子個獨生仔。唔鍾意返學，體育更加係極之水皮。不過，佢有愛心、重感情、有義氣、槍法勁、至叻玩花繩。成日俾胖虎蝦。大個同源靜香結婚。

野比 大雄
日文原名	野比 のび太（のび のびた）
配音	太田淑子→小原乃梨子→大原惠 曾慶珏／盧素娟／曾慶珏／陸惠玲
簡介
第啲名	大雄
年紀	10歲
性別	男
星座	獅子座
身高	140cm
體重	45kg
出世	8月7號 日本東京都練馬區
國籍	日本
職業	小學生
屋企人	亞爸：野比大助 亞媽：野比玉子
資料
鍾意嘅嘢	睏晏覺、玩花繩、射擊
拿手嘢	考試食蛋、遲到
老婆	靜香（第時）
仔女	野比雄助（第時）

介紹

住喺日本東京都練馬區嘅月見台鈴木原道，雖然時代改變緊，但係佢一直以東京小學生嘅身份出現，永遠都係十歲。

缺點

• 頭腦唔好，考試攞零分多過食飯，得兩次喺算術測驗攞到100分^[1][2]，佢覺得只要攞到十分就好滿足^[3]，攞30分，佢阿媽就好開心^[4]，但係，喺佢媽媽差嗰陣，考50分媽媽反而覺得好平常。同得85分就畀佢媽鬧嘅靜香形成鮮明對比^[5]，平均每五次考試就有一次係零分^[6]（有啲版本係每十次考試三次零分），到咗後期有好轉，每十次考試一次零分^[7]，都算有啲進步，連自己嘅名都會寫錯，成日將野比のび太（「太」字喺日本係三年級漢字）寫成野比のび犬（「犬」字喺日本係一年級漢字）。
• 運動又渣又水皮。成日因為接唔實棒球俾胖虎鬧，因為噉胖虎就安排大雄喺棒球比賽入邊做執波嘅角色。其他運動都好差，例如跳箱成日跳唔過，跑步慢摩摩。
• 懶，因而成日俾父母老師鬧
• 依賴多啦A夢，每次有乜委屈或畀人蝦就即刻返屋企對住多啦A夢扭計，仲成日用多啦A夢嘅法寶整蠱人，玩到忘嗮形，成日搞到一鑊泡。
• 唔識反省。每次用多啦A夢借畀佢嘅法寶，都鑊鑊新鮮鑊鑊金，但係仍然唔肯改。
• 成日欠交功課，因此經常被老師要求去走廊罰企。欠交功課嘅原因係唔記得或唔想做功課。佢做功課好難持之以恆，最長時間為48分23秒，最短時間為3分30秒。
• 成日遲起身，搞到返學遲到。
• 睇到唔係漫畫嘅書就會腦筋混亂、頭昏眼花。
• 偷睇靜香沖涼。
• 鍾意嫉妒人哋，特別係小夫，成日因為睇唔慣小夫嘅曬命而要多啦A夢攞道具出嚟幫佢。
• 成日不問自取，特別係未來百貨公司送錯畀多啦A夢，放喺房等候退回嘅道具。

優點

• 心地本為善良，並樂於助人，對動植物同玩具都好有同情心（有例外），曾願意放棄自己嘅禮物，換取人哋嘅快樂^[8]，有時會用多啦A夢嘅法寶行俠仗義。
• 好叻玩花繩同射擊（射擊命中率接近100%，係個好有天賦嘅神射手；識好多花繩招式，仲識得自創花臣）。
• 愛錫大自然、小動物同植物。因此就算佢阿媽唔畀佢養寵物，佢有時都會靜雞雞將啲整親嘅小動物帶返屋企照顧。
• 對漫畫好有眼光，只要係畀佢讚過得意嘅作品，第時都會出名^[9]。
• 喺多啦A夢大長篇嘅緊要關頭，通常表現得勇敢、突出。
• 有時都會嘗試發奮圖強，嘗試自己去面對困難。雖然淨係維持咗好短時間，但係都可以睇到佢發奮嘅心。

鍾意嘅嘢

• 玩花繩好叻，好有研究。經常自創唔同嘅花式，五花八門。並希望得到朋友嘅認同，但係通常都冇受到重視。所以成日攞多啦A夢嘅道具嚟宣傳自己嘅花繩枝術。
• 好鍾意射擊，平時會用文具（例如鉛筆）嚟練習。命中率超高，接近100%。喺大長編或第啲冒險度，危險關頭通常係因為佢射擊嘅高命中率起關鍵作用。
• 鍾意睇漫畫，會因為睇漫畫而唔做功課，上緊堂嗰陣都會偷偷睇漫畫。

參攷

1. 第25卷「什，什麼！！大雄得了100分！！」
2. 〈「趕走外星人！」(18:37/21:29)〉。原著喺2019-06-30歸檔。喺2011-06-14搵到。
3. 第28卷「危險！小夫的答案」
4. 第20卷「幸運丸」
5. 第21卷「快活大道」
6. 第23卷「學校轉來一個差生」
7. 第42卷「鑽進去吧！蛤蜊箱」
8. 「好事積分卡」結尾
9. 第37卷「大人氣！克利斯丁·胖妹老師」