萬聖夜

  「萬聖節」跳轉到呢度。想搵其他用法，請睇「萬聖節 (搞清楚)」。

萬聖夜maan6 sing3 je6（英文：Halloween，可以借入粵語做粵拼：haa1 lou1 win1）係嚟自西方世界嘅一個傳統節慶，每年喺10月31號嗰陣舉行。

積克南瓜燈

喺廣東話入面，萬聖夜又有叫西洋盂蘭節sai1 joeng4 jyu4 laan4 zit3^[1][2]、哈囉喂haa1 lou2 wai3、鬼佬盂蘭（節）gwai2 lou2 jyu4 laan4 zit3^[3][4]、（番）鬼佬鬼節faan1 gwai2 lou2 gwai2 zit3^[5][6][7]，之不過坊間好多人講萬聖節，查實係萬聖節前夕至真^[8]。呢個節慶係北美同埋英倫諸島至多人過，跟住係澳洲同紐西蘭。嗰晚細路會扮鬼扮馬，逐家逐戶拍門𠼮人畀糖果過佢哋，佢哋見人應門就會講 Trick or Treat（呢三個字直譯係「整蠱定甜頭」，意譯做「唔畀糖就搞搞震」又得，言下之意即係「而家是必要你揀，一係派糖過我，一係整鬼你）。聽到呢句說話，屋主就習慣派糖果過佢哋。

詞源

睇埋：諸聖日

萬聖夜嘅英文「Halloween」其實係「All Hallows' Eve」嘅縮寫，類似平安夜嘅「Christmas Eve」噉，係指「萬聖日」（All Hallows' Day，又叫All Saints' Day）嘅前一晚。

事實上 ｢Halloween｣ 有個舊串法 ｢Hallowe’en｣，當中嘅 ｢e’en｣ 就係 ｢even｣（即係 eve，前夕）嘅減筆。

傳統

萬聖夜嘅兩個傳統活動，化粧同攞糖（英文：Trick-or-treating）（Trick-or-Treating）^[9][10]其實都有意思。化粧其實係為咗喺百鬼夜行嘅萬聖夜，裝扮到比鬼怪更加得人驚，噉就可以嚇走佢哋，唔驚俾佢哋騷擾。而拍門攞糖嘅行為其實係重現返中世紀時期，一啲窮人會喺萬聖節當日逐家逐戶去拍門問人攞嘢食，然後喺第二日追思節為嗰啲家庭已故嘅成員祈禱嘅舉動。

萬聖夜嘅主題係鬼怪、嚇人，以及同死、魔法、怪物有關嘅事物。而通常同萬聖夜扯上關係嘅事物有鬼魂、食屍鬼、巫婆、蝙蝠、黑貓、貓頭鷹、精靈、殭屍、骷髏同惡魔等，重有虛構人物例如吸血殭屍同科學怪人。

黑色同橙色係萬聖夜嘅傳統色，但而家萬聖夜嘅產品亦都會用紫色、綠色同紅色。而秋天嘅元素例如南瓜同稻草人等，都係萬聖夜嘅象徵。

雖然傳統上萬聖夜嘅化粧係扮鬼，但係而今嘅流行做法已經唔一定係扮鬼。例如，喺北美好多人會扮例如超級英雄、扮公主等等，有啲基督徒就反轉會扮聖人。

睇埋

• 恐怖故仔
• Macabre

註

1. Katy扮希拉莉遭翻舊帳控侵權
2. 萬聖節食品
3. 蘭桂坊的徒子徒孫 - 鄧達智
4. 圣诞惊艳
5. 驚青鬼星座
6. 【劉郎憶新】劉天賜｜萬聖節
7. 製17呎鬼王供人捐腳底　紙紮大王　鬼節賺百萬
8. 《瀛寰搜奇》 (香港中文)。香港：讀者文摘。1978年。頁 287。
9. 為萬聖燈籠續命的南瓜
10. 成千上萬的美國人慶祝萬聖節