簡化字

簡化字（粵拼：gaan2 faa3 zi6），又稱簡體中文、簡化中文，粵語又有簡筆字、簡體字、減筆字之稱，係1960年代中華人民共和國喺中國共產黨主導下所作嘅漢字簡化標準，而相對於傳統漢字（繁體中文）。

  呢篇文講中華人民共和國以《簡化字總表》為主嘅中文標準。想搵古代嘅簡筆俗字同埋其他簡化字標準嘅話，請睇簡體字。

簡化字
類型：	意音文字
語言：	漢語
使用時期：	20世紀60年代到而家
母書寫系統：	中文字  甲骨文   金文    篆書     隸書      傳統字       簡化字
姊妹書寫系統：	日本新字體
ISO 15924 碼：	Hans

由於當時中國文盲較多，1956年《漢字簡化方案》發表，幾年研究之後，1964年發表《簡化字總表》。之後字表雖然有啲變動，但基本沿襲呢份《總表》，喺中國大陸、星加坡、馬來西亞成爲簡化字嘅官方標準。

喺《總表》入面總共收咗2274隻簡化字同14個簡化偏旁，分4部分：第一表收350字，係唔做得簡化偏旁嘅簡化字；第二表收132字同埋14個簡化偏旁，係做得簡化偏旁嘅簡化字；第三表係參照第二表整出來嘅類推簡化字，收1753字；最後係附錄，收錄從《第一批異體字整理表》中慣常視作簡化字嘅規範字，有39隻。

1971年，中華人民共和國取代咗中華民國喺聯合國嘅席位。自此，簡體代替繁體成為聯合國嘅官方文書之一。踏入21世紀，隨住中華人民共和國影響力日增，外國人學中文時用嘅字逐漸變成以簡體為主。

而家一般將簡化字嗌做簡體字，其實正稱係「簡化字」，「簡化字」呢個名專指呢套官方標準，而簡體字有時可以指過去民間沿用嘅簡筆俗字，而家則又可以指「簡化字」。一般人講嘢無呢種區分，意識唔到呢啲名之間有唔同嘅學術定義。既然「簡化字」出咗來，中華人民共和國就將原先嘅傳統漢字嗌做繁體字，而中華民國方面則將自己定嘅漢字標準嗌正體字，同簡化字相對。

舉例

簡化	傳統	簡化	傳統
户	戶	见	見
讠	訁	贝	貝
车	車	钅	釒
长	長	门	門
青	靑	韦	韋
页	頁	风	風
飞	飛	饣	飠
马	馬	鱼	魚
鸟	鳥	麦	麥
黄	黃	齐	齊
齿	齒	龙	龍
龟	龜	丰	豐

簡化字、簡體字、簡筆字之別

• 簡化字：公佈於中華人民共和國1964年，以1986年修訂嘅《簡化字總表》為準，係中華人民共和國官方之稱，對應住未簡化嘅「繁體字」。
  • 簡體中文：以呢份《總表》做官方標準嘅中文書寫、印刷系統。

• 簡筆字：指史上古已有之、歷代通行嘅筆簡俗字，以「簡筆嘅異體字」爲準，有別於簡化字中嘅類推同整理。譬如，「体」字古為「體」嘅俗字。《小學》嗌做「省文」，日本嗰邊嗌做「略字」。

• 簡體字：有廣義、狹義之分；廣義上相當於簡筆字（民間俗字），狹義上指官方標準嘅簡化字。

爭議

支持

簡化字筆劃比傳統字簡單，將簡化字正式定為標準，原意係為咗短期內提升中國大陸識字率，有利書寫同推廣中文。等細路仔都無需嘥記憶力喺筆繁嘅字度，加快學童嘅學習進度。^{[未記出處或冇根據]}

批評

2015年，喺中國大陸新浪網一項網上調查，77%人反對漢字繼續簡化，58.8%人鍾意繁體字^[1]。有人將簡化字叫做「殘體字」^[2]，批評簡化字殘缺不全。

中國兩會有時會出現同繁簡文字有關嘅討論，有人提倡恢復繁體字教育^[3]。

因簡化而合併嘅字，有時會造成混亂，增加負擔。一啲字簡化後變得字形相近，一啲變成一字多意。好多電腦軟件用機械翻譯將簡體轉繁體就成日搞到出錯^[4]，因為有啲簡化字一個字對應幾個傳統字。

睇埋

• 傳統字
• 假名
• 速記

參考

1. 〈漢字仍有簡化空間？ 77%中國網友不支持 - 國際 - 自由時報電子報〉。喺2018-07-08搵到。
2. 〈籲到圖書館自發下架「殘體字」書 熱血公民鄭錦滿被捕 - 香港經濟日報 - TOPick - 新聞 - 社會〉。topick.hket.com。喺2018-07-08搵到。
3. 〈為什麼應該推行繁體字教育？--中國人大新聞--人民網〉。npc.people.com.cn。原著喺2020-03-28歸檔。喺2018-07-08搵到。
4. 〈子貓物語~~附庸風雅: 令人髮指的簡繁轉換錯誤〉。《子貓物語~~附庸風雅》。2007-08-08。喺2018-07-08搵到。

出面網頁

• 香港網絡大典：簡體中文